سرغړونې

کابل (پژواک، ۲۳ غویی ۹۸): له کابله د ولسي جرګې یو شمېر معترضو نوماندانو او پلویانو یې وروسته له هغه چې د ټاکنو کمېسیون د دروازې تړلو او لاریون اجازه ورنه کړل شوه د ټاکنیزو شکایتونو کمېسیون دروازه وتړله.

کابل (پژواک، ۱۸ غویی ۹۸): د ۱۲ ټاکنیزو حوزو معترضو نوماندانو د خپل تحصن پر ۱۶مه ورځ د کابل ښار له زنبق څلورلارې سره ارګ ته تللی سړک بند کړی دی.
دغه معترض نوماندان چې شمېر یې ۶۰ کسانو ته رسېږي په هلمند، کندهار، ننګرهار، میدان وردګو، پکتیکا، لوګر، بغلان، تخار، بدخشان، سمنګان، هرات او کوچیانو حوزې پورې اړوند دي او نن چهارشنبې یې ارګ ته د تللې لارې په بندولو ټاکنیزو ستونزو ته د رسېدنې لپاره د ځانګړې محکمې د جوړېدو غوښتنه وکړه.

کابل (پژواک، ١٥ غويى ٩٨): د ولسي جرګې د کوچيانو حوزې معترض نوماندان وايي، يو شمېر هغه نوماندان بريالي اعلان شوي چې يو ځل يې ډېرې رايې د ټاکنيزو شکايتونو کمېسيون باطلې اعلان کړې وې.
د ولسي جرګې ټاکنې شاوخوا ٧ مياشتې مخکې ترسره شوې. د ټاکنو کمېسيون د کوچيانو ټاکنيزې حوزې په ګډون د نورو ټولو حوزو وروستۍ پايلې اعلان کړې، خو د کابل د ټاکنو وروستې پايلې لا نه دي اعلان شوې.
د دغو ټاکنو پر پايلو په بېلابېلو ټاکنيزو حوزو کې نيوکې شوې او اعتراض کوونکي وايي چې په ټاکنو کې پراخې درغلۍ شوې دي.

کابل(پژواک،١٤ غویی ۹۸): د کابل معترض نوماندان په دغه ولایت کې د ولسي جرګې د ټاکنو د لغوه کېدو غوښتنه کوي او نن یې «په یادو ټاکنو کې د درغلۍ لس ډوله اسناد» ټاکنیزو کمېسیونونو ته سپارلي دي.

کابل (پژواک، ۱۰ غویی ۹۸): د ټاکنو خپلواک کمېسیون د کابل د ولسي جرګې ټاکنو د رایو د تېرې بیا شمېرنې تر لغوه کېدو دوه ورځې وروسته د ټاکنو د ورځې د اصلي پاڼې مطابق په دغه ولایت کې د ۱۸۳ مرکزونو د رایو بیا شمېرنه پیل کړه.
دا په داسې حال کې ده چې د ټاکنیزو شکایتونو کمېسیون مرکزي دفتر دوه ورځې مخکې د کابل ولایت د رایې ورکولو له ټولو ۵۵۸۹ مرکزونو څخه د ۱۸۳ مرکزونو چې ۱۳۰۰ محلونه په کې شاملېږي، د رایو بیا شمېرنه او تفتیش لغوه کړ او اعلان یې وکړ چې د کابل د رایو بیا شمېرنه به د ټاکنو د ورځې له اصلي پاڼو سره سم ترسره او ممکن یوه اونۍ وخت ونیسي.

کابل (پژواک، ۱۱ غویی ۹۸): د ۱۲ ټاکنیزو حوزو معترضو نوماندانو په کابل کې د تحصن په شپږمه ورځ د ولسي جرګې د ټاکنو د وروستیو پایلو اعلان بې باوره ګڼي او وايي، ټاکنیزو ستونزو ته د رسېدو لپاره دې ځانګړې محکمه جوړه شي.
د هلمند، کندهار، ننګرهار، میدان وردګو، پکتیکا، لوګر، بغلان، تخار، بدخشان، سمنګان، هرات ولایتونو او کوچیانو حوزې معترضو نوماندانو نن د کابل ښار په زنبق څلورلاره کې یوې خبري ناستې ته وویل، د ټاکنیزو کمېسیونونو له خوا د ولسي جرګې د وروستیو پایلو اعلان د پراخو درغلیو له امله د منلو وړ نه دی.

کابل (پژواک، د غويي لومړۍ نېټه ٩٨): لویې څارنوالۍ د کوچیانو حوزې د نوماندانو ټاکنیز شکایتونه د ټاکنیزو شکایتونو کمېسیون ته استولي، خو تر اوسه یې په داسې حال کې برخلیک روښانه نه دی چې روانه اوونۍ د دغه حوزې وروستۍ پایلې اعلانېږي.

کابل (پژواک، ۲۹ وری ۹۸): د کابل حوزې ځينو معترضو نوماندانو د ۱۳۹۷ کال د ولسي جرګې په ټاکنو کې د پراخو درغلیو په اړه د اندېښنې په څرګندولو وايي، «د درغلۍ توره کڅوړه» چې د فساد او درغلۍ ۶۶۵ دوسیې په کې شاملې دي، عدلي او قضايي بنسټونو ته سپاري.

کابل (پژواک، ٢٤ورى ۹۷): سندونه ښيي چې څارنوالۍ د "ميرزا کټوازي" پر بند د محکوميت په اړه د ټاکنيزو شکايتونو له کميسيون څخه معلومات پټ کړي او نوموړي نوماند د ولسمشر په شفاهي امر له بنده خوشی شوی او د ولسي جرګې په ټاکنو کې بريالى هم اعلان شوى دی.

کابل/ تالقان (پژواک، ۱۸وری ۹۸): د کابل او تخار ولایتونو یو شمېر معترضو نوماندانو د دې دوو ولایتونو د رایو د باطلولو او د ټاکنو بیا ترسره کېدو غوښتنې ترڅنګ ګواښ وکړ، که د دوی غوښتنې له پامه وغورځول شي، پراخ مدني لاریونونه به پيل کړي.
د کابل د ولسي جرګې ټاکنو ۴۰ معترضو نوماندانو، نه په کابل کې د خبري غونډې پرمهال د تلې ۲۸ مې او ۲۹ مې ولسي جرګې ټاکنې له درغلیو ډکې وبللې او ادعا یې وکړه چې د ټاکنو لومړنیو پایلو کې ګټونکي کسان د بډو ورکولو له لارې بریالي اعلان شوي دي.