ټاکنيزې مبارزې

تالقان (پژواک ١٤ کب ٩٢): د ولسمشرۍ کانديد اشرف غني احمدزي، د تخار په غونډه کې د دغه ولايت د ولسواليو مرکزونو د پراختيا او د کوکچې سيند د برېښنا کوټ د جوړولو ژمنه وکړه.
دغه غونډه نن د لسګونه زره تنو په ګډون او د اشرف غني احمدزي د مرستيالانو جنرال عبدالرشيد دوستم او سرور دانش پر ويناوو، د تخار د مرکز تالقانو ښاروالۍ په چمن کې تر سره شوه.
اشرف غني احمدزي وويل، چې د برياليتوب پر مهال به څلوېښت سلنه مالي بوديجه ولايتونو او سيمه ييزو ادارو ته ځانګړې کړي ترڅو په بېلابېلو ډګرونو کې د دغه ولايت د خلکو ستونزې حل شي.

کابل (پژواک ١٣ کب ٩٢): د ولايتي شوراګانو د کانديدانو د ټاکنيزو مبارزو په پيلېدو سره د کورنيو چارو وزارت ويلي، چې د دوى د ټاکنيزو مبارزو د امنيت ساتلو په موخه يې اړين امنيتي تدابير نيولي او کانديدان هم بايد له پوليسو سره همغږي ولري.
د ولايتي شوراګانو کانديدانو د افغانستان د ټاکنو قانون له مخې، خپلې ټاکنيزې مبارزې نن په رسمي ډول پيل کړې. دغه ټاکنيزې سيالۍ به تر راتلونکې يوې مياشتې پورې دوام وکړي او د ټاکنو د ترسره کېدو له نېټې ( ١٣٩٣ کال د وري ١٦مه) به دوه ورځې وړاندې پاى ته ورسيږي.

کابل (پژواک ٤ کب ٩٢): د افغانستان ملت د اسلامي حرکت ګوند، د راتلونکو ولسمشرۍ ټاکنو له کانديد اشرف غني احمدزي څخه خپل ملاتړ اعلان کړ.
دغه ګوند خپله پرېکړه نن (د کب ٤مه) د اشرف غني او دواړو مرستيالانو جنرال عبدالرشيد دوستم او محمد سرور دانش او د سلګونو کسانو په ګډون د يو لړ مراسمو په ترڅ کې په کابل کې څرګنده کړه.
د افغانستان ملت اسلامي حرکت ګوند مشر سيد هادي هادي په دغو مراسمو کې وويل، چې دغه ګوند د ملي پيوند ګوند او د افغانستان د اسماعليانو سراسري شورا د مشر سيد منصور نادري په هڅونې، د اشرف غني احمدزي له ټېم څخه خپل ملاتړ اعلان کړ.

کابل (پژواک ٤ کب ٩٢): د ولسمشرۍ د دوو کانديدانو عبدالقيوم کرزي او ډاکټر زلمي رسول د يو ځاى کولو لپاره جوړه شوې جرګه به نن خپله پرېکړه اعلان کړي او له يوه کانديد څخه به وغواړي چې د بل پر ګټه تېر شي.
د عبدالقيوم کرزي د کمپاين دفتر وايي، چې دواړو لورو جرګې ته پوره واک ورکړى او ژمنه يې کړې چې د جرګې هره پرېکړه به مني.
په دې جرګه کې د افغانستان د ٣٤ ولايتونو ١٧٠ استازي شامل دي چې په خپلو کې په خبرو دي، تر څو د ولسمشرۍ د کانديدانو شمېر کم شي.

کابل (پژواک، ٣ کب ٩٢): د حزب اسلامي درېيمې ډلې، چې ګڼ شمېر دولتي چارواکي په کې شتون لري، د ولسمشرۍ د کانديد ډاکټر زلمي رسول د ملاتړ اعلان وکړ.
په کابل کې د زلمي رسول د کمپاين له دفتره د کب په درېيمه، پژواک خبري اژانس ته په رالېـږل شوې خبرپاڼه کې راغلي دي، چې د حزب اسلامي د شوراګانو او احزابو اتحاد د يوې غونډې په ترڅ کې، نن له ډاکټر زلمي رسول څخه د ملاتړ اعلان وکړ.
سرچينې زياته کړې، په ټاکنو کې تر برياليتوب وروسته به دغه ډله د ښې حکومتوالۍ، حکومت جوړونې او خلکو ته د خدمتونو په وړاندې کولو کې په ګډه کار کوي.

