سرغړونې

کابل (پژواک، ۲۶ لیندۍ ۹۷): د افغانستان د ټاکنو او روڼتيا د څار اداره ( ایتوا) او د ولسي جرګې یو شمېر غړو د ولسي جرګې د ټاکنو د رایو د بیا شمېرنې بهیر د درغلۍ لپاره زمینه برابرونکی بولي.

لښګرګاه (پژواک، ۲۶ لېندۍ ۹۷): په هلمند کې يو شمېر معترض نوماندان او پلويان یې وايي چې په ټاکنو کې پراخه درغلي شوې او لومړنۍ پايلې دوى ته د منلو نه دي.
د اړوندې موضوع په اړه جوړې شوې غونډې ته د نوماند شېرمحمد اخندزاده استازي عبدالمجيد اخندزاده وويل چې کمېسيون له درغليو ډکې لومړنۍ پايلې اعلان کړې.
هغه وویل: ((د ټاکنو کمېسیون کې مسوول کسان ډېر په فساد اخته دي او داسې کسان يې مخې ته کړي چې له سره يې د کامیابه کېدو رایې نه درلودې.))
ده ټينګار وکړ چې کمېسيون دې يو ځل بيا د دوى د ناظرينو پر وړاندې رايې وشمېري، څو هر څه خلکو ته واضح شي.

مزارشريف (پژواک، ۲۱ لېندۍ ۹۷): د ولسي جرګې په لومړنيو پايلو کې د بلخ يو شمېر ناکام شوي نوماندان ادعا کوي چې د دغه ولايت د ټاکنو پر پايلو سياسي معامله شوې ده.
وړمه شپه د بلخ ولايت د ولسي جرګې ټاکنو لومړنۍ پايلې اعلان شوې چې ۱۱ کسان په کې بريالي اعلان شول.
د بلخ په مرکز مزارشريف ښار کې د لېندۍ ۲۱مه يو شمېر معترض نوماندان راټول شوي وو او غوښتنه يې وکړه چې د بلخ رايې دې بيا ځلي وشمېرل شي.
ولسي جرګې ته له بلخ ولايته په لومړنيو پايلو کې ناکامې کانديدې ماريا رهين پژواک ته وويل چې د بلخ رايو ته دې بيا کتنه وشي.

کابل (پژواک، ١٨ لېندۍ ٩٧): له پکتيکا ولايته د ولسي جرګې کانديده هيله مجتبى دوه تذکرې لري چې له قانونه سرغړونه ده.
پژواک اژانس د یادې نوماندې د دواړو تذکرو کاپي ګانې ترلاسه کړې چې په دواړو تذکرو کې يې بېلابېل ډول عکسونه لګېدلي دي.
د هغې لومړۍ تذکره د پکتيا ولايت د زرمت ولسوالۍ ده چې په کې ١٣٨٧ لمريز کال ١٩ کلنه ثبت شوې او دويمه تذکره کې د پکتيکا ولايت د مټا خان ولسوالۍ ده، چې د ١٣٨٩ لمريز کال ١٩ کلنه ليکل شوې ده.
د نفوسو د احوال د ثبت قانون د پنځم څپرکي په ٩٠١مه ماده کې راغلي: هغه شخص چې له لاندې اعمالو څخه د يوه مرتکب شي، له يو څخه تر پنځو کلونو پورې په حبس محکومېږي:

کندهار (پژواک، ۱۳ لیندۍ ۹۷): د ټاکنیزو شکایتونو کمېسیون وايي، کندهار کې يې د ولسي جرګې د ټاکنو درې زره رایې باطلې کړي او یو شمېر کسان یې د درغلیو په تور عدلي او قضايي ارګانونو ته ورپېژندلي دي.
د یاد شوي کمېسیون مشر کریم الله ستانکزي، نن مازيګر کندهار کې خبريالانو ته وويل چې د ولسي جرګې د ټاکنو په ورځ د کندهار ښار په ۱۱ ناحیو او د ۱۷ ولسوالیو له ډلې په ۱۵ کې ۱۷۰ مرکزونه پرانیستي وو او خلکو خپلې رایې وکارولې.

کابل (پژواک،۱۲ لیندۍ ۹۷): د ولسي جرګې یو شمېر غړي د ټاکنو پر کمېسیون د فساد د تور تر څنګ غوښتنه کوي چې یواځې بایومټریک رایې دې د اعتبار وړ وګڼل شي او وايي، په ټول توان له خپلو رایو دفاع کوي.
د ولسي جرګې ټاکنې د هېواد په ۳۲ ولایتونو کې د تلې په ۲۸ مه او ۲۹ مه خو په کندهار ولایت کې بیا د لړم په پنځمه ترسره شوې، ټاکل شوې ده چې په غزني ولایت کې د ځینو ستونزو له امله راتلونکی کال ترسره شي.
د ټاکنو کمېسیون تر اوسه د ۱۷ ولایتونو د ولسي جرګې ټاکنو لومړنۍ پایلې اعلان کړې دي.
د ولسي جرګې په نننۍ ناسته کې د دې جرګې په ټاکنو او د ټاکنو په بهیر کې پر ستونزو خبرې وشوې.

کابل (پژواک، ۱۱ لیندۍ۹۷): د ولسي جرګې د معترضو نوماندانو لوى ايتلاف د رایو د بیا شمېرنې او له سیستم څخه د نه بایومتریک شوو رایو د ایستلو د غوښتنې تر څنګ ټينګار وکړ چې له پاکې رایو له ناپاکو جلا نه شي، دوی موازي پارلمان جوړوي.
د ولسي جرګې ټاکنې د هېواد په ۳۲ ولایتونو کې د تلې پر ۲۸ مه او ۲۹ ترسره شوې، په کندهار کې بیا یادې ټاکنې تر څو ورځو ځنډ وروسته او په غزني ولایت کې به راتلونکی کال ترسره شي.
په دغه ټاکنو کې د هېواد له ۳۳ ولایتونو څخه شاوخوا ۲۵۰۰ کسان نوماند وو چې کابو ۳۰ سلنه یې ښځې وې.

خوست ښار (پژواک، ۱۰ لېندۍ ۹۷): خوست کې د ولسي جرګې يو شمېر معترض نوماندان ګواښ کوي چې که ټاکنيز کمېسيونونه د دوی غوښتنې ونه مني، دولت ته په دغه ولایت کې د ولسمشريزو ټاکنو د ترسره کېدو اجازه نه ورکوي.
د ولسي جرګې دغو معترضو نوماندانو چې شمېر يې شاوخوا ۳۰ کسانو ته رسېده، نن (د لېندۍ ۱۰مه) يوه خبري کنفرانس ته وويل چې د ټاکنو لومړنۍ اعلان شوې پايلې له درغليو ډکې وې او دوی ته د منلو وړ نه دي.

کابل (پژواک، ٨ لیندۍ ۹۷): د کاپیسا د معترضو نوماندانو اېتلاف د ټاکنیزو شکایتونو کمېسیون څخه وغوښتل چې په دغه ولایت کې ټول ثبت شوي شکایتونه په بې پلوۍ سره وڅېړي.

کابل (پژواک، ۷ لېندۍ ۹۷): یو شمېر معترض کوچي نوماندان په خپله ټاکنیزه حوزه کې کمزوری مديریت د پراخو درغلیو لامل بولي او ګواښ کوي چې که پاکې او نا پاکې رایې بېلې نه شي، د ټاکنو پایلې به ونه مني.