د ولايتي شوراګانو ټاکنې

د خوست امنيه قوماندان مل پاسوال عبدالقيوم باقي زوی د سلواغې په لومړۍ نېټه پژواک اژانس ته وویل، چې نن يې د هغو موانعو د لرې کولو کمپاين پیل کړی، چې د امنيه قوماندانۍ شاوخوا ته ايښودل شوي وو.
د هغه په وينا، په دې سره به د خوست ښار ټول هغه سړکونه خلاص شي، چې تر دې مهاله ترې چا ګټه نه شوه پورته کولای.
نوموړي زياته کړه، چې دغه راز به په دې سره د خوست ښار ګڼه ګوڼه هم را کمه شي او ښاريان به په ډېرې اسانۍ سره پر سړکونو تګ راتګ کوي.
د باقي زوی په خبره، دوی غواړي له ټول ښار څخه هغه موانع لرې کړي، چې د امنيت په موخه د امنيتی ارګانونو له لوري ايښودل شوي دي.

خوست ښار (پژواک ١٩ سلواغه ٩١): په خوست کې د ډاياګ پروګرام مسوولين وايي، چې د افغان ځواکونو له لوري نيول شوې ٣٩ ميله وسلې دوى ته وسپارل شوې.
په خوست کې د ډاياګ (د غيرقانوني وسلوالو ډلو د بې وسلې کولو پروګرام) مسوول ډګروال شېرزاد د سلواغې په ۱۹مه پژواک اژانس وويل، چې دغه وسلې نن د خوست ولايت مقام په انګړ کې ورته وسپارل شوې.
د هغه په وينا، په دغو وسلو کې دوه ۸۲ ملي متري توپونه، ۹ راکټ انداز، ۵ پيکاوې، ۴ دهشکې، ۱۵ کلاشيکوفونه، ۳ يوولس ډزي ټوپک او درې تومانچې شاملې دي.

خوست ښار (پژواک ٦ مرغومى ٩١): د خوست مرکز اړوند د پخواني هوايي ډګر په دروازه کې، چې د سي اى اې مرکز هم دى، د موټر بم چاودنې له امله درې تنه وژل شوي او شپږ ټپيان دي.
د خوست امنيه قوماندان مل پاسوال عبدالقيوم باقي زوى د مرغومي په ٥ مه پژواک اژانس ته وويل، چې دغه پېښه نن سهار شاوخوا اوه نيمې بجې رامنځ ته شوه، چې له امله يې دوه افغان کارګر او يو افغان کمپايني سرتېرى وژل شوي دي.
د هغه په وينا، په پېښه کې شپږ افغان کارګران ټپيان دي، چې دا مهال د خوست ښار په روغتونونو کې تر درملنې لاندې دي.

خوست ښار ( پژواک ٢٩ ورى ٩٢ ) : د وسلوالو طالبانو په يوه بريد کې د خوست ولايت داسماعيلخېلو ولسوالۍ د ملي امنيت مدير ووژل شو.د خوست ولايت امنيه قوماندان مل پاسوال عبدالقيوم باقيزوي د وري په ٢٩مه، پژواک خبري اژانس ته وويل چې دغه وسلوال بريد نن مازيګر د خوست مرکز لويديځ ته د اسماعيل خېلو او مندوزيو ولسوالۍ اړونده د دوه سرکه په ښارګوټي کې وشو.
خو د هغه د ملي امنيت د مدير د وژل کېدو او يا هم ټپي کېدو په اړه معلومات نه درلودل.
قوماندان باقي زوی وايي چې د بريد سيمه د پوليسو له لوري کلابنده شوې او د مشکوکو کسانو د نيولو په اړه يې پلټونکي عمليات پيل کړي دي.

خوست ښار (پژواک، د لېندۍ لومړۍ نېټه ٩١): له نړيوالو ځواکونو د واک لېږدونې په درېيم پړاو کې د خوست د مرکز امنيتي چارې افغان ځواکونو ته وسپارل شوې.
افغان ځواکونو ته د امنيت د چارو د سپارلو مراسم نن (د لېندۍ لومړۍ نېټه) د خوست په دولتي مېلمستون کې نيول شوي وو، چې په کې د دفاع وزارت لوى درستير ستر جنرال شېرمحمد کريمي، د يو شمېر وزارتونو مرستيالانو، د خوست والي، د ۲۰۳ تندر قول اردو قوماندان او چارواکو، ګڼ شمېر قومي مشرانو او ځوانانو په کې برخه اخيستې وه.

