ملي شورا

کابل(پژواک،١٩ لړم ٩٤): مشرانو جرګې د ننګرهار پوهنتون او پوهنې وزارت ځينې چارواکي جرګې ته را غواړي، څو په ننګرهار پوهنتون کې د طالبانو او داعش د بيرغ اوچتېدو او د کندهار په يوه ښوونځي کې د پاکستاني کتابونو د تدريس په اړه ځواب ووايي.
دوه ورځې وړاندې د ننګرهار پوهنتون يو شمېر محصلينو د ليليې د ستونزو په اړه يوه لاريون کې سپين او تور بيرغونه چې د دولت په وسله والو مخالفينو( طالبان او داعش ) پورې اړه لري، اوچت کړي وو.
د مشرانو جرګې غړي ليلما احمدي د جرګې په نننۍ غونډه کې وويل:((د ننګرهار پوهنتون مشر بايد امنيتي چارواکي خبر کړي واى، خو ناغيړي شوې ده.))

کابل (پژواک، ١٧لړم ٩٤): د راتلونکي مالي کال بوديجې طرحه چې ٤٦١،٨ ميليارده افغانۍ عادي او پراختيايي بوديجه ده، مشرانو جرګې ته وړاندې شوه چې له مخې يې په پراختيايي بوديجه کې ١٤،٥ سلنه زياتوالى، خو په عادې بوديجه کې کمښت راغلى دى.
د ماليې وزير محمد اکليل حکيمي د بوديجې طرحې په اړه د معلوماتو ورکولو پرمهال وويل، راتلونکي کال لپاره ٤٦١،٨ ميليارده افغانۍ بوديجه په پام کې نيول شوې ده، چې د روان کال په پرتله ټولټال ٦ سلنه کموالى ښيي.
د افغانستان مالي کال د مرغومې په لومړۍ نېټه پيلېږي.

جلال اباد(پژواک،۱۴ لړم۹۴): د ولسي جرګې لومړی مرستيال وايي، چې په شينوارو کې يې د داعش پر ضد د ولسي پاڅونونو پر مټ چريکي عمليات پيل کړي دي.
حاجي عبدالظاهر قدير د لړم په ۱۴مه، په سره ردو ولسوالۍ کې د شينوارو د سلګونه اوسېدونکو په قومي غونډه کې وويل، چې په نازيانو ولسوالۍ کې يې د داعش پر ضد د جګړې لپاره مرکز جوړ کړی دی.
قدير ګواښ وکړ: ((داعش که اورکزی وي،که افريدی وي او که پاکستانی وي خپلې کډې دې له شينوارو بار کړي او ځي دې، که نه د ولس له سخت غبرګون سره به مخ شي.))

کابل (پژواک، ۱۳ لړم ۹۴): د مشرانو جرګې د شهيدانو او معلولينو کمېسيون پر حکومت غږ وکړ چې د معلولينو د ستونزو حل ته پاملرنه وکړي او ٨٩ زره خيالي معلولينو او معيوبينو ته د تنخوا ورکولو مخه ونيسي.
ياد کمېسيون نن د کار او ټولنيزو چارو، لوړو زده کړو، پوهنې، عامې روغتيا، د کډوالو او بېرته راستنېدونکو، حج او اوقافو او ماليې وزارتونو او د بشري حقونو د خپلواک کمېسيون او د سپورټ او بدني روزنې رياست چارواکي سره ګډه ناسته درلوده، تر څو په بېلابېلو برخو کې د معلولينو، معيوبينواو شهيدانو د کورنيو د ستونزو د هواري او خيالي معلولينو او معيوبينو په اړه ورسره خبرې وکړي.

کابل (پژواک ١١ لړم ٩٤): د ولسي جرګې يو شمېر غړي ادعا کوي، چې د کورنيو چارو وزير د دغې جرګې له استيضاح څخه د پټو معاملو په پايله کې بريالى راوتلى دى.
نورالحق علومي نن له غرمې وړاندې د ولسي جرګې د استيضاح غونډې ته حاضر شو او د دغه وزارت د کړنو او د هېواد د امنيتي وضعيت په اړه يې د يادې جرګې غړو ته ځوابونه وويل.
د اساسي قانون د ٩٢ يمې مادې پر بنسټ، که چېرې د استيضاح شوي وزير سپيناوى د قناعت وړ نه وي نو ولسي جرګه د باور رايې پر بيرته اخيستو فکر کوي.

