سرغړونې

کابل (پژواک ١٩ ورى ٩٣): د ټاکنيزو شکايتونو کمېسيون د ټاکنو د درغليو په اړه د ٣١٠٣ کتبي او ټيلېفوني شکايتونو له ثبتولو خبر ورکړى او وايي، چې دغو شکايتونو ته لاسرسى د ټاکنو پر لومړيو پايلو اغېز درلودلى شي.
د ياد کمېسيون منشي او وياند نادر محسني نن په کابل کې د يوې خبري ناستې په ترڅ کې په داسې حال کې چې د وري مياشتې د شپاړسمې په ټاکنو کې يې لاسوهنه ومنله، زياته کړه چې د ټاکنو د ورځې په پرتله د شکايتونو د ثبت لړۍ تېره شپه ١٢ بجې پاى ته ورسېده او له دې وروسته به په دې اړه کوم شکايتونه ثبت نه کړي.

کابل (پژواک ١٨ ورى ٩٣): د ټاکنيزو شکايتونو کمېسيون د ولسمشرۍ نوماندانو ته د ټاکنيزو شکايتونو د څېړنې ډاډ ورکړ، خو ګواښ يې وکړ چې هېڅ نوماند ته به اجازه ورنه کړي چې په تقلب سره بريالى شي.
د شکايتونو کمېسيون نن په کابل کې د ولسمشرۍ د نوماندانو له مرستيالانو سره ناسته درلوده او مرستيالو نوماندانو خپل شکايتونه له کمېسيون سره شريک کړل.

خوست ښار ( پژواک ، ۱۷ وری ۹۳ ) : په خوست ولایت کې د ولسمشرۍ د کاندید ډاکټر زلمي رسول د کمپاین غړو د رایو شمیرلو پر مرکز برید کړي ، د رایو پنځه صندوقونه یې مات او د اشرف غني رایې یې ترې ویستي دي.
په دې ولایت کې د ولسمشرۍ د کاندید ډاکټر اشرف غني د کمپاین یو تن غړي کرامت خان خپلواک د وري په ۱۷مه، پژواک خبري اژانس ته وویل چې نن له ماښام وروسته د ولسمشرۍ د بل کاندید ډاکټر زلمي رسول د کمپاین مسوول سناتور عارف الله پښتون د رایو د شمېرلو مرکز ته په غیر قانوني توګه ورغلی و.

شبرغان-باميان (پژواک ١٦ ورى ٩٣): په جوزجان کې د رايې ورکونې د يوه مرکز پر دېوالونو د ولسمشرۍ لپاره د يو شمېر کانديدانو عکسونه تر سترګو کېږي او دغه راز چارواکو په باميانو کې له ښځو څخه د هغوى له لوري د يوه کانديد راوړل شوي عسکونه څيري کړي دي.
د جوزجان د مرکز په ابن يمين لېسه کې، د رايې ورکونې په يوه مرکز کې د جنرال دوستم او د ولايتي شورا د کانديدانو، عبدالحي حيات، محرمه ايوبي، مولوي محمد نذير او ډاکټر ميرويس عکسونه تر سترګو کېږي.

کابل (پژواک ١٣ ورى ٩٣): کابل ښاروالي وايي، چې د ولسمشرۍ پنځه کانديدان پر پايو او خوازو د خپلو تبليغاتي پاڼو د لګولو له اړخه له درې ميليونه افغانيو زيات پوروړي دي.
ډاکتر اشرف غني احمدزى، استاد عبدرب الرسول سياف، انجنيرقطب الدين هلال، ډاکتر زلمى رسول او ډاکتر عبدالله عبدالله د ولسمشرۍ هغه پنځه کانديدان دي، چې د کابل ښاروالۍ د چارواکو په وينا، تر اوسه يې په پل ساينونو د لګېدلو تصويرونو او پر خوازو د نورو تبليغاتي پوسټرونو پيسې دې ادارې ته نه دې ورکړې.
له دې ډلې يواځې زلمي رسول د پل ساينونو د يوې مياشتې ماليه ښاروالۍ ته ورکړې ده.

کابل (پژواک ١٢ ورى ٩٣): د ټاکنيزو شکايتونو کمېسيون په يوه ډاګيزه غونډه کې د ولسمشرۍ دوه کانديدان زلمى رسول او ګل اغا شېرزى په ټاکنيزو مبارزو کې د سرغړونو له امله پر نغذي جريمه محکوم کړل او د دې ترڅنګ يې د پکتيا د والي او کندهار د امنيه قوماندان د لرې کولو غوښتنه وکړه.
دغه کمېسيون نن د ولسمشرۍ کانديدانو پر وړاندې ١٠ شکايتونه په يوه ډاګيزه غونډه کې وڅېړل.
د ټاکنيزو شکايتونو کمېسيون رييس عبدالستار سعادت وويل، چې درى مورده د دولتي امکاناتو د کارونې او د زلمي رسول لپاره د دولتي چارواکو د کمپاين په برخه کې درج شوي دي.

چغچران (پژواک ١١ ورى ٩٣): د غور ولايت ځينې کسان وايي، چې غير قانوني وسله وال قوماندانان له دوى څخه په زور او ګواښ د رايې ورکونې کارتونه ټولوي، خو سيمه ييز چارواکي بيا له سرغړوونکو او زورواکو سره د سخت چلند ډاډ ورکوي.
دغه اوسېدونکي وايي، چې ملا مصطفى په شهرک ولسوالۍ او ملا فضل الاحد په ډولينه ولسوالۍ کې خلک ګواښي، ترڅو د ولسمشرۍ او ولايتي شوراګانو لپاره د دوى د خوښې وړ کانديدانو ته رايه ورکړي، له هغه پرته به له ناوړه پايلو سره مخ شي.

کابل (پژواک ١١ ورى ٩٣): د کورنيو چارو وزارت د ټاکنو په پروسه کې د ملي پوليسو پر بې پلوۍ د ټينګار تر څنګ په ټاکنيزو منډو ترړو کې د لاسوهنې له امله د درېيو لوړ پوړو پوليس افسرانو د دندو د ځنډولو خبر ورکړى دى.
د دغه وزارت وياند صديق صديقي نن په يوه خبري ناسته کې وويل، چې د دغه وزارت د احتياط د افسر ډګر جنرال ميرزا محمد يارمند دنده، د ټاکنو په روانه لړۍ کې د ډاکټر عبدالله عبدالله ټېم د شکايت له مخې ځنډول شوې ده.
سرچينې وويل، د دغه ټاکنيز ټېم په کتبي شکايت پاڼه کې ويل شوي، چې جنرال يارمحمد په بدخشان کې د يوه ځانګړي کانديد په ګټه کار کوي.

شماره مسلسل : ۰۰۱۶ issue no : 0016
دهلمندمدني ټولنه به راوانی ټاکني په کلکه وڅاری ترڅو ددرغلیو(تقلب) مخه ونیول سی
دهلمند مدني ټولنه ویره لری چی دهلمند په شمالی ولسوالیو کی په سلو کی به لس تنه درایی ورکونی په پروسه کی ګډون وکړی خو نورصندوقونه ښایی ددرغلیو لمخی ډک کړای سی .