ګوندونه

کابل (پژواک ١٩ غويى ٩٢): د حق او عدالت ګوندچارواکو د دوو افغان رسنيو هغه تورونه بې بنسټه وبلل، چې ګواکې د "انهم" په نوم يو بهرنى شرکت دغه ګوند ته پيسې ورکوي.
د دغه ګوند وياند حميدالله فاروقي نن په کابل کې په يوه خبري کنفرانس کې غوښتنه وکړه، چې د ويسا ورځپاڼې او د کابل نيوز تلويزيوني چينل له خوا د تور په اړه دې څېړنې وشي.
فاروقي وايي، چې دواړه رسنۍ بايد د خپلې ادعا د اثبات لپاره چې ګواکې دغه ګوند هره مياشت له يوه بهرني شرکت "انهم" شاوخوا ٦٠ زره ډالر ترلاسه کوي، اسناد او شواهد وړاندې کړي.

کابل (پژواک ١٨ غويى٩٢): د ملي امنيت عمومي رياست وايي، هغه کس يې نيولى چې د ملي ايتلاف پر مشر ډاکټر عبدالله عبدالله يې د ځانمرګي بريد هوډ درلود.
د ملي امنيت په خبرپاڼه کې راغلي: "د ملي امنيت عمومي رياست موظفينو په يوه ځانګري او پر ځاى اقدام کې د نظيف الله په نوم هغه ځانمرګى بريدګر، چې د طالبانو د کوېټې شورا له خوا د ملي ايتلاف مشر ډاکټر عبدالله عبدالله د وژلو په موخه رالېږل شوى و، نيولى دى."

کابل (پژواک ١٠ غويى ٩٢): د سياسي ګوندونو او اېتلافونو د همکارۍ شورا وايي، چې د ټاکنو کمېسيون د واکونو او تشکيلاتو قانون ولسمشر کرزى نه توشېح کوي او غواړي، چې دا ځل هم ټاکنې د تقنيني فرمان له مخې ترسره شي.

کابل ښار (پژواک ٣ غويى ٩٢): يو شمېر ګوندونه او کارپوهان وايي، چې د ولسي جرګې له خوا د ټاکنو په قانون کې د يوې نه لېږدېدونکې رايې سيستم پر ځاى بايد مختلط سيستم تاييد او په ټاکنو کې ګوندونو ته ډېره ونډه ورکړل شوې واى. ولسي جرګې تېره ورځ (د غويي ٢ مه) د ټاکنو قانون په مسوده کې د نه لېږدېدونکې يوې رايې ټاکنيز سيستم تاييد کړ او پرېکړه يې وکړه، چې رايې به د رايې ورکونې په مرکزونو کې شمېرل کېږي. د ټاکنو د قانون مسوده، چې په ١٧ فصلونو او ٦٧مادو کې جوړه شوې، حکومت تېر کال د لېندۍ په مياشت کې د تصويب په موخه ولسي جرګې ته استولې ده.

کابل (پژواک ٢٥ ورى ٩٢): باوري سرچينې وايي، چې د حزب اسلامي د بېلا بېلو ډلو ترمنځ د راتلونکو ولسمشريزو ټاکنو لپاره د متحد کېدو او د يوه کانديد وړاندې کولو په اړه خبرې روانې دي.
حزب اسلامي ، چې اصلي مشري يې د انجنير ګلبدين حکمتيار په غاړه وه، په دې وروستيو کې په څو ټوټو وېشل شوى ده، د انجنير حکمتيار په مشرۍ ډله يې ددولت او بهرنيو ځواکونو پر ضد پر وسلوالې مبارزې بوخته ده.
خو د افغانستان داقتصاد وزير عبدالهادي ارغنديوال او د ولسمشر د سلاکار وحيدالله سباوون په مشرۍ د حزب اسلامي دوه نورې ډلې له دولت سره يو ځاى دي او د خالد فاروقي په مشرۍ بله ډله يې هم په کابل کې فعاليت کوي.

جلال اباد (پژواک ٢٤ ورى ٩٢ ) : د افغان ملت ګوند مرکزي غړى او د سوداګرۍ وزير ډاکټر انوار الحق احدي وايي، چې په کابل کې يو شمېر کړيو د ولسمشريزو ټاکنو لپاره د ملي اجماع لپاره هلې ځلې پيل کړې دي.
ډاکټر احدي دغه څرګندونې پرون دوري په ٢٣مه، په جلال اباد ښار کې پژواک خبري اژانس سره ديوې ځانګړې مرکې پر مهال وکړې.
هغه زياته کړه ، چې د ملي اجماع د هلو ځلو په پايله کې ددې امکان ډېر دى ، چې په راتلونکو ولسمشريزو ټاکنو کې د کانديدانو شمېره کمه وي او په لوړو رايو يو کانديد د رياست جمهوري ټاکنې وګټي.

مزارشريف (پژواک، ١١ ورى ٩٢):د افغانستان ملي ايتلاف وايي، چې که حکومت د ټاکنو په قانون کې ديموکراتيک بدلون رانه وړي، نو راتلونکې ټولټاکنې به رڼې نه وي.
دغه خبرې په هغه کنفرانس کې وشوې، چې د افغانستان د مدنې ټولنو د مجتمع له خوا نن د وري په ۱۱مه، په مزارشريف ښار کې(د ۲۰۱۴ټولټاکنې او په افغانستان کې د ولسواکۍ راتلونکی) ترسرليک لاندې جوړ شوى و.
د مدنې ټولنو د مجتمع مسوول عزيز الله رفيعي پژواک خبري اژانس ته وويل، چې په دغه کنفرانس کې د ټاکنو امنيت، اقتصادي اړخ، په ټاکنو د سيمه ييزو سياستونو اغېز او په ټاکنو کې د رسنيو او مدني ټولنې پر رول خبرې وشوې.

کابل ( پژواک ٢٩ کب ٩١ ) : حزب اسلامي وايي، چې د راتلونکو ولسمشريزو ټولټاکنو په اړه د حزب وحدت له مشر کريم خليلي سره تفاهم ته رسېدلي او د رباني په مشرۍ د جمعيت په ګډون يو شمېر نورو سياسي ګوندونو سره په خبرو اترو بوخت دي.
دغه څرګندونې په کابل کې د عبدالهادي ارغنديوال په مشرۍ د حزب اسلامي د اجرائيه شورا غړي انجنيرمحمد خان د کب په ٢٩مه، پژواک خبري اژانس سره د ځانګړې مرکې پر مهال وکړې.
هغه زياته کړه، چې د ولسمشر دويم مرستيال او د حزب وحدت اسلامي له مشر کريم خليلي سره يې په دې هوکړه کړې او توافق ته رسېدلي، چې د راتلونکو ولسمشريزو ټولټاکنو په اړه به يو موقف او دريځ ولري.