د ولايتي شوراګانو ټاکنې

د رڼو ټاکنو په ترسره کېدو کې د دولت ملاتړې يو

غزني( پژواک ٢٠ غويى ٩٢) : چارواکي وايي، چې د غزني په قره باغ ولسوالۍ کې د سيمه ييزو پوليسو پر پوسته په بريد کې د يوه قوماندان په ګډون څلور وسله وال وژل شوي او دوه نور ټپيان دي.
د قره باغ ولسوال فضل الرحمن نظروال د غويي په ٢٠مه، پژواک خبري اژانس ته وويل،تېره شپه د سيمه ييزو پوليسو پر امنيتي پوسته په بريد کې په څلورو وژل شويو طالبانو کې د واحديار په نوم يو قوماندان هم شامل دى.
نوموړى وايي ،د درېيو وژل شويو وسله والو مړي اوس له امنيتي ځواکونو سره دي ، د جګړې په ډګر کې څلور مېله وسله ، يوه مخابره او يو دوربين هم د امنيتي ځواکونو لاس ته ورغلي دي.

غزني (پژواک ٢٠ غويى ۹۲) : د غزني زيات شمېر اوسېدونکي شکايت کوي ،چې د ٢٠١٣ کال لپاره د تياري په موخه په پنځو کلونو کې د غزني ښار ته هيڅ کار ونه شو او دا شونې نه ده ،چې په پنځو مياشتو کې دې تياري ونيول شي .
د ٢٠١٣ کال د نمانځنې لومړي مراسم د وري په ٢٤مه تر سره شول او وروستي هغه به يې پنځه مياشتې وروسته د تلې په ١١مه تر سره کيږي.
د غزني ښار اوسېدونکى حاجي راز محمد وايي ، شونې نه ده ، چې د اسلامي فرهنګ پلازمېنې د نمانځلو وروستۍ غونډې لپاره چمتوالى بشپړ شي .
هغه په دولت تور لګوي ،چې غزني ته يې هيڅ پاملرنه ونه کړه ، تر څو د ٢٠١٣ کال لپاره پلان شوې پروژې بشپړې کړي .

غزنى (پژواک ١٦ غويى ٩٢): د غزني په مقر ولسوالۍ کې د وسله والو طالبانو پر وړاندې د ولسي پاڅون مشر وايي، چې د مقر ولسوالۍ ډېره برخه يې له طالبانو پاکه کړې او که مرسته ورسره وشي، د مقر له ګاونډو ولسواليو ګيلان او اب بند څخه به هم وسله وال وشړي.
په مقر کې د وسله والو مخالفينو پر وړاندې د ولسي پاڅون مشر سيدعلي پژواک خبري اژانس ته په ځانګړې مرکه کې وويل، چې په تېرو څلورو مياشتو کې يې د مقر ولسوالۍ پراخې سيمې له وسله والو پاکې کړې او د دې سيمې له ١٥٢ کليو يې وسله وال شړلي دي.

غزني (پژواک ١٢ غويى ٩٢): د غزني ښار د ٥٥ ښوونځيو د ښوونکو د درې ورځني کاري اعتصاب له امله د زرګونو زده کوونکو د زده کړو بهير ټکنى شوى دى.
د شمس العارفين لېسې د دوولسم ټولګي زده کوونکى نقيب الله وايي، چې له تېرو درېيو ورځو يې ښوونکي نه ورځي او درسي ساعتونه تش وي.
نوموړى له چارواکو غوښتنه کوي، چې د ښوونکو غږ دې واوري تر څو ستونزه هواره شي او د ښوونځيو درسونه له سره پيل شي.
د سيد احمد مکه يي لېسې د يوولسم ټولګي زده کوونکى سعدالله وايي، چې د اونۍ له پيله د زده کړو جريان ټکنى شوى او ښوونکي ښوونځي ته نه ورځي.

غزني (پژواک ۳ غويى ۹۲): امنيتي چارواکي وايي، چې د غزني په ده يک ولسوالۍ کې د بهرنيو ځواکونو په هوايې بريد کې ۷ وسله وال طالبان وژل شوي او ۲ نور ټپيان دي. په غزني کې د ۲۰۳ تندر قول اردو د درېيمې لوا وياند نظيف الله سلطاني وايي، چې بريد نن غرمه د ناټو ځواکونو چورلکو ترسره کړى دى. نوموړي پژواک اژانس ته وويل، چې بريد د الوخېلو په سيمه کې شوى، خو ملکي خلکو ته په کې زيان نه دى رسېدلى. په دې ولسوالۍ کې دوه ورځې مخکې وسله والو د سيمه ييزو پوليسو پر يوې پوسته په بريد کې شپږ پوليس ووژل او د هغوى وسلې يې له ځان سره يوړې.

