ټاکنيزې مبارزې

 
جلال اباد(پژواک،٤غبرګولى٩٣):په ننګرهار کې د زلمي رسول د انتخاباتي دفتر  مشر او ځينو غړو يې په دويم پړاو ټاکنو کې له اشرف غني احمدزي څخه خپل ملاتړ اعلان کړ.
همدارنګه په دې اړه په ياد ولايت کې د جوړې شوې غونډې په ترڅ کې يو شمېر ديني علماوو او مېشتو اهل هنودو هم  له اشرف غني ملاتړ اعلان کړ او هغه يې وړ کانديد وباله.
د ولسمشريزو ټاکنو د ياد کانديد پلويانو په دې غونډه کې وويل، چې د ختيځې سيمې وګړي به په دويم پړاو ټاکنو کې په ډير شمېر ګډون وکړي.

 
کابل، ګردېز (پژواک ٢ غبرګولى ٩٣): جهادي مشر انجنير احمدشاه احمدزي او د احمدزيو د قوم مشرانو د ولسمشرۍ له کانديد ډاکټر اشرف غني احمدزي څخه خپل ملاتړ اعلان کړ.په هغې غونډه کې ، چې نن له غرمې مخکې په کابل کې د اشرف غني احمدزي په کور کې جوړه شوې وه، د احمدزيو د قوم سلګونو مشرانو ګډون کړى وو.
په دې غونډه کې د اقتدار اسلامي افغانستان ګوند مشر او پخواني لومړي وزير انجنير احمدشاه احمدزي هم خبرې وکړې او له ډاکټر اشرف غني څخه يې خپل ملاتړ څرګند کړ.
هغه له خپلو ملاتړو وغوښتل، چې د ولسمشرۍ په دويم پړاو ټاکنو کې خپله رايه اشرف غني احمدزي ته ورکړي.

 
کابل (پژواک ٣١ غويى ٩٣): ډاکټر عبدالله وايي، خلک بايد ډاډمن واوسي چې افغانستان د بحران خوا ته نه ځي او هر ټاکنيز ټيم چې د عادلانه ټاکنو له مخې بريالى شي< نو د هېواد په زيان به نه وي.
د ولسمشرۍ ټاکنو د دوهم پړاو نوماند ډاکټر عبدالله، د اصلاحاتو او همپالنې ټيم څخه د ولسي جرګې پخواني غړي او د افغانستان د ځوانانو د پيوستون ګوند مشر جميل کرزي د ملاتړ په مناسبت په رابلل شوې غونډه کې وويل، ځينې کړۍ هڅې کوي چې ټاکنو ته د خپلو شخصي ګټو لپاره قومي بڼه ورکړي، خو خپلو دغو موخو ته به ونه رسېږي.

 
کابل (پژواک ٣١ غويى ٩٣):  د ولسمشرۍ ټاکنو د لومړي پړاو يو نوماند داوود سلطانزوى په رسمي ډول د اشرف غني احمدزي په مشرۍ د تحول او تداوم له ټېم څخه ملاتړ اعلان کړ.
داوود سلطانزوى نن د " ټاکنې د پاشل کېدو نه، بلکې د يووالي لپاره زمينه"تر نوم لاندې په يوه ناسته کې د ډاکټر اشرف غني احمدزى په مشرۍ له ياد ټيم څخه ملاتړ اعلان کړ.
د يادونې ده، د ولسمشرۍ ټاکنو د لومړي پړاو له ختمېدو وروسته، چې هېڅ نوماند هم په کې بريالى نه شو، د لومړي پړاو له مخکښو کانديدانو ( ډاکټر عبدالله عبدالله او ډاکټر اشرف غني احمدزي ) د ملاتړ اعلانولو لړۍ پيل شوې ده.