ملي شورا

کابل(پژواک١٠ورى٩٢) : د ملکي خدمتونو او اداري اصلاحاتو کمېسيون د شتون د اړتيا او نه اړتيا په اړه په ولسي جرګه کې بحثونه بې پايلې و او د مرکزي تفتيش کمېسيون په دې برخه کې اداري پلاوى د حکومت په پلوۍ تورن کړ.
د ولسي جرګې د رييسانو کمېټې څو ورځې وړاندې د يادې جرګې د مرکزي تفتيش او عدلي او قضايي کمېسيونونو ته دنده ورکړه ، چې د ملکي خدمتونو او اداري اصلاحاتو د کمېسيون د شتون د اړتيا او نه اړتيا په اړه څېړنې وکړي او خپل راپور عمومي غونډې ته وړاندې کړي .

کابل (پژواک ٦ ورى ٩٢): د مشرانو جرګې غړي په برېښنايي تذکرو کې د قوم د يادونې په اړه بېلابېل نظرونه لري او وايي، ډېر دقت بايد وشي چې دغه تذکرې بهرنيان ترلاسه نه کړي.
د برېښنايي تذکرو د ورکړې لپاره د نوم ليکنې پروسه د وري په ٤مه په کابل کې په رسمي ډول پيل شوې ده.
د مشرانو جرګې د نن ورځې عمومي غونډه پر همدې تذکرو بحث ته ځانګړې شوې وه.
په مشرانو جرګه کې د فراه استازې بلقيس روشن نن د دې جرګې په عمومي غونډه کې وويل، چې د برېښنايي تذکرو وېش يوه ملي پروسه ده او اړوند ارګانونه بايد په دې برخه کې له ډېر دقت څخه کار واخلي.

کابل (پژواک ٥ ورى ٩٢): ولسي جرګه د راتلونکې دوشنبې په ورځ د اطلاعاتو او فرهنګ، اقتصاد، سوداګرۍ او کانونو وزيران د استيضاح لپاره ورغواړي.
تېر کال د مرغومي په لومړيو کې ولسي جرګې د ملي دفاع، کورنيو چارو، سوداګرۍ، اقتصاد، اوبو او برېښنا، پوهنې، ښاري پراختيا، کانونو، لوړو زده کړو، له نشه يي توکو سره د مبارزې او اطلاعاتو او فرهنګ وزارتونو د وزيرانو د استيضاح پرېکړه وکړه.
جرګې د استيضاح دليل په ١٣٩٠ کال کې د دغو وزارتونو د پراختيايي بوديجو له نيمايي لږ لګول ښودلى و، خو وروسته يې په اړه د جرګې د غړو ترمنځ اختلافونه رامنځته شول او څو ناستې يې په دې اړه په ناندريو تېرې کړې.

کابل (پژواک ٥ ورى ٩٢): د ولسي جرګې کمېسيونونو د ټاکنو قانون پر مسودې بحثونه پيل کړي او ټاکل شوې، چې دغه مسوده ١٤ ورځې وروسته د جرګې عمومي غونډې ته وړاندې شي.
په تېرو شاوخوا ١١ کلونو کې ټاکنې د تقنيني فرمان له مخې ترسره کېدې، خو د ټاکنو خپلواک کمېسيون له خوا جوړه شوې د ټاکنو د قانون طرحه په تېرې ليندۍ مياشت کې وزيرانو شورا له يو لړ بدلونونو سره تصويب کړه او ولسي جرګې ته واستول شوه.
د ولسي جرګې منشي انجنير سيد اکرام نن پژواک خبري اژانس ته وويل، تېره ورځ د جرګې د رييسانو کمېټې پرېکړه وکړه، چې په کمېسيونونو کې دې د ټاکنو د قانون پر مسوده بحثونه پيل شي.