سرغړونې

کابل (پژواک، ۲۵مرغومی ۹۷): د کابل ولایت لسګونو معترضو نوماندانو د ټاکنو خپلواک کمېسیون له لوري د اعلان شوو پایلو په وړاندې مخالفت وښود او هغه یې جعلي بللې دي.
یادو معترضو نوماندانو، نن د مطبوعاتي ناستې په ترڅ کې د کابل رایو بطلان په تړاو د ټاکنیزو شکایتونو کمېسیون له تېرې پرېکړې ملاتړ وکړ او د کابل رایو د باطلېدو غوښتنه یې وکړه.
د عرفان الله عرفان په نوم معترض نوماند د کابل ولسي جرګې د لومړنیو پایلو نوملړ جعلي وباله او ويې ویل چې ځینو سوداګرو د خلکو رایې اخیستې دي او د ټاکنو خپلواک کمېسیون يې په ملي بهیر کې په خیانت تورن کړ.

کابل (پژواک،۲۳ مرغومی ۹۷): د بغلان، تخار، بدخشان او کندوز ولایتونو یو شمېر معترض نوماندان د شمال ختیځ زون د ټولو رایو د باطلېدو د غوښتنې تر څنګ ګواښ وکړ چې که یې مشروع غوښتنو ته رسېدنه ونه شي، په خپلو ولایتونو کې به راتلونکې ولسمشریزه ټاکنې تحریم کړي.

کابل (پژواک، ۲۳ مرغومی ۹۷): د ولسمشر دویم مرستیال د ټاکنیزو کمېسیونونو پر فعالیتونو نیوکه کوي او وايي، د درغلۍ، سرغړونو او فساد د تورونو تر سیوري لاندې د دولت او افغانانو اعتبار او ارزښت په بشپړ ډول تر پوښتنې لاندې راغلی دی.
د ولسمشر دویم مرستیال محمد سرور دانش نن په کابل کې «د حقوقي مرستو ملي کنګرې» ناستې ته وویل: ((نن د ډېموکراسۍ تر ټولو ویاړمنه صحنه او په ټاکنو کې د خلکو په خپله خوښه سیاسي او مدني فعال ګډون د دوست او دښمن د پیغور او سپکاوي لپاره پر وسیله او یو ډول خجالت بدل شوی دی.))

هرات (پژواک، ۲٢ مرغومی ۹۷): د هرات لسګونو اوسېدونکو د دغه ولایت په اړه د ټاکنیزو شکایتونو کمېسیون د هغې پرېکړې په اړه چې د دغه ولایت رایې دې له سره نه شمېرل کېږي، اعتراض کړی او ګواښ کوي، که یې غوښتنو ته هرکلی ونه ویل شي، په ولسمشرۍ ټاکنو کې به ګډون ونه کړي.
دغه اعتراض کوونکو وویل، یواځې هغه رایې باور لري چې بایومتریک شوي دي او د هرات رایې باید له سره وشمېرل شي څو عدالت تامين شي.
دوی ګواښ وکړ چې که په پارلماني ټاکنو کې شفافیت او عدالت مراعات نه شي، په راتلونکو ټاکنو کې به ګډون ونه کړي.

مزار شريف ( پژواک، ۲۲مرغومی ۹۷): د بلخ ولايت معترض نوماندان وايي چې ټاکنو کمېسيون له دوی سره د مشکوکو صندوقونو د رايو بيا ځلي شمېرلو ژمنه کړې وه؛ خو په وينا يې چې تر اوسه يې نه ده عملي کړې.
ياد نوماندان چې د مرغومي په ۲۲مه، مزار شريف ښار کې راټول شوي وو، همدا راز يې وويل چې که غوښتنې يې ونه منل شي؛ نو د خپل حق تر لاسه کولو لپاره به سړکونو ته راووځي.

کابل (پژواک، ١٨ مرغومى ٩٧): د ولسي جرګې ټاکنو لپاره د کوچیانو نوماندان وايي، د کوچيانو په حوزه کې که شوې درغلۍ ونه څېړل شي او په اساس يې پايلې اعلان نه شي، لوى مدني حرکتونه به پيل کړي.

تالقان (پژواک، ١٦ مرغومى ٩٧): په تخار ولايت کې سلګونو ښځو د يوه لاريون په ترڅ کې تېرې ټاکنې له درغليو ډکې وبللې او د اعترض په توګه يې د ولايت مقام مخې ته د تحصن خېمه ودروله.

جلال اباد (پژواک، ۱۵ مرغومی ۹۷): په ننګرهار کې يو معترض نوماند وايي چې د ټاکنو خپلواک کمېسيون يو کارمند ترې د پيسو او دوو زرهي موټرو غوښتنه کړې ده.

کابل (پژواک، ١٤ مرغومى ٩٨):د ټاکنيزو شکايتونو کميسيون وايي، په ۳۱ ولایتونو کې ١٤٧٦٠ شکايتونه ثبت شوي چې له دې شمېرې څه باندې اته زره يې جدي دي او پر رايو نېغ په نېغه اغېز کولاى شي.
دغه څرګندونې د شکایتونو کمیسیون کمېشنر قاسم الیاسي د مرغومې په ۱۴ مه خبريالانو ته وکړې.
هغه وویل، د ولسمشرۍ ټاکنو د لومړنيو پايلو په اړه په ٣١ ولايتونو کې شکايتونه ثبت شوي دي، خو د ځينو ستونزو له امله د پاتې درېيو ولايتونو غور، دايکنډي او هلمند د شکايتونو د څېړلو په اړه دوى تر اوسه کره معلومات نه لري.

لښکرګاه (پژواک، ۸ مرغومی ۹۷): په هلمند کې يو شمېر معترض نوماندانو د خپلو پلويانو پر مټ د ټاکنو کمېسيون په دروازه کې خېمه وردروله او له حکومته يې وغوښتل چې د دغه ولايت رايې دې د بل ولايت د کارکوونکو له خوا وشمېرل شي.
په خېمه کې د راټولو کسانو له ډلې د فضل باري فياض په نوم يو نوماند وويل چې د ټاکنو کمېسيون نږدې ټول کسان پر فساد ککړ دي او بايد پر ځای يې نور کسان پر دندو وګومارل شي.
هغه زياته کړه، له کمېسيون سره يوازې د لومړۍ ورځې حساب شوې رايې مني او نور چې وروسته زياتې شوې، هغه دوی نه مني او مرکزي حکومت دې د دوی غږ واوري.