سرغړونې

کابل(پژواک، ٢ غويى ٩٣): د ولسمشرۍ کانديدان د ټاکنو د څېړنې په برخه کې د کمېسيونونو پر بې طرفۍ ټينګارکوي او وايي، چې پاکې رايې بايد له ناپاکو بېلې شي او هغه کسان چې تقلب يې کړى، بايد تر پېژندلو وروسته قانون ته وسپارل شي.
هغه ناسته، چې نن په کابل کې د ټاکنو پروسې د ټينګښت لپاره د افغانستان د مدني بنسټونو شبکې (ACSEN) له خوا په کابل کې تر سره شوه، د رايو د شمېر پر څرنګوالي، د ټاکنو څارنه او روڼتيا او همدارنګه په ټاکنو کې د رسنيو د رول په اړه خبرې وشوې.

مزارشريف (پژواک ٣١ ورى ٩٣): د بلخ د ټاکنيزو شکايتو د خپلواک کمېسيون مسوولين وايي، چې په دغه ولايت کې له تېرې ورځې د ټاکنو اړوند د شکايتونو دوسيې بندې شوې او د اسناد لرونکو شکايتونو پر بنسټ يې د ۲۶ مرکزونو د قرنطين وړانديز مرکز ته کړی دی.
دوی وايي، چې په بلخ د ټاکنو کمېسيون د مرکزي دفتر له خوا د وري د ١٦مې د ټاکنو د ۱۷ مرکزونو، چې ۸۳ صندوقونه کېږي، د بيا کتنې او شمېرنې لړۍ روانه ده، چې تر دې دمه يې ۵۰ صندوقونه کتل شوي دي.

فراه (پژواک ٣١ ورى ۹۳): فراه کې دوه امنيتي چارواکي او د ټاکنو د خپلواک کمېسيون شپږ ساحوي ناظمان (DFC)په ټاکنو کې د درغلۍ او سرغړونې له امله نغدي جریمه شول.
دا څرګندونې په فراه کې د ټاکنیزو شکایتونو د کمېسيون مشر ډاکتر علي احمد نهضت یار، پژواک خبری اژانس ته وکړې.
هغه وويل چې په يادو کسانو کې د دغه ولايت د خاکسفيد او پشت کوه ولسواليو امنيه قوماندانان او په دې ولسواليو او د فراه په مرکز کې توظيف شوي شپږ د ټاکنو د خپلواک کمېسيون ساحوي ناظمان شامل دي.

کندوز (پژواک ٣١ ورى ٩٣): د کندوز د ټاکنيزو شکايتونو ولايتي کمېسيون د رايې ورکونې د ٩٢ صندوقونو له قرنطين او د ولايتي شوراګانو د دوو کانديدانو او د ټاکنو کمېسيون د نهو کارکوونکو له نغدي جريمې خبر ورکړى دى.
د کندوز د ټاکنيزو شکايتونو کمېسيون مشر صبغت الله وفايي وايي، چې دغه صندوقونه د ياد ولايت په مرکز او د پنځو ولسواليو په مرکزونو پورې اړوند دي، چې ټول يې د ولسمشرۍ نوماندانو پورې تړاو لري.

زرنج (پژواک ٣١ ورى ٩٣): د نيمروز د ټاکنيزو شکايتونو ولايتي دفتر وايي، چې په دغه ولايت کې يې د رايې ورکونې د ١٧ محلونو او ١٨ مرکزونو رايې قرنطين کړې دي.
د دغه ولايت د ټاکنيزو شکايتونو کمېسيون مشر ډاکټر عبدالرازق سيفي نن پژواک خبري اژانس ته وويل، چې د شکايتونو د نېټې له پيل څخه يې تر دې دمه ٤٢ شکايتونه ثبت کړي، چې له دې ډلې ٢٨ موارد په لومړۍ کټګورۍ کې ځاى لري.
هغه وويل، چې د لومړۍ کټګورۍ له ٢٨ مواردو څخه يې ٨ شکايتونه د ولسمشرۍ کانديدانو او پاتې ٢٠ نور يې د ولايتي شوراګانو د نوماندانو په اړه دي.

