ټاکنيزې مبارزې

چاريکار-کندوز-مهترلام (پژواک ١٧غبرګولى٩٣): ډاکټر عبدالله عبدالله وايي، چې د برياليتوب په صورت کې به په کاپيسا او پنجشېر ولايتونو کې د برېښنا بندونه جوړ کړي.
د ولسمشرۍ دغه مخکښ نوماند دا څرګندونې نن په کاپيسا کې خپلو سلګونو پلويانو ته وکړې او له هغوى يې وغوښتل، چې په ټاکنو کې ده ته رايه ورکړي.
ډاکټر عبدالله په دې غونډه کې چې د ټاکنيز ټيم پر غړو سربېره يې ځايي اوسېدونکو، د ملي شورا غړو، قومي مشرانو، ديني عالمانو او د ولايتي شورا استازو ګډون کړى و وويل، چې دويم پړاو ټاکنو ته هيله من دى او د ده په وينا، وبه يې ګټي.

کندهار)پژواک ،د غبرګولي ١٦مه، ٩٣):د ولسمشر نوماند ډاکټر اشرف غني احمدزي وايي ، هېواد ته سوله په سياسي اجماع راځي او په همدې بنسټ پر ملا عمر او حکمتيار غږ کوي چې خپل هېواد ته را ستانه شي او په سوله کې ژوند وکړي.د ولسمشرۍ نوماند ډاکتر اشرف غني احمدزي نن د غبرګولي په ١٦مه کندهار ولايت ته سفر وکړ او خپلو زرګونو پلويانو ته تر وينا مخکې يې د کندهار ښار په منډيګ ماڼۍ کې له يو شمېر قومي مشرانو او د مدني ټولو له استازيو سره وليدل.

کابل (پژواک ١٦غبرګولى ٩٣) : ودان افغانستان ګوند د يوې غونډې په ترڅ کې د ولسمشرۍ په دويم پړاو ټاکنو له مخکښ کانديد اشرف غني احمدزي څخه ملاتړ اعلان کړ.
دغه غونډه چې نن د غبرګولي ١٦مه په کابل کې جوړه شوې وه او سلګونو تنو په کې ګډون کړى و ، د تحول او تداوم له ټيم څخه يې ملاتړ اعلان کړ.
ددغه ګوند يوه غړي محمد يار د غونډې ګډون والو ته وويل ، ځکه يې له دې ټيم څخه ملاتړ اعلان کړ ، چې ددغه ټيم مشر يو مدبر شخص او ټيم يې غوره تګلاره لري.

کابل (پژواک ١٦ غبرګولى ٩٣) : د ولسمشرۍ مخکښ کانديد ډاکټر عبد الله د ورزشکارانو په يوه غونډه کې، چې په دويم پړاو ټاکنو کې له ده څخه د ملاتړ په موخه جوړه شوې وه وويل ، چې د برياليتوب پرمهال ورزش ته پاملرنه دده په لومړيتوبونو کې ځاى لري .
دغه غونډه چې د غبرګولي په ١٦مه د کابل په بادام باغ کې د زرګونو لوبغاړو په ګډون جوړه شوې وه ، عبدالله د غوندې برخوالو ته وويل ، چې لوبغاړي په ملي مسايلو او په ځانګړې توګه په ټاکنو کې مهم رول لري او په لومړي پړاو ټاکنو کې دغو ځوانانو دوى ته رايه ورکړه .

کابل (پژواک ١٥ غبرګولى ٩٣): د ولسمشرۍ د دويم پړاو ټاکنو مخکښ کانديد ډاکټر اشرف غني احمدزي د بريا په صورت کې د راتلونکي حکومت لپاره د خپلې اقتصادي برنامې مهم ټکي اعلان کړل.
نوموړي نن په کابل ښار کې د هېواد يو شمېر پانګه والو، صنعت کارانو، متشبثينو، د پوهنتون استادانو، د مدني ټولنې غړو او محصلينو ته ياده برنامه شرحه کړه، چې د مازيګر په شاوخوا پنځو بجو پيل او ماخوستن په اتو بجو پاى ته ورسېده.
اشرف غني وويل، چې په هېواد کې به مالدارۍ ته وده ورکړي او هم به د بهرنيو توليداتو په پرتله کورنيو توليداتو ته اولويت ورکړي.

