د ولايتي شوراګانو ټاکنې

فراه (پژواک، ٢٢ وږی ۹۴): د فراه په خاکسفید ولسوالۍ کې له پنځو ورځو راهيسې د روانې جګړې له امله سلګونه کورنۍ بېځايه شوې دي.
د راپورونو له مخې، د دولت سلګونو وسله والو مخالفينو پر خاکسفېد ولسوالۍ بريد کړى او دا مهال هم هلته نښتې روانې دي.
د فراه د ولايتي شورا غړي دادالله قانع پژواک خبري اژانس ته وویل چې د جګړې له امله د خاکسفېد له خشکابې، کورغن، نوی ده او ځينو نورو سیمو سلګونه کورنۍ د خپلو کورونو پرېښودو ته اړې شوې دي.
دى وايي چې دغه کورنۍ د فراه د پشترود او بالابلوک ولسواليو ته کډې شوې دي.
هغه وويل چې د جګړې له امله د اوښتې مرګ ژوبلې په اړه معلومات نه لري.

مزارشريف- اسعداباد (پژواک، ٢١ وږى ٩٤): په بلخ او کونړ ولايتونو کې هم زرګونو کسانو په تذکرو کې د افغان کلمې په ننګه لاريونونه وکړل.
د بلخ په مرکز مزارشريف ښار کې نن سهار (د وږي ٢١مه) لاريون پيل شو، د ښار له بېلابېلو سيمو سلګونه لاريون کوونکي چې په کې پښتانه، ازبک، هزاره، سادات او د نورو قومونو خلکو په کې ګډون کړى و، د کابل- مزار پر لويه لاره فردوسي څلورلارې ته راټول شول.
لاريون کوونکي چې شمېر يې تر دريو زرو ډېر و، له يادې څلورلارې د ولايتي شورا تر دفتر پورې په داسې حال کې ولاړل چې له ځان سره يې بېلابېل شعارونه لېږدول.

فيض اباد (پژواک،٢١ وږى ٩٤): د بدخشان امنيتي مسوولين وايي چې په راغستان ولايت کې يې د طالبانو بريد پر شا تمبولى او د نښتې پر مهال ٣٠ وسله وال مخالفين، پنځه ملي پوليس او درى ملکي کسان وژل شوي دي.
د بدخشان د امنيې قوماندانۍ وياند لعل محمد احمدزي نن (وږي ٢١مه) پژواک خبري اژانس ته وويل چې د دولتي ځواکونو او وسله والو مخالفينو ترمنځ د سختې نښتې له امله، د وسله والو مخالفينو ٣٠ کسان وژل شوي، پنځه ټپيان دي او زياتوي چې د ١٨ وسله والو مړي په سيمه کې پاتې دي.

ګردېز (پژواک، ١٩ وږى ٩٤): د پکتيا ولايت امنيتي چارواکي وايي چې په ډنډ پټان ولسوالۍ کې يې د وسله والو طالبانو پر ضد پراخ عمليات پيل کړي دي.
څلور ورځې وړاندې د يادې سرحدي ولسوالۍ پر سرحدي  پوستو بريدونه وکړل، څو پوستې يې ونيوې او جګړه اوس هم روانه ده .
په سوېل ختيځ زون کې د دوهم نمبر سرحدي زون قوماندان مل پاسوال عبدالبصير خپلواک د وږي په ١٩مه پژواک خبري اژانس ته وويل چې په سيمه کې ملي اردو،کومانډو او سرحدي پوليس په ګډه عمليات بيل کړي تر څو نيول شوې پوستې بېرته له وسله والو ونيسي.