VOTER VOICES & DEMANDS

پلخمرى (پژواک، ٥ سنبله ٩٢) : د بغلان خلک نسبت مخکينيو کلونو ته بېلاببلې اندېښنې لري،په دې ولايت کې له روان امنيتي وضعيت څخه چندان راضي نه ښکاري او هغه د راتلونکو ټاکنو مخې ته خنډ بولي.
بغلان د هېواد په شمال کې يو له کليدي ولايتونو څخه شميرل کيږي ، چې اته شمالي ولايتونه له کابل سره نښلوي. مرکزي بغلان ولسوالۍ له لومړۍ درجې ولسواليو څخه ګڼل کيږي، خو ددې ولايت له نا امنو ولسواليو څخه ده. وسله وال مخالفين له دې ولسوالۍ څخه د اصلي اډې په توګه استفاده کوي او کوښښ کوي چې له دې ځايه نورې ولسوالۍ ناامنه کړي.

پلخمرى (پژواک ، ٢وږى ٩٢(: د بغلان خلک د نورو غوښتنو تر څنګ، تر هر څه د مخه د بېلابېلو قومونو تر منځ د ملي يووالي غوښتونکي دي او دوى د پرمختګ او پراختيا يواځينۍ لاره ددغو قومونو يووالى ګڼي.
د بغلان يو عالم مولوي محمد امان وايي په دې ولايت کې تر ټولو عمده مشکل، د قومونو تر منځ د ملي يووالي پيکه توب او لږکيو ته امتياز نه ورکول دي.

پروان ولايت د هېواد د پلازمېنې کابل شمال ته په ٦٠ کيلو مترۍ کې واقع دى، له کاپيسا، بغلان، پنجشېر ، ميدان وردګ، کابل او باميان ولايتونو سره ګډه په لري، دغه ولايت د مرکز په ګډون ١٠ اداري واحدونه لري.
په دې راپور کې ددې ولايت د يو شمېر خلکو نظرونه اخيستل شوي، چې په لاندې ډول دي.
دولتي مامور : پر ټاکنو مې باور له منځه تللى دى.

چاريکار ( پژواک ٢٣ چنګاښ ٩٢ ) : د پروان ولايت اوسېدونکو د کرنې او پوهنې په برخو کې د ستونزو ترڅنګ له وسله والو غلو او ناقانونه وسله والو ډلو څخه هم شکايت کوي.
ددې ولايت د بګرام ولسوالۍ د قلندر خېل سيمې اوسېدونکى محمد شفيق مشفق وايي، چې بې کاري، نا امني او اداري فساد ددې ولايت له مهمو ستونزو څخه دي.
هغه پژواک اژانس ته وويل، چې دغه ستونزې له تېرو لسو کلونو راهيسې په دې ولايت کې شته، خو چارواکو يې په اړه تر اوسه هېڅ اقدام نه دى کړى.
د نوموړي په وينا، په دولتي ادارو کې دسم مديريت د نشتوالي له امله ددې پر ځاى ، چې ستونزې کمې شي، ورځ تر بلې زياتېږي .

چاريکار ( پژوک ٢٩ چنګاښ ٩٢ ) : د پروان ولايت ډېرى اوسېدونکي له حکومت څخه د کار زمينې برابرول، د غير مسوولو وسله والو بې وسلې کول او د اداري فساد پر ضد د کلکې مبارزې غوښتنه کوي.

ددغه ولايت د مرکز چاريکارو ښار يو تن اوسېدونکى عبدالصبور وايي، چې دولت بايد کار اهل د کار ته وسپاري، قانون پر ټولو سم پلى کړي او خلکو ته د کار زمينې برابرې کړي.

هغه پژواک اژانس ته وويل، ډېرى زده کوونکي او محصلين ، چې له زده کړو فارغ شي، نو کار ورته نه پيدا کېږي.

