ټاکنيزې مبارزې

نيلي، اسعداباد، کابل (پژواک ١١ غبرګولى ٩٣): د ولسمشرۍ ټاکنو کانديد ډاکټر عبدالله عبدالله وايي، د برياليتوب په صورت کې په هېواد کې د بيارغونې او پرمختيا او په ټولو برخو کې د عدالت پلي کولو ته ژمن دى.
نوموړي دغه څرګندونې په هغې غونډه کې وکړې، چې نن يې د دايکنډي ولايت په مرکز نيلي کې خپلو ملاتړو ته کولې.
د هغه په خبره، دايکنډي د افغانستان له هغو ولايتونو څخه دى، چې پرمختګ يې نه دى کړى او د برياليتوب په صورت کې به دې ولايت ته ځانګړې پاملرنه وکړي.

واشنګټن (پژواک، ١٠غبرګولى٩٣): د افغانستان د ولسمشريزو ټاکنو مخکښ کانديد ډاکټر اشرف غني احمدزى وايي، چې که ټاکنې وګټي ، نو د خپل حکومت په لومړۍ اونۍ کې به له امريکا سره امنيتي تړون لاسليک کړي.
اشرف غني وايي، چې دا تړون د افغانستان ملي ګټي تامينوي او د سيمې او نړۍ د سولې لپاره مهمه ده.
نوموړي دغه څرګندونې د جمعې په ورځ د اتلانتيک شورا په نوم يوه وتلي فکري مرکز ته، چې په امريکا کې موقعيت لري، د سکايپ له لارې وکړې.
اشرف غني وويل، چې اوس افغانستان له حساس پړاو څخه تېرېږي، افغانان نور تاوتريخوالى نه غواړي او دده په وينا، ولسواکۍ ته يې خپله غېږه خلاصه کړې ده.

هرات، ترينکوټ، جلال اباد ( پژواک، ١٠ غبرګولى ٩٣ ) : په هرات، ننګرهار او اروزګان ولايتونو کې د ولسمشرۍ د کانديد ډاکټر اشرف غني احمدزي په ملاتړ غونډې وشوې.
د ولسمشرۍ کانديد ډاکټر اشرف غني پرون هرات ولايت ته تللى و او يوې لويې غونډې ته يې وينا وکړه.
له هغه سره په دې سفر کې يو شمېر نور مهم غړي او د کمپاين مسوولينو هم ملتيا کوله.
ډاکټر اشرف غني يادې غونډې په خپله وينا کې کاري پلانونه تشريح کړل او په ډاګه کړه يې کړه، چې د برياليتوب په صورت کې به د هېواد اقتصاد پياوړى او افغانستان به په يوه صادراتي هېواد بدل کړي.

خوست (پژواک ٨ غبرګوالى): د خوست اوسېدونکي وايي، چې په دويم پړاو ټاکنو کې به په پراخه کچه برخه واخلي او زياتوي چې د ټاکنو کمېسيون بايد د درغليو مخه ونيسي.
خوستوالو دا څرګندونې په هغې غونډه کې وکړې، چې د دغه ولايت په مرکز کې د ولسمشرۍ لپاره د نوماند ډاکټر اشرف غني په ملاتړ جوړه شوې وه.
په ياده غونډه کې سلګونو قومي مشرانو، ديني عالمانو، ځوانانو او د مدني ټولنې د بېلابېلو بنسټونو غړو ګډون کړی وو.
د خوست د اسماعيل خېلو ولسوالۍ اوسېدونکي حاجي مېر بازخان وويل، ښايي په دويم ځلې ټاکنو کې له ځينو امنيتي ستونزو سره مخ شي، خو بيا هم په کې ونډه اخلي.

