سرغړونې

جلال اباد (پژواک ٣ کب ٩٢): د ننګرهار د ښځو چارو رييسه انيسې عمراني د ولسمشرۍ د نوماند ډاکتر محمداشرف غني په کمپاينيزه غونډه کې ګډون کړى دى.
د ټاکنو د قانون له مخې، هېڅ دولتي چارواکى نه شي کولى چې له دولتي موقف څخه د کوم نوماند په ګټه کار واخلي او په کمپايني غونډو کې يې ګډون وکړي.
د ننګرهار د ښځو چارو رييسه پرون د کب په ٢مه په کونړ کې د ولسمشرۍ د کانديد ډاکتر محمد اشرف غني د ولايتي دفتر د پرانيستې په مراسمو کې ونډه اخيستې وه.

کابل (پژواک٢٦سلواغه٩٢): د ټاکنيزو شکايتونو کمېسيون د ولسمشرۍ د څلورو کانديدانو عبدالرحيم وردګ، داوود سلطان زوى، عبدرب الرسول سياف او اشرف غني احمدزي په اړه شوي شکايتونه په علني ډول وڅېړل او په اړه يې خپله پرېکړه وکړه.
دې کمېسيون ډاکټر اشرف غني احمدزى له دولتي امکاناتو څخه د ګټه اخستو له امله په ټاکنيزې تخطۍ تورن کړ او د ټاکنو د قانون د ٦٩ مادې له مخې يې ٥٠ زره افغانۍ جريمه کړ.

کابل (پژواک١٤مرغومى٩٢): د ټاکنيزو شکايتونو کميسيون د ولسمشرۍ کانديدانو ته يو ځل بيا خبردارى ورکړ، ترڅو له هغو فعاليتونو ډډه وکړي چې ټاکنيز کمپاين بلل کېږي.
د دې کميسيون چارواکي وايي، تر دې وړاندې يې هم دوه ځله په رسمي ډول د ولسمشرۍ او همداراز د ولايتي شوراګانو له کانديدانو د له وخته مخکې ټاکنيز فعاليتونو د نه ترسره کولو غوښتنه کړې وه.
د ټاکنيزو شکايتونو کميسيون منشي او وياند محمد نادر محسني د مرغومي په ١٤مه، په خبري ناسته کې وويل، دوى ته معلومات رسېدلي، چې د ولسمشرۍ يو شمېر کانديدانو له وخته مخکې پر داسې فعاليتونو لاس پورې کړى، چې ټاکنيز کمپاين بلل کېږي.

کابل (پژواک ٤ مرغومى ٩٢): د ټاکنيزو شکايتونو کميسيون، ځينې داخلي رسنۍ د ټاکنو له قانون څخه پر سرغړونه تورنوي او ګواښ کوي، چې که ځينې رسنۍ د کانديدانو له کمپاين څخه تر پيلېدو وړاندې، د هغوى د فعاليتونو په اړه خپل تبليغات ونه دروي نو له قانوني چلند سره به مخ شي.
دغه څرګندونې د ياد کميسيون وياند او منشي نادر محسني، نن په کابل کې په يوه خبري ناسته کې وکړې او زياته يې کړه، چې په ځينو رسنيو کې داسې پروګرامونه تر سره کېږي، چې هغو ته د کمپاين او يا ټاکنيزو مبارزو نوم ورکولى شو.

کابل( پژواک، ١٠ لړم ٩٢): تر ټاکل شوې مودې مخکې او د ولسمشرۍ او ولايتي شوراګانو د وروستي ليست تر اعلانيدو مخکې د احتمالي نوماندانو هر ډول انتخاباتي مبارزه د ټاکنو له قانونه سرغړونه ګڼل کيږي.
د ټاکنو قانون د وروستي ليست تر خپريدو وروسته، د ولسمشرۍ نوماندانو ته ٦٠ او د ولايتي شوراګانو نوماندانو ته ٣٠ ورځې د ټاکنيز کمپاين وخت ټاکلى، په همدې اساس د ولسمشرۍ نوماندانو ته د روان کال د سلواغې له ١٣مې د ١٣٩٣ کال د وري تر ١٣مې او د ولايتي شورا لپاره د د روان کال دکب له ١٣مې د را روان کال د وري تر ١٣مي د کمپاين موده ټاکلې ده.