دويم تعقيب-کابل (پژواک ١١ لړم ٩٤): د هېواد د کورنيو چارو وزير نورالحق علومي د ولسي جرګې د ډېرى غړو قناعت ترلاسه کړ او د يادې جرګې له استيضاح څخه په بريالۍ توګه راووت.
د کورنيو چارو وزير نورالحق علومي نن د ولسي جرګې له لوري استيضاح شوى و، څو د وسلوالو مخالفينو له لوري د کندوز او يو شمېر نورو سيمو د سقوط او په ټوليز ډول د هېواد د امنيتي وضعيت او د دغه وزارت د کړنو په اړه د خلکو استازو ته ځوابونه وړاندې کړي.
علومي د جرګې د يو شمېر غړو له سختو ځوابونو سره مخ شو.

کابل( پژواک، ١٠ لړم ٩٤ ): د مشرانو جرګې يو شمېر غړو د ولسي جرګې او ولسواليو شوراګانو د ټاکنو نېټې پر معلولو د ټينګار تر څنګ، د دوديزي لويې جرګې د ژر جوړيدو غوښتنه کړې ده.
دا په داسې حال کې ده چې د جهادي قوماندانانو شورا او سياسي ګوندونو په دې وروستيو کې د اساسي قانون تعديل لپاره د لويې جرګې جوړېدو غوښتنه کړې ده.
د ملي يووالي حکومت رامنځ ته کېدو د تړون له مخې، لويه جرګه بايد د حکومت په لومړيو دوو کلونو کې ترسره شي.
په ورته وخت کې جمهوري رياست وايي چې حکومت به له شرايطو او ژمنو سره سم په دې اړه ګام واخلي.

کابل (پژواک، ١٠ لړم ٩٤): مشرانو جرګې د المان له دولته وغوښتل چې د افغانانو د ايستلو په اړه دې پر خپل تصميم له سره کتنه وکړي او زياته يې کړه چې د ولسمشر اشرف غني په غوښتنه د افغانانو شړل د هغوى په حق کې جفا ده.
ځينو الماني رسنيو راپور ورکړى چې د دغه هېواد دولت تصميم نيولى څو ګن شمېر هغه افغانان چې د پناه غوښتنليک يې ردېږي، له خپل هېواده وباسي.
په ورته وخت کې د کډوالو او بېرته را ستنېدونکو چارو وزارت وايي چې تر اوسه د المان دولت د خپل تصميم په اړه له افغان حکومت سره خبرې نه دي کړې.

کابل (پژواک، ٩ تله ٩٤): د ولسي جرګې ځينو غړو د امنيتي ځواکونو په تجهيز او تمويل کې د پاتې کېدو له امله پر امريکا نيوکه وکړه او له حکومت يې وغوښتل چې د دولت د بهرني سياست اساسي کرښې دې ژر تر ژره څرګندې کړي.

کابل (پژواک، ٩ لړم ٩٤): ولسي جرګې د ولسمشر څلورم تقنيني فرمان چې د ملي شورا په دوبنيو رخصتيو کې صادر شوی و، د رايو په اکثريت رد کړ.
د ولسي جرګې ملي اقتصاد کمېسيون مرستيال شېرولي وردګ نن د بوديجې خپلواک واحد په توګه د ملي اقتصاد مشاوريت دفتر د رامنځته کېدو په اړه د ولسمشرۍ تقنيني فرمان عمومي غونډې ته وړاندې کړ.
هغه وويل چې د دغه فرمان له مخې يو خپلواکه اداره چې ٦٠ کار کوونکي به ولري، رامنځ ته کېږي.
هغه زياته کړه چې دغه فرمان د قانون خلاف صادر شوى دى او د داسې ادارو رامنځته کولو لپاره اړتيا نه شته.