سرغړونې

 
جلال اباد ( پژواک، ٢١ ورى ٩٣): د نورستان د ولايتي شورا يو شمېر کانديدان ادعا کوي، چې په ټاکنو کې د ټاکنو دکمېسيون او سيمه ييزو چارواکو په لاس وهنه په پراخه کچه درغلۍ شوې دي.دغه کانديدان ، چې شمېر يې اتو تنو ته رسېده او د احتجاج په توګه جلال اباد ښار ته راغلي وو، دغه څرګندونې د وري په ٢١مه، خبريالانو ته وکړې.
دوی ويل، د ټاکنو په ورځ د نورستان په هغو سيمو کې چې ټاکل شوې وه انتخاباتي مرکزونه پرانيستل  شي ، جګړې پيل شوې او د رايو صندقونه په کورونوکې ډک شول.
دوی د ټاکنيزو شکايتونو کمېسيون څخه غوښتنه وکړه، چې په نورستان کې پاکې رايې له ناپاکو جلا کړي.

 
کابل ( پژواک، ٢١ ورى ٩٣ ) : پژواک اژانس داسې انځورونه او ويډيوګانې ترلاسه کړي، چې پکې د  ټاکنو لسګونه د رايو پاڼې سوځول شوي او يا هم بې ځايه غورځول شوې دي.
د ولسمشرۍ او ولايتي شوراګانو ټاکنې د ١٣٩٣ لمريزکال د وري په ١٦مه، په ټول هېواد کې ترسره شوې.
د ټاکنيزو شکايتونو د خپلواک کمېسيون مشر ستار سعادت پرون په کابل کې ديوې خبري غونډې پر مهال په ډاګه کړه، چې تر اوسه ددغو شکايتونو په اړه ورته څه دپاسه درې زره شکايتونه شوي دي.
هغه زياته کړه، چې په دې ټاکنو کې پراخه درغلي او ناقانونه کړنې شوې دي.

 
کابل (پژواک ٢٠ ورى ٩٣): د ټاکنيزو کمېسيونونو چارواکي وايي چې په ټاکنو کې درغلۍ شوې خو دوى هڅه کوي، پايلې يې د خلکو د اصلي رايو له مخې اعلان کړي.
د ولسمشرۍ او ولايتي شوراګانو ټاکنې د وري په ١٦مه ترسره شوې.
د ټاکنو د خپلواک کمېسيون مشر احمديوسف نورستاني نن په کابل کې خبريالانو ته وويل، چې خلکو په ټاکنو کې په خپلې پراخې ونډې سره وښوده چې له ګواښونو نه وېريږي او خپل برخليک په خپله ټاکي.
دى وايي، په ټاکنو کې درغلۍ شوې دي او که د دغه کمېسيون کارکوونکي په درغليو کې لاس ولري، نو څارنوالۍ ته به يې معرفي کړي.

 
کابل (پژواک ١٩ ورى ٩٣): د کورنيو چارو وزارت وايي، چې که  د دغه وزارت د چارواکو په اړه په ټاکنو کې د لاسوهنې شواهد تر لاسه کړي ، نو په کلکه به يې وڅېړي او له سرغړونکو سره به قانوني چلند وشي.
دا په داسې حال کې ده، چې د ولسمشرۍ د کانديدانو يو شمېر مرستيالانو ويلي وو، چې ځينې پوليس د ټاکنو په درغليو کې لاس لري.
د کورنيو چارو وزارت وياند صديق صديقي نن کابل کې په يوه خبري ناسته کې وويل، چې تر دې مهاله يې په ټاکنو کې د لاسوهنې په شک پنځلس پوليس نيولي او د ټاکنو په پروسه کې د لاسوهنې په تور له ټولو نيول شويو کسانو سره به قانوني چلند وکړي.