سرغړونې

جلال اباد (پژواک، ۶ مرغومی ۹۷): د ننګرهار د ټاکنيزو شکايتونو دفتر وايي چې د دغه ولايت د ولسي جرګې ټاکنو تر اعلان وروسته ورسره د دغو پايلو په تړاو ۷۰ شکايتونه ثبت شوي دي.
د دوی د معلوماتو له مخې، د يادو شکايتونو په څېړلو سره به د ننګرهار پايلو کې ډېر تغیيرات رامنځته شي؛ ځکه ډېرو نوماندانو ته د هغوی اخيستې رايې هم نه دي شمېرل شوي.
په ننګرهار کې د ټاکنيزو شکايتونو د ولايتي دفتر رييس شکيب کامجو د مرغومي په ۶مه د يو خبري کنفرانس پر مهال وويل چې د دغه ولايت په تړاو لومړنۍ اعلان شوې پايلې له درغليو ډکې دي.

کندوز ښار (پژواک، ٥ لېندۍ ٩٧): په کندوز ولايت کې لسګونو ښځو د يوې اعتراضيه غونډې په ترڅ کې له ټاکنيزو کمېسيونونو غوښتنه وکړه چې پاکې رايې له ناپاکو بېلي کړي او حق حقدار ته وسپاري.
دغه ښځې نن (د مرغومي پنځمه) د کندوز په مرکز کې د ټاکنيزو شکايتونو کمېسيون مخې ته راټولې شوې وې.
د دغو اعتراض کوونکو ښځو له ډلې ولسي جرګې ته نوماندې مرضيې رستمي پژواک خبري اژانس ته وويل چې له دې غونډې د دوى اساسي موخه دا ده چې د ټاکنيزو شکايتونو کمېسيون بايد پاکې رايې له ناپاکو بېلې کړي.

جلال اباد (پژواک، ۴ مرغومی ۹۷): په ننګرهار کې د ولسي جرګې يو معترض نوماند وايي، د ټاکنو کمېسيون يې درې زره بايومټريک رايې باطلې کړې او ياد کمېسيون يې پر حق تېری کړی دی.
دی وايي، د خپلې دغې ادعا اسناد په لاس لري او د خپل حق غوښتلو برخه کې هر راز مدني حرکت ته حاضر دی.
په ورته وخت کې د ياد نوماند پلويان وايي، که د ورکړو رايو احترام يې ونه شي؛ نو دوی به په لويو مظاهرو لاس پورې کړي چې د هر راز بدو عواقبو مسووليت به يې د ټاکنو پر کمېسيون وي.

کابل (پژواک، ۳ مرغومی ۹۷): د ټاکنو کمېسیون یوه سرچینه وايي، د ځینو ولایتونو هغه سیمه ییز مسوولان به له دندو ګوښه او قانوني چلند به ورسره وشي چې پراخې درغلۍ یې کړې او د ټاکنو بهیر یې له ستونزو سره مخ کړی دی.
د ټاکنو کمېسیون یوې سرچینې د نوم د نه ښودو په شرط پژواک ته وویل، د ټاکنو کمېسیون څېړنې ښيي چې ځيني ولایتي رییسانو یې په دندو کې ناکام وو او باید حسابي ورسره وشي.
سرچینې په دې اړه چې څومره ولایتي رییسان به له دندو ګوښه شي؟ جزئیات ور نه کړل خو ویې ویل، هغه رییسان به وستایل شي چې خپله وړتیا یې څرګنده کړې او په خپلو چارو کې ښه ځلېدلي.