سرغړونې

 
کابل (پژواک ١٠ ورى ٩٣): د ټاکنيزو شکايتونو کمېسيون د شکايتونو وروستۍ شمېرې له درېيو زرو څخه ډېرې اعلان کړې او وايي، چې له دوه سوه څخه زياتې حقوقي ادعاوې، سوداګريز مسايل او جرمي موارد، چې د کمېسيون له واکونو څخه شمېرل کېدل، څارنوالۍ ته استولي دي.
د ټاکنيزو شکايتونو د خپلواک کمېسيون چارواکو نن د معلوماتو ورکولو په ناسته کې وويل، چې د کانديدانو په اړه يې په دوو کټګوريو کې ټول ٣٠٠٤ شکايتونه څېړلي، چې له دې ډلې يې ٧٩٢ پېښې ثبت شوي او نورو ٢٢١٢ شکايتونو ته لاسرسى شوى دى.

 
کندهار (پژواک ٥ ورى ٩٢): په کندهار ولايت کې د  ټاکنيزو شکايتونو د کمېسيون چارواکي وايي، چې په دغه ولايت کې د کار له پيل راهيسې ورته د ولايتي شورا د کانديدانو په اړه شاوخوا ٣٠ شکايتونه شوي دي.
د ټاکنيزو شکايتونو د کمېسيون مشر مړوند وزيري د وري  په ٥مه پژواک خبري اژانس ته وويل، چې دغه شکايتونه په ټوليزه توګه يواځې د ولايتي شورا د کانديدانو په اړه دي، خو د ولسمشرۍ د کانديدانو په هکله ورته تر اوسه کوم شکايت نه دى ثبت شوى.

 
کابل (پژواک ٢٢ کب ٩٢): د فيفا د څارنې راپور څرګندوي، چې د ولسمشرۍ کانديدانو د ١٢٣ پروګرامونو د کمپاينونو پر مهال د سرغړونې ٢٦ پېښې تر سترګو شوي او په ځينو ولايتونو کې نا امني او د هوا حالات د کمپاينونو پر وړاندې عمده ستونزې دي.
 دغه راپور د هېواد په ٣٤ ولايتونو کې د سلواغې له ١٣ څخه د کب تر ١٣ پورې د افغانستان د ازادو او عادلانه ټاکنو د شا وخوا ٢٠٠ څارونکو له لوري چمتو شوى دى.
 د فيفا اجرائيوي مشر جانداد سپين غر وايي، چې د دوى د څارونکې ډلې څارونکو په ٣٤ ولايتونو کې له ١٢٣ غونډو، لاريونونو او ناستو څخه څار کړى دى، خو په ٢٦ برخو کې يې سرغړونې تر سترګو شوې دي.

 
ګردېز ( پژواک، ١٧ کب ٩٢ ) : په پکتيا د ولسمشرۍ د يو شمېر کانديدانو استازو د دې ولايت په والي جمعه خان همدرد نيوکه وکړه ، چې له خپل موقف او  دولتي امکاناتو ناوړه ګټه پورته کوي او د يو مشخص کانديد زلمي رسول په ګټه يې کاروي.
په دغه خبرې غونډه کې چې نن د کب په ١٧مه، په  ګردېز ښار کې جوړه شوې وه ، د ډاکټر اشرف غني احمدزي، ډاکټر عبدالله عبدالله ، عبدرب الرسول سياف ،قطب الدين هلال او د ولايتي شورا يو شمېراستازو او د دې ولايت قومي مخورواوځوانانو پکې  برخه اخيستې وه.