کابل (پژواک ٨ غبرګولى٩٣): ځيني حرکتونو او قومي شوراګانو د ولسمشرۍ په دويم پړاو ټاکنو کې د اشرف غني احمدزي په مشرۍ د تحول او تداوم له ټيم څخه ملاتړ اعلان کړ.
ټاکل شوې د ولسمشرۍ دويم پړاو ټاکنې د غبرګولي په ٢٤مه د وري د ١٦مې د ټاکنو له کانديدانو څخه د دوو مخکښو کانديدانو (اشرف غنى احمدزي او عبدالله عبدالله) ترمنځ ترسره شي.
د دويم پړاو د ټاکنيزو سياليو په ترڅ کې چې د غبرګولي په لومړۍ نېټه پيل شوي، نن د اشرف غني احمدزي په ملاتړ د زرګونو تنو په ګډون غونډه جوړه شوه.

کابل (پژواک ٦ غبرګولى ٩٣): ډاکټر اشرف غني احمدزي په کابل کې له يو شمېر محصلينو سره يو ځاى په يوه غونډه کې وويل، چې که چېرې په راتلونکو ټاکنو کې بريالى شي نو د وړتيا او استعداد له مخې به د دولت ټول کارکوونکي استخدام کړي، نه د واسطې او اړيکو له مخې.
احمدزي زياته کړه، چې تر ټولو ښه پانګونه د ځوانانو د پوهنې په برخه کې د هغوى راتلونکي ته پانګونه ده.
نن د ډاکټر اشرف غني احمدزي او د پوهنتونونو د استادانو او محصلينو تر منځ د کابل په انټرکانټننټال هوټل کې يوه ګډه ناسته تر سره شوه.

جلال اباد (پژواک ٦ غبرګولى ٩٣): په ختيځ کې د پشه يي قوم مشرانو، چې په لومړي پړاو کې د زلمي رسول ملاتړي وو، له ډاکتر اشرف غني احمدزي خپل ملاتړ اعلان کړ.
د ولسمشرۍ د پخواني کانديد زلمي رسول د پشه يي قوم کمپاينرانو نن (د غبرګولي ٦مه) په جلال اباد ښار کې د يوې غونډې په ترڅ کې دغه اعلان وکړ.
هغوى وويل، دوى غواړي په خپل ملاتړ سره د پشه يي قوم هغه لسګونه زره رايې، چې پخوا د ډاکټر زلمي رسول په ګټه کارول شوې وې، ډاکټر اشرف غني ته وکاروي.

جلال اباد (پژواک ٥ غبرګولى ٩٣): په جلال اباد ښار کې د بدلون او دوام تر سرليک لاندې د کرکټ ١٥ ورځنۍ سيالۍ پيل شوې.
دغه سيالۍ د غبرګولي په ٥مه د جلال اباد ښار د سراج العمارت بڼ د کرکټ اکاډمۍ په لوبغالي کې پيل شوې، چې په کې ٨ لوبډلې برخه اخلي.
د دغو لوبو يوه سمبالوونکي اکرام الله اکرام پژواک خبري اژانس ته وويل ، چې د کرکټ دغه سيالۍ به نږدې يوه اونۍ دوام وکړي، چې په کې د مدني ټولنې لوبډلې برخه اخلي.
نوموړي وويل، دغه لوبې چې د بدلون او دوام تر سرليک لاندې دي، موخه يې په هېواد کې د بنسټيز بدلون او دوام غوښتنه ده.

کابل (پژواک ٥ غبرګولى ٩٣): د ولسمشرۍ کانديدډاکټر عبدالله وايي، چې د امريکا ولسمشر بارک اوباما کابل ته د سفر په ترڅ کې له افغان چارواکو سره ليدنه نه ده کړې او خپله يې هم له اوباما سره هېڅ اړيکه نه ده نيولې.
د امريکا ولسمشر تېره شپه ناوخته پر يوه ناڅاپي سفر بګرام پوځي اډې ته راغى او له خپلو قوماندانانو او سرتېرو سره يې وليدل.
ډاکټرعبدالله د اوباما د دغه سفر موخه د خپلو قربانيانو يادون ګڼلى او ويلې يې دي، چې د امريکا ولسمشر له افغان چارواکو سره ليدنې نه درلودې.