پکتيا دافغانستان پلازمېنې کابل سوېل ختيځ لوري ته پروت سرحدي ولايت دى، چې د مرکز په ګډون ١٤ اداري واحدونه لري.
ددې ولايت ولايتي شورا ددوو ښځو په ګډون ٩ غړي لري.
په دې راپور کې موږ ددې ولايت د بېلا بېلو قشرونو د يو شمېر خلکو نظرونه راټول کړي،چې په لاندې ډول خپرېږي.
دپکتيا ولايت اوسېدونکي دهيواد راتلونکي او په ځانګړې توګه د را روانو ټاکنو،سولې هڅو،دبهرنيو ځواکونو دوتلواو نورو موضوعاتو په اړه بېلابېلې څرګندونې لري .

ګردېز ( پژواک ٢٥ چنګاښ ٩٢ ) : د پکتيا اوسېدونکي په دې ولايت کې دنورو ستونزو ترڅنګ پنځه اساسي ستونزې لري ، چې له حل سره به يې خلکو ته اسانتيا رامنځته شي.
دوی وايي،چې د پکتيا دځنګلونو بيارغول،دلويو او وړو بندونو جوړول،د بريښنافعاليدل، دځوانانو بې کاري او روانې امنيتي ستونزې له منځه وړل يې مهمې ستونزې دي ، چې دوى يې حل غواړي.
د پکتيا د ولايتي شورا رييس ښايسته جان احدي پژواک خبري اژانس ته وويل، چې دنورو ستونزو ترڅنګ د پکتيا لپاره دبرېښنا فعاليدل مهمه خبره ده او دولت بايد په دې برخه کې جدی ګامونه واخلي .

ګردېز ( پژواک، ٨ زمرى ٩٢ ) : د پکتيا ولايت اوسېدونکي له دولت څخه د امنيت راوستلو ترڅنګ د ځنګلونو بيارغول، برېښنا، د بندونو جوړول او ځوانانو ته د کار پيدا کولو غوښتنې لري.
دغه راز ددوى يوه عمده او مهمه غوښتنه دې ولايت ته دلومړۍ درجې ارتقا ورکول دي.
د پکتيا د ولايتي شورا رييس ښايسته جان احدي پژواک خبري اژانس ته وويل، چې دولت د پکتياوالو د غوښتنو پر وړاندې د مور او ميرې چلند کوي او زياته يې کړه، چې د پکتيا خلک هم پر دولت اوس باور نه کوي او فاصله يې تر منځ زياته شوې ده.

باميان ( پژواک، ٢٧ چنګاښ ٩٢):د باميانو ډېرى اوسېدونکي د ١٣٩٣ لمريز کال په ټاکنو کې د ګډون لېوالتيا لري، خو يو کم شمېر نور بيا په تاکنو کې د شته درغليو له امله نه غواړي ،چې په ټاکنو کې ګډون وکړي .
يوه بله ستونزه چې ممکن د باميانو اسېدونکي په ټاکنو کې له برخه اخيستو را وګرځوي ، د رايې ورکونې د کارتونو نه شتون دى .
پژواک آژانس په دې اړه له ٢٥ ښځو او نارينوو سره مرکې وکړې ، يواځې دټولنې له منځني قشر څخه دوو کسانو يې وويل، چې دوى په راتلونکو ټاکنو کې ځکه ګډون نه کوي، چې ټاکنې رڼې نه دي ، درغلۍ په کې زياتې کېږي او ريښتيني وکيلان په کې نه کاميابېږي .

باميان(پژواک،٣١چنګاښ ٩٢): دبيارغونې دکارونو پيکه والى، بيکاري او د برېښنا، پخو سړکونو او روغتيايي اسانتياوو نه شتون ، د باميانو د خلکو له عمده ستونزو شمېرل کېږي .
له يکاولنګ ولسوالۍ پرته ددغه ولايت نورې ټولې ولسوالۍ دخامه سړکونو په وسيله له مرکز سره نښلول شوي او حتى ډېر داسې کلي شته ، چې لا تر اوسه سړک نه لري او د خپل ژوند وړ توګي په سنتي ډول د څارويو له لارې لېږدوي.
ددې ترڅنګ دباميانو ډېر ځوانان دکاردنشتوالي له امله بهرنيو هېوادونو ته ځي او کله کله بيا ځينې ځوانان له خپلو کورنيو سره يو ځاى له سيمې ګډه کوي .