ملي شورا

کابل (پژواک ١٣ مرغومى ٩٤): د مشرانو جرګې يو شمېر غړو، په داسې حال کې د جرګې په اجنډا کې د ټاکنو په اړه د تقنيني فرمان د شاملولو غوښتنه وکړه چې د يادې جرګې مشر او د رييسانو کمېټه په اجنډا کې د دغه فرمان شاملول د قانون خلاف بولي.
دا په داسې حال کې ده، چې ولسي جرګې د هېواد د اساسي قانون ١٠٩ مادې ته په پام سره  ياد فرمان د مرغومي مياشتې په پنځمه د رايو په اکثريت سره رد کړى دى.
په ياده ماده کې راغلي: "د ټاکنو قانون د تعديل وړانديز د تقنيني دورې په وروستي يوه کال کې، د ملي شورا د کار په نوملړ کې نه شي داخلېدلى."

 کابل(پژواک، ١٢مرغومى ٩٤): ولسي جرګه د روانې اوونۍ د دوشنبې په ورځ د مخابراتو او معلوماتي ټکنالوجۍ وزير استيضاح کوي.
د جرګې يو شمېرو غړو بيا په نننۍ ناسته کې د ځينو ادارو ، په ځانګړي ډول د  وزارتونو او ولايتونو د مشرتابه په اړه د بيا کتنې غوښتنه وکړه.
 د کورنيو دندو او اصولو د ٩٩ مادې پر بنسټ، جرګه د خپلو ټولو غړو د شل سلنې په وړانديز( ٥٠ کسان) کولى شي چې هر يو وزير استيضاح کړي. د استيضاح وړانديز د جرګې مشر ته وړاندې کېږي او د رييسانو کمېټې له خوا اجنډا کې نيول کېږي.

کابل (پژواک ٨ مرغومى ٩٤): د مشرانو جرګې يو شمېر غړي په دې باور دي، چې پاکستان د افغانستان د سولې په پروګرام کې ريښتونى نه دى او په دغه برخه کې د دغه هېواد ريښتونې همکارۍ لپاره هيلې، د وخت له ضايع کولو پرته بله معنا نه لري.
د افغان دولت او طالبانو استازو، د روان کال په چنګاښ مياشت کې د پاکستان په پلازمېنه اسلام اباد کې ناسته درلوده او ټاکل شوې وه چې دا ډول ناستې دوام پيدا کړي، خو د ملا عمر د مړينې په اړه د راپورونو له خپرېدو وروسته دغه لړۍ يو ځل بيا ودرېده.

کابل (پژواک ٧ مرغومى ٩٤): د ولسي جرګې لومړى نايب وايي، د ننګرهار په بېلابېلو سيمو کې ناپېژانده هليکوپټرې ناستې کوي، خو له دې وروسته به د هغه کسان دا هليکوپټرې هم په نښه کړي.
دغه راز ظاهر قدير د ٢٠١ سېلاب قول اردو د مکتوب کاپي هم د ولسي جرګې غړو په واک کې ورکړه، چې له مخې يې د لشکر اسلام تحريک ٩٠ سلنه غړي چې پخوا د افغان دولت له لوري ورته د جواز ځانګړي کارتونه وېشل شوي وو، د داعش ډلې په ليکو کې تنظيم شوي او د افغان دولت پر وړاندې جګړه کوي.
نوموړي، چې د جرګې په عمومي ناسته کې يې خبرې کولې، وويل چې ناپېژانده هليکوپټرې پر ننګرهار الوتنې کوي.