ټاکنیز خبرونه

چاریکار(پژواک، ۲۴ تله ۹۸): د پروان ولایت د شینوارو ولسوالۍ د رایې ورکولو د یوه مرکز اته کارکوونکي چې طالبانو نیولي وو لا هم له طالبان سره بنديان دي.
د پروان ولایت د یوې مسوولې سرچینې د معلوماتو له مخې، د ټاکنو خپلواک کمېسیون اته کارکوونکي چې ددغه ولایت د شینوارو ولسوالۍ په نمک اب سیمه کې په دنده ګومارل شوي وو د تلې د شپږمې پر ماښام کورته د تګ پر مهال طالبانو تښتولي وو.
دوی وايي چې دغه اته کسان د شینوارو ولسوالۍ د بېلا بېلو سیمو اوسېدونکي دي.

کابل (پژواک، ٢٣ تله ٩٨): په کابل کې د امريکا سفير وايي، د ولسمشرۍ ټاکنو پايلې که ناوخته اعلان هم شي پروا نه کوي، خو پر پايلو د خلکو باور مهم دى.
جان باس دغه څرګندونې پرون په کابل کې د ټاکنو له خپلواک کمېسيونه تر ليدنې وروسته په خپل ټويټر کې کړې دي.
هغه د ټاکنو خپلواک کمېسيون د کارکوونکو کارونه ستايلي او زياته کړې یې ده: "موږ ته مهمه دا ده چې خلک د ټاکنو پر ښو پايلو باور وکړي، خير دى که پايله يې ناوخته اعلان شي."

کابل (پژواک، ۲۲ تله ۹۸): د ټاکنو خپلواک کمېسیون اعلان وکړ چې له ۱.۷ ډېرې بایومټریک رایې مرکزي سرور ته لېږدول شوې او د نږدې ۴۰۰۰ محلونو رایې پاتې دي چې تر سبا به سیستم ته داخلې شي.

ایبک (پژواک، ۲۱ تله ۹۸): په سمنګان کې د ولسي جرګې ټاکنو په پرتله په ولسمشرۍ ټاکنو کې د خلکو د ګډون کچه ۴۸ سلنه کمه وه او د کمښت په یاده سلنه کې د نارینه په پرتله د ښځو د نه ګډون کچه ۲۰ سلنه ډېره ده.
ولسمشرۍ ټاکنې د روان کال د تلې په شپږمه ترسره شوې او د افغانستان د ولسي جرګې ټاکنې د ۱۳۹۷ کال د تلې په میاشت کې ترسره شوې. د ولسمشرۍ ټاکنو پایلې تر اوسه نه دي اعلان شوې.
په سمنګان ولایت کې د ټاکنو کمېسیون د عامه پوهاوي مسوول محمد عالم نوابي پژواک خبري اژانس ته وویل، په دغه ولایت کې په تېرو ولسمشرۍ ټاکنو کې شاوخوا ۳۹۳۹۵ کسانو ګډون کړی و.

کابل (پژواک،۱۸ تله ۹۸): پر ټاکنو د څار دوه بنسټونه ادعا کوي چې د ټاکنیزو کمېسیونونو د دارالانشا رییسان او کمېشنران د ولسمشرۍ ټاکنو له نوماندانو او د هغوی له سلاکارانو سره اړیکې لري چې د ټاکنو د پایلو تر اعلانېدو باید قرنطین شي.
نن د افغانستان د رڼو ټاکنو د څار موسسې «ایتوا» او د افغانستان د ازادو ټاکنو د څار موسسې «افوا» چې په ګډه د ولسمشرۍ ټاکنو څارنه کوي وايي، د دوی د معلوماتو له مخې، په تېرو ولسمشرۍ ټاکنو کې د خلکو د ګډون کچه تر ۲.۷ میلیونه ټيټه ده.

کابل (پژواک ۱۷ تله ۹۸): د ټاکنو کمېسیون د کمپیوټرونو د سرور د هک کېدو په اړه خپاره شوي راپورونه ناسم دي خو د دغه سیستم فعالیت ورو شوی او د حل لپاره یې نن له جرمني کابل ته د یادې برخې متخصصین راځي.

ابل (پژواک، ۱۶ تله ۹۸): د ټاکنو خپواک کمېسیون کمېشنر مولانا محمد عبدالله وایي، مرکزي سیستم ته له بایومتریک ماشینونو د اطلاعاتو انتقال په سستۍ روان دي او که همدا ډول دوام ولري؛ نو د تلې په ۲۷مه د ټاکنو د لومړنو پایلو اعلان ناممکن دی.
دا په داسې حال کې ده چې د ټاکنو د مهالوېش له مخې د تېرو ولسمشرۍ ټاکنو لومړنۍ پایلې باید د تلې په ۲۷مه او وروستۍ پایلې یې د لړم په ۱۶مه اعلان شي.

کابل (پژواک، ۱۶ تله ۹۸): د ولسمشرۍ ټاکنو پخواني نوماند ابراهیم الکوزي د ولسمشریزو ټاکنو د پایلو په اړه د نوماندانو له وخت مخکې قضاوت له قانونه سرغړونه بللې او له نوماندانو یې غوښتي چې د کمېسیون پرېکړې ته په تمه شي.

کابل (پژواک، ۱۴ ميزان ٩٨): د ټاکنو خپلواک کمېسیون وايي، د ټولو ولایتونو حساس ټاکنیز توکي کابل ته را رسېدلي او تر اوسه د کابل په ګډون د لسو ولایتونو د رایو پایلې څېړل شوې دي.
د ولسمشرۍ ټاکنې د تلې په شپږمه ترسره شوې او خلکو په دې ټاکنو کې ۱۳ نوماندانو ته رایې ورکړې.
د ټاکنو خپلواک کمېسیون غړې اورنګزیب نن په کابل کې خبریالانو ته وویل چې د بایومټریک وسایلو او رایو د پایلو جدولونو په ګډون ټاکنیز حساس توکي له ټولو ولایتونو د دغه کمېسیون مرکزي دفتر ته رسېدلي دي.

کابل (پژواک، ۱۱ تله ۹۸): د مجما څارونکې ډله وايي چې له يو شمېر ستونزو سره سره ولسمشرۍ ټاکنې د ولسي جرګې د تېرو ټاکنو په پرتله په ښه ډول سره مديريت شوې.
دغه څرګندونې د څارونکو بنسټونو (مجما) يو شمېر غړو د تلې په ١١مه، په کابل کې د يوې خبري غونډې پر مهال وکړې.
د ولسمشرۍ ټاکنې چې تېره شنبه (د تلې په شپږمه) ترسره شوې د ۱۳ نوماندانو ترمنځ په دې ټاکنو کې نږدې درې ميليونه خلکو برخه واخيسته.