ټاکنيزې مبارزې

کابل (پژواک، ١٥ تله ٩٧): د چارو یو شمېر پوهان وايي چې ډېری نوماندانو ځکه په خپلو شعارونو کې ډېر «عمل» ټینګار کړی چې دوی پوهېږي چې د وکیلانو د تېرو ناعملي شوو ژمنو له امله خلک له شعار ورکولو ستړي شوي او د عمل غوښتنه کوي.
د نوماندانو په شعارونو کې د ښځو حقونو موضوع کمه تر سترګو کېږي. پوهان وايي چې نوماندانو ځکه په خپلو شعارونو کې دې موضوع ته اشاره نه ده کړې چې په تېر کې ناعملي او پروژه يې موضوع وه او خلک نور پرې باور نه کوي.
ټاکل شوې ده د ولسي جرګې ټاکنې د روانې «تلې» میاشتې په ۲۸ مه ترسره شي.

جلال اباد (پژواک ۱۰ تله ۹۷): د ننګرهار په کامې ولسوالۍ کې د ولسي جرګې د يوه کانديد پر دفتر ځانمرګی بريد شوی، چې چارواکي وايي، له امله يې ۵۵ کسانو ته مرګ ژوبله اوښتې ده.
د معلوماتو له مخې، چاودنه هغه مهال رامنځته شوې چې د ناصر خان مومند په نوم د ټاکنو د يوه نوماند په دفتر کې تر يوې ټاکنيزې غونډې وروسته خلک ډوډۍ خوړلو کې مصروف و.
د ننګرهار د والي وياند عطاء الله خوږياڼي د تلې په ۱۰مه پژواک خبري اژانس ته وويل، چې ځانمرګ بريد د کامې ولسوالۍ په ګهيک سيمه کې د ولسي جرګې د نوماند ناصر خان مومند د کمپاين دفتر کې شوی دی.

کابل (پژواک، ٩ تله ٩٧): د ټولنيزې شبکې فيسبوک له لارې د کمپاين په ترڅ کې د ننګرهار عامه کتابتون لپاره زرګونه جلده کتابونه او لسګونه زره افغانۍ نغدې روپۍ راټولې شوې دي.
دغه کمپاين درې ورځې مخکې د کابل پوهنتون د استاد، ليکوال او ژورنالېست محبوب شاه محبوب له خوا په فيسبوک کې په لاره اچول شوی و.
دا چې ولې نوموړي دغه کمپاين پيل کړ، په اړه يې وايي: ((په دې وروستیو کې خبر شوم چې د ننګرهار عامه کتابتون جوړ شوی، خو نور د اړتيا وړ توکي او کتابونه نه لري، نو دا چې د ولسي جرګې لپاره کمپاينونه پيل شوي وو، ما دا ښه فرصت وګاڼه چې په دې اړه په فيسبوک کې کمپاين وکړم.))

کابل (پژواک ٢١ غبرګولى ٩٣): ډاکټر عبدالله د ولسمشرۍ ټاکنو له دوو مخکښو نوماندانو څخه يو دى، چې له افغانانو سره يې پنځوس سترې ژمنې کړي، چې د برياليتوب پر مهال به يې پلې کوي.
ياد نوماند، خپلې دغه ژمنې تر ډېره په خپلو ټاکنيزو مناظرو او په لومړي او دويم پړاو ټاکنيزو مبارزو کې ولايتونو د سفر پر مهال مطرح کړې دي.
د ډاکټر عبدالله ويناوې څرګندوي، چې د دغه نوماند ژمنې تر ډېره د اقتصادي او بنسټيزو پروژو د رغونې او پياوړتيا او په دولت کې د اصلاحاتو پر راوستو ولاړې دي.
اقتصادي:

کابل (پژواک، ٢١ غبرګولى ٩٣): ډاکټر اشرف غني احمدزى د ولسمشرۍ له دوو نوماندانو يو دى، چې د افغانستان خلکو ته يې ٥٠ سترې ژمنې ورکړې، چې د خپلې بريا په صورت کې به يې عملي کوي.
دغه مخکښ نوماند خپلې ژمنې په لومړي پړاو (د ٩٢ کال د سلواغې له ١٣مې د ٩٣ کال د وري تر ١٣مې) او په دويم پړاو (٩٣ کال د غبرګولي له لومړۍ تر ٢١مې) کې د ټاکنيزو مبارزو او ولايتونو ته د سفرونو له لارې مطرح کړې دي.
د اشرف غني احمدزي خبرو ته په کتو سره څرګندېږي، چې د ولسمشرۍ د دغه نوماند ډېرې ژمنې د اقتصادي مسايلو او د خلکو او دولت د عايداتو د ښه کېدو او لوړېدو پر محور را څرخېږي.