خوست ښار (پژواک ١١ مرغومى ٩١): امنيتي چارواکي وايي، چې دخوست په مرکز او بېلابېلو ولسواليو کې د ګډو ځواکونو په عملياتو کې ١٥ وسلوال او يو شمېر وسلې او مهمات نيول شوي دي.
د خوست امنيه قوماندان مل پاسوال عبدالقيوم باقي زوى نن (د مرغومي ١١ مه) په يوه مطبوعاتي ناسته کې وويل، چې دغه کسان يې د خوست په بېلابېلو ولسواليو کې د ملي پوليسو، ملي اردو، ملي امنيت او بهرنيو ځواکونو په ګډو عملياتو کې نيولي دي.
د هغه په وينا، د عملياتو پر مهال يې دوه د ځانمرګو واسکټونه، ٥٠ ماينونه، ١٠ ميله وسله او ٩٠٠ کيلو ګرامه چاوديدونکي توکي هم نيولي دي.

خوست ښار (پژواک ٢١ لېندۍ ٩١): امنيتي چارواکي وايي، چې د يو لړ عمليات پر مهال يې هغه څلور کسيزه وسلواله ډله نيولې، چې دولتي مامورين يې وژل.
د خوست د ملي امنيت رياست د لېندۍ په ۲۱مه پژواک اژانس ته په يوه رالېږل شوې خبرپاڼه کې ويلي، چې ځواکونو يې په عملياتو کې هغه کسان ونيول، چې د ملي امنيت د کارکوونکو په ګډون يې پنځه دولتي مامورين وژلي وو.
د سرچينې په وينا، د وسلوالو دغه ډله يې تېره شپه د خوست په تڼيو ولسوالۍ کې په داسې حال کې نيولې، چې د دوو نورو دولتي مامورينو د وژلو پلان يې جوړاوه.

خوست ښار (پژواک ١٢ تله ٩٠): په خوست ولايت د ملي امنيت رياست وايي، چې دوه تنه يې د ځانمرګو بريدونو او يو يې له هغو سره د مرستې په تور نيولي دي.د دغه رياست له خوا پژواک خبري اژانس ته نن (د تلې ١٢مه) په يوه رالېږل شوې خبرپاڼه کې ويل شوي، دغه کسان د زمري په ۲۸مه هغه مهال، چې غوښتل يې د ازادۍ د ورځې په غونډو او مراسمو کې ځانمرګي بريدونه وکړي، نيول شوي دي.
په خبرپاڼه کې راغلي، چې په نيول شويو کې دوه تنه د پاکستان د جنوبي وزيرستان او پنجاب او درېيم يې د ميدان وردګو ولايت د سيداباد ولسوالۍ اوسېدونکي دي.

خوست (پژواک ١٢ غويى ٩٢): د خوست د ځاځي ميدان ولسوالۍ خلک په خپله سيمه کې د سيمه ييزو پوليسو د ګومارلو غوښتنه کوي.
د ځاځي ميدان ولسوالۍ د پرمختيايي شورا مشر ملک زاور ځاځی وايي، په دې ولسوالۍ کې د امنيت د ټينګښت لپاره د سيمه ييزو پوليسو جوړېدو ته اړتيا ده.
نوموړي پژواک اژانس ته وويل، که په ځاځي ميدان کې سيمه ييز پوليس جوړ شي نو د ډيورنډ له کرښې د وسله والو د را اوښتو مخه به ونيول شي.
دغه راز يو بل قومي مشر ملک بادشاه مير هم په خپله ولسوالۍ کې د سيمه ييزو پوليسو جوړښت د امنيت لپاره ګټور او اغېزمن بولي.

خوست ښار (پژواک ٤ ورى ٩٢): د خوست ولايت يو شمېر اوسېدونکي د ولايتي چارواکو له خوا د حساب ورکونې لړۍ ښه بولي او زياتوي چې په دې سره د ولس او دولت ترمنځ واټن له منځه ځي.
له تېرو دوو اونيو راهيسې د خوست د بېلابېلو ادارو رييسانو، مدني ټولنو او د رسنيو استازو ته د تېر يوه کال د حساب ورکونې لړۍ پيل کړې ده.
د خوست ولايت مقام د عامه اړيکو مسوول بريالی روان وايي، چې د رييسانو له لوري ولس ته د حساب ورکولو لړۍ يې ځکه پيل کړې؛ چې د ولس او دولت ترمنځ شته واټن له منځه ولاړ شي.