غزني ( پژواک ٣٠ ورى ٩٢) چارواکي وايي د غزني په اندړو ولسوالۍ کې د وسلوالو په غلچکي بريد کې ١٣ تنه پاڅون کوونکي وژل شوي دي. د اندړو ولسوال قاسم ديسوال وايي نن سهار وختي د ګنډير امنيتي پوستې ته وسلوال ور اوښتي او ټول يې په خوب کې وژلي دي. هغه پژواک خبري اژانس ته وويل، پاڅون کوونکو بې پروايي کړې ،پيره يې نه لرله ،مخالفينو له موکې په ګټه اخيستنې دغه بريد ترسره کړى دى. د ديسوال په خبره وسلوالو د دى ټولې وسلې او يو موټر هم له ځانه سره وړي دي. د اندړو ولسوالي له مرکزه ٣٠ کيلومتره لرې سويل ته پرته ده،چې تېر کال په غبرګولې کې د وسلوالو خلاف پاڅون وشو او له هغه وروسته په کې نسبي امنيت راغى.

غزني ښار (پژواک ٢٧ کب ٩١): چارواکي وايي، چې تېره شپه په غزني ښار کې څلور کسان په مرموز ډول وژل شوي دي. د غزني د والي وياند فضل سباوون د کب په ٢٧مه پژواک خبري اژانس ته وويل، چې دا پېښه تېره شپه د غزني ښار اړوند د زرګرو په سيمه کې رامنځته شوې ده. هغه زياته کړه، چې ناپېژانده کسانو په دې سيمه کې څلور تنه وژلي، مړي يې په سيمه کې پرېيښي او په خپله تښتېدلي دي. د نوموړي په وينا، وژل شوي د شمالي ولايتونو اوسېدونکي دي او پوليسو يې په اړه پلټنې پيل کړې دي. خو سباوون وويل، دا تر اوسه نه ده معلومه، چې دغه کسان د چا له خوا او د څه لپاره وژل شوي دي.

غزني ښار (پژواک ۲۱ سلواغه ۹۱): د غزني د ملکي روغتون مسوولين وايي، چې دوى ته د شپې ناوخته د يوې مېرمنې مړى ور وړل شوى، چې پر ډزو ويشتل شوې وه. د غزني د ملکي روغتون مشر ډاکټر بازمحمد همت د سلواغې په ٢١مه پژواک اژانس ته وويل، چې تېره شپه ناوخته يې روغتون ته د يوې مېرمنې مړى، چې د سر په برخه کې څو مرمۍ لګېدلې وه، ور وړل شوى و. د هغه په وينا، دغه مېرمن د غزني ښار د ګنج له سيمې څخه ور وړل شوې وه او تر اوسه روښانه نه ده، چې چا وژلې ده. د ګنج سيمې يوه اوسېدونکي محمداکبر هم پژواک اژانس ته وويل، چې په دې سيمه کې تېره شپه د ډوډۍ خوړلو پر مهال يوه مېرمن پر ډزو ووژل شوه.

غزني (پژواک، د غويي لومړۍ نېټه ٩٢): چارواکي وايي، د غزني په ده يک ولسوالۍ کې د يوې دسيسې له مخې شپږ سيمه ييز پوليس وژل شوي دي. د ده يک ولسوال حاجي فضل احمد د غويي په لومړۍ نېټه پژواک اژانس ته وويل، دغه کسان نن سهار وختي د تاسن په کلي کې د خپل ملګري عبدالرازق له لوري وژل شوي دي. هغه زياته کړه، چې په دې پېښه کې يو تن ټپي شوى هم دى او بل يې ژوندى له ځان سره وړى دى. ولسوال د غويي په لومړۍ پژواک اژانس ته وويل ، عبدالرازق له وسله والو سره اړيکې لرلې او د خپلو ملګرو تر وژل کېدو وروسته طالبانو ته تښتېدلى. د نوموړي په خبره، د وژل شوو پوليسو وسلې بريد کوونکي له ځان سره وړې دي.