ملي شورا

کابل (پژواک ١٠ کب ٩٤): د مشرانو جرګې اداري پلاوى وايي چې په نوي تقنيني کال کې به د اداري پلاوي ټاکنې تر سره نه شي، خو له قانون څخه د ملاتړ پارلماني ګروپ؛ اداري پلاوى له قانون څخه پر سرغړونې تورن کړى او ګواښ کوي چې که چېرې د پلاوي ټاکنې ترسره نه شي نو د مجلس نظم به ګډ وډ شي.
 مشرانو جرګې د مرغومي مياشتې په ٢٧ مه نېټه، د ملي شورا له ژمنيو رخصتيو وړاندې پرېکړه وکړه چې د يادې جرګې د دوه ثلث نوو غړو په معرفۍ سره د جرګې د اداري پلاوي ټاکنې نه تر سره کوي، خو په مشرانو جرګه کې د پارلماني ګروپ يو شمېر غړو د اعتراض په ډول له رايې اخيستنې وړاندې غونډه پرېښوده.

کابل(پژواک، ٢٨ مرغومى ٩٤): ولسي جرګې د ١٣٩٥ کال د بوديجې طرحه په ځينو بدلونونو سره او په کې د نږدې ١٢ ميليارده افغانيو له زياتېدو وروسته د رايو په اکثريت تاييد کړه.
مشرانو جرګې دا طرحه له تاييد وروسته د ليندۍ په ٤مه ولسي جرګې ته له پيشنهاد شوو نظرونو سره وړاندې کړه، خو د ولسي جرګې لخوا د ليندۍ په ٣٠ مه نېټه رد شوه.
ولسي جرګې ويلي وو چې په دې طرحه کې اکثره شاملې پروژې د مخکنيو کلونو دي او په بوديجه کې د ولايتونو ترمنځ توازن په پام کې نه دى نيول شوى. د مشرانو جرګې ځينو غړو هم ورته نظر درلود.

کابل (پژاک، ٢٦ مرغومى ٩٤): د ټاکنو د خپلواک کمېسيون مشر د ولسي جرګې په نننۍ ناسته کې وويل چې دغه کمېسيون به د دوشنبې په ورځ (د مرغومي ٢٨مه) د ولسي جرګې او ولسواليو شوراګانو د ټاکنو د ترسره کېدو نېټه اعلان کړي.
احمديوسف نورستاني نن ولسي جرګې ته غوښتل شوى و، څو د دې جرګې او ولايتي شوراګانو د ټاکنو په اړه معلومات وړاندې کړي.
نورستاني وويل چې په ١٣٩٣ لمريز کال د ولسمشرۍ په ټاکنو کې د رايه ورکونې په مرکزونو کې د ټاکنو د لنډمهاله کارکوونکو ګومارنې د توازن او نورو برخو کې ستونزې وې، خو په نوي پلان کې يې د دغو ستونزو د حل لپاره اقدامات په پام کې نيولي دي.

کابل (پژواک ٢٢ مرغومى ٩٤): د ملي دفاع وزارت سرپرست وايي، "سيمه ييزې سيالۍ" په هېواد کې د افراطي ډلو د رامنځته کېدو لامل شوې او د هېواد شمال ته جګړه، د يو شمېر دليلونو له مخې، لکه زمينه برابرول او نورو لاملونو له امله غځول شوې ده.
خو نوموړي د هېواد د امنيت په ټينګښت کې د خلکو له همکارۍ سربېره څرګنده کړه، امنيتي ځواکونه د هغو کسانو له منځه وړلو ته چمتو دي، چې سولې ته غاړه نه ږدي.