جلال اباد، اسعد اباد (پژواک٣٠سلواغه٩٢): په ننګرهار او کونړ کې د ولسمشرۍ د درېيو کانديدانو، سياف، زلمي رسول او شېرزي په ملاتړ غونډې وشوې.
په ننګرهار ولايت کې د استاد عبدالرب رسول سياف او محمد شفيق ګل اغا شېرزي په ملاتړ د سلواغې په ٣٠مه، دوه بېلابېلې غونډې ترسره شوې.
د استاد عبدالرب رسول سياف غونډه، چې د مشرانو جرګې د رييس فضل هادي مسلميار په مشرۍ جوړه شوې وه، زرګونو کسانو پکې ونډه اخيستې وه.
ګډونوالو په يوه خوله د سياف ملاتړ کاوه او ويل يې چې د راتلونکو ولسمشريزو ټاکنو لپاره نوموړى وړ کانديد دى.

کندوز-تالقان (پژواک ٣٠ سلواغه ٩٢): د ټاکنيزو مبارزو له پيل وروسته د دوه اونيو په تېرېدو سره د لومړي ځل لپاره په کندوز او تخار ولايتونو کې د جمهوري رياست د دوو کانديدانو په ملاتړ غونډې او لاريونونه وشول.
په دغو غونډو او لاريونونو کې سلګونو کسانو، چې نن د اشرف غني احمدزي او ډاکټر عبدالله عبدالله په ملاتړ په کندوز ښار او د تخار په مرکز تالقانو ښار کې تر سره شوې، ګډون کړى وو.
په کندوز کې د ډاکټر اشرف غني احمدزي يوه کمپاين کوونکي ميرويس زاخېل وويل، له خلکو سره تر مشورو وروسته د زاخېلو بېلابېلو قومونو د ولسمشرۍ له دغه کانديد څخه خپل ملاتړ اعلان کړى دى.

کابل (پژواک ٢٧سلواغه ٩٢): د ملي شورا له ٢٤٨ غړو، چې له پژواک سره يې اړيکه ټينګه شوې، ٤٤ يې د اشرف غني احمدزي، ٤١ يې د زلمي رسول او ٣٩ نورو د عبدالله عبدالله له نوماندۍ ملاتړ کړى دى.
د غه راز د ملي شورا له يادو ٢٤٨ غړو، چې د دې شورا د غړو شاوخوا ٧١ سلنه جوړوي، ١٧ د عبدرب الرسول سياف، لس يې د عبدالقيوم کرزي او درى نور د محمدشفيق ګل اغا شېرزي له نوماندۍ ملاتړ کوي.
خو له يادو ٢٤٨ تنو يوه هم د ولسمشرۍ له پاتې پنځو کانديدانو (قطب الدين هلال، عبدالرحيم وردګ، داود سلطانزوى، هدايت امين ارسلا او محمدنادر نعيم) ملاتړ نه دى کړى.

کابل (پژواک ٢٦ سلواغه ٩٢): په کابل ښار کې نن د يوې غونډې په ترڅ کې د بېلابېلو بنسټونو سلګونو تنو، د جمهوري رياست له کانديد محمدشفيق ګل اغا شېرزي څخه خپل ملاتړ اعلان کړ.
د کابل ښار په ديارلسمه ناحيه کې د ګل اغا شېرزي د ټاکنيز دفتر مشر محمد محمدي په نننۍ غونډه کې وويل، چې د افغانستان د ځوانانو علمي ټولنه، د افغانستان د مدني ټولنې بنسټونو ملي ايتلاف، د افغان محصلينو د ودې ټولنه، کابل کې د صفا د اوسېدنې ښارګوټي ټولنيزه شورا او د اهل بيتو فرهنګي ټولنه له شېرزي څخه خپل ملاتړ اعلانوي.

کابل (پژواک٢٢سلواغه٩٢): سره له دې چې د ولسمشرۍ د کانديدانو د انتخاباتي مبارزو له پيل څخه څه باندې يوه اونۍ تېرېږي، خو لا هم د کانديدانو ناستې يواځې په کابل پورې محدودې دي او تراوسه يوه کانديد هم په ولايتونو کې غونډه نه ده کړې.
د ځېنو ولايتونو اوسېدونکي وايي ، چې د تېرو ټاکنو په پرتله دا ځل د کانديدانو ټاکنيزې مبارزې کمرنګه دي.