کابل ( پژواک١٥غبرګولى٩٣): د ولسمشرۍ کانديد اشرف غني احمدزى وايي،که بريالى شو نو په دولتي چارو کې به له ديني عالمانو سره مشورې کوي او اسلاميت او افغانيت به يې د دولت اساسي بنسټونه وي .
د وري د ١٦مې په ټاکنو کې د ولسمشرۍ له اتو کانديدانو يوه هم پنځوس سلنه جمع يو رايه تر لاسه نه شو کړاى . له همدې امله ټاکنې دويم پړاو ته ولاړې او ټاکل شوې، چې د غبرګولي په ٢٤مه په دويم پړاو ټاکنو کې د دوو مخکښو کانديدانو ( ډاکټر عبدالله عبدالله او ډاکټر اشرف غني احمدزي تر منځ سيالۍ وشي.

فراه – هرات (پژواک ١٤ غبرګولى ٩٣): د ولسمشرۍ د دويم پړاو ټاکنو نوماند ډاکټر عبدالله وايي، چې د بريا په صورت کې په فراه ولايت کې د بخش اباد د اوبو او برېښنا جوړولو ته ژمن دى.
عبدالله عبدالله له خپل مرستيال انجنير محمد خان سره يوځاى د فراه مرکز ته نن سفر وکړ او د دې ولايت په لوبغالي کې يې کابو خپلو درې زره تنو ته وينا وکړه.
په دې غونډه کې د نورزيو د قوم يوه استازي حاجي خيرمحمد نورزي وويل، چې ډاکټر عبدالله د جهاد پرمهال په هېواد کې شتون درلود او د هېوادوالو په دردونو خبر دى، نو له همدې امله له هغه ملاتړ کوي.

کابل (پژواک ١٤ غبرګولى ٩٣): د اسلامي انقلاب حرکت ملي او جهادي ټولنې او د نجيب الله کابلي په مشرۍ د ملي مشارکت ګوند غړو، د ولسمشرۍ په دويم پړاو ټاکنو کې له اشرف غني څخه د ملاتړ اعلان وکړ.
په هغې غونډه کې چې په کابل کې د اشرف غني احمدزي په کور کې تر سره شوه، د عبدالحکيم مجاهد، مولوي قلم الدين او مولوي خليل الله فيروزى په ګډون لسګونو جهادي څېرو او علماوو، نن په رسمي ډول له ډاکټر اشرف غني احمدزي څخه ملاتړ وکړ.
مولوي فيروزي وويل، چې دوى د اشرف غني غوره ځانګړتياوو ته په پام سره، له هغه سره بيعت کړى دى.

جلال اباد، مزار، لښکرګاه ( پژواک ١٣ غبرګولى): په بلخ، ننګرهار او هلمند ولايتونو کې د ډاکتر اشرف غني احمدزي په مشرۍ د تحول اوتداوم ټيم په ملاتړ غونډې جوړې شوې.
د وري د ١٦مې په ټاکنو کې د ولسمشرۍ له اتو کانديدانو يوه هم پنځوس سلنه جمع يو رايه تر لاسه نه شو کړاى . له همدې امله ټاکنې دويم پړاو ته ولاړې او ټاکل شوې چې د غبرګولي په ٢٤مه په دويم پړاو ټاکنو کې د دوو مخکښو کانديدانو ( ډاکټر عبدالله عبدالله او ډاکټر اشرف غني احمدزي تر منځ سيالۍ وشي.

قلعه نو (پژواک ١٢ غبرګولى ٩٣): د بادغيس په مرکز قلعه نو کې سلګونو تنو د يوې غونډې په ترڅ کې د ډاکټر عبدالله عبدالله په مشرۍ د اصلاحاتو او همپالنې له ټيم څخه ملاتړ اعلان کړ.
د ولسمشرۍ په لومړي پړاو ټاکنو کې چې د وري په ١٦مه ترسره شوې، له اتو کانديدانو يوه هم ٥٠ جمع يوه سلنه رايې پوره نه شوې کړاى او ټاکنې دويم پړاو ته ولاړې.
ټاکل شوې په دويم پړاو ټاکنو کې چې د غبرګولي په ٢٤مه ترسره کېږي، دوه مخکښ کانديدان (اشرف غني احمدزى او عبدالله عبدالله) سره سيالي وکړي.