کندهار ( پژواک، ٣٠ ورى ٩٣ ) : د ولسمشرۍ کانديد ګل اغا شېرزي د سوېلي زون د ولايتونو د قومي مشرانو په يوه غونډه کې وويل، چې د نامشروع ټاکنو په پايله کې د نامشروع ولسمشر رامنځته کېدل پر ملي حاکميت تېرى دى.
دا غونډه چې د وري په ٣٠مه، د کندهار ښار په تاج محل سالون کې جوړه شوې وه، د کندهار، هلمند، اروزګان، زابل، نيمروز، فراه او يو شمېر نورو ولايتونو زرګونو اوسېدونکو او قومي مشرانو ګډون کړى و.
ګل اغا شېرزي دغې غونډې ته وويل، چې د وري په ١٦مه ولس هر راز امنيتي ګواښونه، تهديدونه پر ځان ومنل او د صندوقونو پر لور ولاړل او خپلې رايې وکارولې.

نيلي (پژوا ٢٨ ورى ٩٣): د دايکنډي د ولايتي شورا يو نوماند د ټاکنو خپلواک کميسيون د پاڼو د تقلب او درغلۍ په سبب پنځوس زره افغانۍ نغدي جريمه شو.
د دغه ولايت د ټاکنيزو شکايتونو کمېسيون وياند او کمېشنر ميرحسين نظري وويل، چې د ولايتي شورا نوماند محمدظاهر ابراهيمي د ټاکنو کميسيون په پاڼو کې د جعل له امله، چې د خپلو ټاکنيو سيالانو نومونه يې له لړليکه په سپينوونکې ماده لري کړي او بيا کافي کړي وو، د شکايتونو کميسيون له خوا پنځوس زره افغانۍ نغذي جريمه شو.

مزارشريف ( پژواک، ٢٦ ورى ٩٣ ) : د بلخ ولايت د ټاکنو کمېسيون مسوولين وايي، چې د دغه ولايت په ټاکنو کې زورواکو لاسوهنه کړې، ممکن د ځينو صندوقونو رايې باطلې اعلان شي.
له تېرې ورځې راهيسې په بلخ ولايت کې د ټاکنو او د ټاکنو د شکايتو د کمېسيونونو له خوا د قرنطين شويو صندوقونو د بيا شمېرنې لړۍ روانه ده.
د بلخ ولايت د ټاکنو د خپلواک کمېسيون مشر عزت ارمان د وري په ۲۶مه، پژواک خبري اژانس ته وويل، چې په بلخ کې هم ټاکنې د زورواکو او له ټاکنو څخه د ناوړه ګټې اخيستونکو له شره په امان نه وې.

محمودراقي (پژواک ٢٦ ورى ٩٣): د کاپيسا د ټاکنيزو شکايتونو کمېسيون، د نن او پرون ورځو په علني ناستو کې د ټاکنو په اړه ٤٤ ثبت شوي شکايتونه څېړلي دي.
د ټاکنيزو شکايتونو کميشنر قدرت الله جاويد پژواک خبري اژانس ته وويل، چې په يادو څېړنو کې د تګاب ولسوالۍ، د جويبار د رايې ورکولو د دوه مرکزونو رايې باطلې شوې دي.
هغه زياته کړه، چې دغه کمېسيون همدارنګه د تګاب ولسوالۍ په جالوخېلو مرکز کې د ولايتي شورا د دوو غړو رايې، چې پر وړاندې يې مستند شکايتونو شتون درلود، د رايې ورکولو صندوقونو له څېړلو وروسته باطلې کړې دي.

کابل (پژواک، ٢٦ ورى ٩٣): "پيوستون د بدلون لپاره" شبکه د تقلب پلان شوې پېښې، په تقلب کې د ټاکنيز کمېسيون د ځينو کارکوونکو ښکېلتيا، د راى پاڼو کمښت، په ځينو محلونو کې څارونکو ته د ورتګ اجازه نه ورکول او نور د ټاکنو د ورځې له جدي شکايتونو څخه وبلل.
دا ټولنيزه شبکه، چې په ١٣٨٩ لمريز کال په کابل کې جوړه شوې، له اړوندو مراجعو يې غوښتنه وکړه، چې ثبت شوي شکايتونه وڅېړي.