سرغړونې

 
ترينکوټ (پژواک، ٢٤ ورى ٩٣): د اروزګان د ټاکنيزو شکايتونو کمېسيون په ټاکنو کې د درغليو او سرغړونو په تور د ولايتي شورا د يوه کانديد په ګډون اووه کسان نغدي جريمه کړل.
بل خوا تورن کسان وايي، دوی بې ګناه دي او په خبره يې چې د ټاکنيزو شکايتونو کمېسيون ورسره ظلم کوي.
د دې ولايت د ټاکنيزو شکايتونو کمېسيون د تحليل او بررسۍ مدير نجم الدين لودين د وري په ٢٤مه، پژواک خبري اژانس ته وويل ، چې په اروزګان کې د ټاکنو په ورځ ټول ۲۱ شکايتونه ثبت شوي، چې اته يې د ولسمشرۍ د کانديدانو، ۷ يې د ولايتي شوراګانو د کانديدانو او پاتې ۶ شکايتونه خپله د ټاکنو کمېسيون له کارکوونکو څخه شوي دي.

 
ميدان ښار (پژواک ۲۴ ورى ۹۳): په ميدان وردګو کې د ټاکنو د خپلواک کمېسيون مسوول وايي ، چې په دغه ولايت کې سل زره رايې کارول شوې دي.
 په دغه ولايت کې د ټاکنو خپلواک کمېسيون رييس انجنير نورالله د وري په ۲۴مه پژواک خبري اژانس سره په خبرو کې وويل ، چې سل زرو کسانو د ولسمشرۍ او ولايتي شورا کانديدانو د وري د ١٦مې په ټاکنو کې رايې ورکړې دي.
هغه زياته کړه، چې له ټاکنو وروسته په دغه ولايت کې د شکايتونو خپلواک کمېسيون ته د اته دېرشو په شاوخوا کې شکايتونه رسېدلي دي.
د نوموړي په وينا، ښايي د شکايتونو د څېړلو په پاى کې د دغه ولايت شل زره رايې باطلې هم اعلان شي.

 
کابل (پژواک ٢٤ ورى ٩٣): د ټاکنيزو شکايتونو خپلواک کمېسيون اعلان وکړ، چې د مستندو شکايتونو له ډلې ٨٧٠ يې په لومړۍ کتګورۍ کې راځي، چې کولى شي د ټاکنو پر پايلو اغېز ولري.
د دغه کميسيون وياند نادر محسني نن يوې خبري غونډې ته وويل، چې تر اوسه د هېواد په کچه ٣٢٧٤ ټاکنيز شکايتونه ثبت شوي، چې له دې ډلې ١٨٩٢ موارد ليکلي او مستند او پاتې ١٣٨٢ نور ټيلېفوني دي.
هغه زياته کړه، چې د کمېسيون د کړنلارې پر بنسټ د ليکلو شکايتونو له ډلې ٨٧٠ يې هغه دي، چې د الف ګټګورۍ کې راځي او د ټاکنو پر پايلو اغېز لري.

 
لښکرګاه (پژواک ۲۳ وری ۹۳): په هلمند ولايت کې مدني ټولنې وايي، چې په ټاکنو کې د درغليو هڅې به د هېواد حالات د بحران لوري ته بوځي.
دوى د ټاکنو له خپلواکو کمېسيونونو وغوښتل ، چې د وري د ١٦مې ټاکنو پايلې دې په شفاف ډول اعلان کړي او له معاملو دې ډډه وکړي.
دغه څرګندونې په هلمند کې بېلابېلو مدني بنسټونو، ژونالېستانو او د پوهنتونونو استادانو د وري په ٢٣مه په همدې موخه په يوې جوړې شوې غونډې کې وکړې.