فيروزکوه (پژواک ٢٠ غبرګولى ٩٣): د راتلونکو ولسمشرۍ ټاکنو نوماند عبدالله عبدالله د غور ولايت په غونډه کې ژمنه وکړه، چې د ګردن دېوار (د کابل-هرات لويه لار) سړک به چې د توريزم د پرمختګ لامل ګرځي، ورغوي.
نوموړي نن په هغې غونډه کې، چې د دغه ولايت د لعل و سرجنګل په ولسوالۍ کې چې د ښځو په ګډون زرګونو کسانو برخه په کې اخيستې وه، وويل چې دغه سړک نه يوازې د غور د خلکو، بلکې د ټولو مرکزي سيمو د اوسېدونکو غوښتنه ده او د هېوا د اقتصاد د پرمختګ لامل ګرځي.

کابل (پژواک ٢١ غبرګولى ٩٣): د ولسمشرۍ د مخکښو کانديدانو ټاکنيزې مبارزې، چې د غبرګولي مياشتې په لومړنۍ نېټه پيل شوې وې، د تیرې شپې په ۱۲ بجو پای ته ورسیدې.
د افغانستان د ټاکنو قانون له مخې، ټاکنيزې مبارزې بايد د ټاکنو له ترسره کېدو ٤٨ ساعته وړاندې پاى ته ورسېږي.
ټاکل شوې چې د ولسمشرۍ دويم پړاو ټاکنې دوه ورځې وروسته د غبرګولي په ٢٤مه نېټه ترسره شي. د ټاکنو په دغه پړاو کې ډاکټر عبدالله عبدالله او ډاکټر اشرف غني احمدزى په خپلو کې سيالي کوي.

تالقان ( پژواک، ١٨ غبرګولى ٩٣ ) : د بدلون او دوام ډلې دوو مخکښو مشرانو په تخار ولايت کې ديوې پراخې غونډې ګډون والو ته ډاډ ورکړ، چې د برياليتوب په صورت کې به يې ستونزې هواروي.
دغه غونډه دغبرګولي په ٢٨مه، د تخار په رستاق ولسوالۍ کې جوړه شوې وه، چې په کې د بدخشان د دوو ولسواليو او د تخار د ماوارى کوکچه سيمې د پنځو ولسواليو زرګونو کسانو برخه اخيستې وه.
دې غونډې ته د بدلون او دوام د ډلې د کانديد اشرف غني لومړي مرستيال جنرال عبدالرشيد دوستم او ددې ډلې بل مخکښ مشر احمد ضياء مسعود ويناوې وکړې.

کابل (پژواک ١٨ غبرګولى ٩٣):د ولسمشر کرزي ورور عبدالقيوم کرزي او د کابل په ختيځ کې شعيه مذهبو خلکو د ټاکنو په دويم پړاو کې د ډاکټر اشرف غني احمدزي په مشرۍ د بدلون او دوام له ټيم څخه ملاتړ وکړ.
قيوم کرزى هم د ټاکنو په لومړي پړاو کې ولسمشرۍ ته کانديد و خو وروسته له خپلې کانديدۍ تېر شو او د زلمي رسول په ګټه تېر شو.
زلمى رسول چې د ټاکنو په لومړي پړاو کې يې نږدې ١١ سلنه رايې درلودې، دويم پړاو ته يې لار ونه مونده او د ولسمشرۍ د مخکښ نوماند ډاکټر عبدالله عبدالله په مشرۍ د اصلاحاتو او همپالنې له ټيم څخه يې خپل ملاتړ اعلان کړ.

غزني ښار (پژواک ۱۷ غبرګولى ۹۳): په غزني کې د بېلابېلو قومونو استازو او په سلګونو کسانو د ولسمشرۍ د دويم پړاو ټاکنو کې له ډاکټر اشرف غني احمدزى څخه ملاتړ وکړ.
په دغو قومونو کې عليخېل، کوچيان، وزير، مسعود، ترکي، سليمانخېل، نيازي، اندړ، دفتاڼي، مياڼو، پښتون اباد شورا، کليوال ادبی ټولنه او د څلوېښتو مدني ټولنوغړي شامل وو.
دوى د ټاکنو په دوهم پړاو کې اشرف غني ولسمشرۍ ته يو غوره کس وباله او ويې ويل، چې د سولې او ثبات د راوستو په موخه به نوموړي ته رايه ورکوي.