کابل (پژواک، د لړم لومړۍ نېټه ٩٢): د ولسمشرۍ د کانديد سردار نادر نعيم دويم مرستيال عزيز الله پويا د غزني ولايتي شورا ته هم کانديد دى.
عزيزالله پويا چې د غزني د ولايتي شورا رييس و، تېره مياشت له دې امله استعفى ورکړه، چې د ولسمشرۍ د کانديد سردار نادر نعيم د دويم مرستيال په توګه وټاکل شو.
د ټاکنو خپلواک کمېسيون په وېبپاڼه کې داړوندو ولايتونو د ولايتي شورا ګانو په خپاره شوو لېستونو کې د غزني ولايت په نوملړ کې د عزيزالله پويا نوم هم د منارې له انتخاباتي نښې سره يو ځاى خپور شوى دى.

کابل ( پژواک ١٩ تله ٩٢):د افغانستان د ټاکنيزو شکايتونو د ارزونې خپلواک کمېسيون وايي،چې د راتلونکو ټاکنو له کانديدانو نږدې لس شکايتونه ورته رسېدلي دي.
د ټاکنیزو شکایتونو د خپلواک کمېسیون منشي او ویندوی نادر محسني د شکايتونو په اړه د نورو جزيياتو له ورکولو پرته وايي،چې دغه شکايتونه د هېواد له بېلابېلو برخو دوى ته رسېدلي دي.
د ده په وينا، که چېرې د شته اسنادو له مخې ثابته شي ، چې کوم کاندید د کاندیدۍ پر شرایطو سم نه دی، نوم به یې د کاندیدانو له نوملړه وایستل شي.

کابل (پژواک ٩ غبرګولى ٩٢): ځينې خلک وايي، چې وسله وال طالبان د شبرغان- قوش تپې پر لويه لاره عام خلک له موټرو ښکته کوي؛ د هغوى تذکرې او د ټاکنو کارتونه څيروي او ګواښ ورته کوي، چې په ټاکنو کې د ګډون پر مهال به يې ووژني.
طالبانو د لارې بندول منلي، خو وايي، چې دوى هيڅلکه هم د خلکو تذکرې او د هغوى د ټاکنو کارتونه نه دي څيرې کړي.

کابل (پژواک ١٠ غويى ٩٢): د مشرانو جرګې ځينې غړي وايي، ولسمشر حامد کرزى بايد له "سى اى اې" څخه د پيسو اخيستو په اړه ملي شورا او خلکو ته معلومات ورکړي.
د مشرانو جرګې يو شمېر غړي دغه څرګندونې د نيويارک ټايمز د هغه راپور تر څپرېدو وروسته کوي، چې د امريکا استخباراتي ادارې"سى اى اې" د ولسمشر کرزي دفتر ته په تېرو لسو کلونو کې ميليونونه ډالر ورکړي دي.
حامد کرزي په دې اړه پرون په فنلنډ کې د يوې خبري غونډې پر مهال ويلي، چې د افغانستان له ملي امنيت شورا سره امريکا مرستې کړې، خو دومره نه دي، لکه څومره چې نيويارک ټايمز په خپل راپور کې ويلي دي.

کابل (پژواک ٢٦ورى٩٢) : د ولسي جرګې يو غړى ادعا کوي ، چې د دې جرګې اتيا سلنه غړي په اداري فساد کې لاس لري او د وزيرانو د استيضاح په موضوع کې د ولسي جرګې اتيا تنه غړو بډې اخيستې دي.
تېرکال د سلواغې په لومړيو کې ولسي جرګې د ملي دفاع، کورنيو چارو، سوداګرۍ، اقتصاد، اوبو او برېښنا، پوهنې، ښاري پراختيا، کانونو، لوړو زده کړو، له نشه يي توکو سره د مبارزې او اطلاعاتو او فرهنګ وزارتونو د وزيرانو د استيضاح پرېکړه وکړه .