Paktia

 
ګردېز (پژواک ٧ زمرى ٩٢): په سوېل ختيځ زون کې د ۲۰۳ نمبر تندر قول اردو چارواکي وايي، چې په ځاځي اريوب ولسوالۍ کې يې د سيمرغ په نوم عملياتو کې ۶۵ وسله وال مخالفين وژلي او ۱۳ نور يې ټپيان کړي دي.
د يادې قول اردو له لوري رسنيو ته په لېږل شوې خبرپاڼه کې راغلي، چې افغان هوايي ځواکونو په تېرو څلورويشتو ساعتونو کې د ځاځي اريوب د رقيانو درې په سيمه کې پر وسله والو مخالفينو هوايي بريد کړی، چې په پايله کې يې هغوى ته ګڼه مرګ ژوبله اړولې ده.

 
ګردېز (پژواک ٢٦ چنګاښ ٩٢): چارواکي وايي، چې په ګردېز ښار کې چاودنې ١٢ ملکي وګړي ټپيان کړي دي.
د پکتيا د امنيه قوماندانۍ امر سمونوال محمدزمان د چنګاښ په ٢٦مه پژواک اژانس ته وويل، چې دغه پېښه شاوخوا لس بجې د زاړه ولايت تر څنګ د سړک پر غاړه د ځاى پر ځاى شوو چاودېدونکو توکو د چاودنې له امله رامنځته شوې ده.
د ده په وينا، چې د دې چاودنې موخه نه ده معلومه، خو پوليسو يې په اړه پلټنې پيل کړې دي.
د ګردېز د ملکي روغتون مشر ډاکټر حياګل پکتين وايي، چې روغتون ته ١٢ ملکي ټپيان ور وړل شوي دي.

 
ګردېز (پژواک ١٧ چنګاښ ٩٢): د پکتيا په مرکز ګردېز ښار کې پر يوې امنيتي پوستې د ډله ييز بريد هڅه شنډه شوې ده.
د دغه ولايت د امنيه قوماندانۍ د امنيت امر سمونوال محمد زمان د چنګاښ په ١٧مه پژواک خبري اژانس ته وويل، پنځو ځانمرګو بريدګرو، چې پر وسلو سمبال وو، غوښتل د ګردېز ښار اړوند  د سروړۍ پر امنيتي پوستې ډله ييز بريد وکړي.
هغه زياته کړه، چې امنيتي ځواکونه پرې شکمن شول او موخې ته له رسېدو مخکې يې پرې بريد وکړ او ترمنځ يې رامنځته شوې نښتې نيم ساعت دوام درلود.

 
ګردېز (پژواک ١٧ چنګاښ ٩٢): د پکتيا په مرکز ګردېز کې د والي جمعه خان همدرد پر خلاف او ملاتړ دوه  بېلابېل لاريونونه وشول.
د والي پر خلاف لاريون کې د قومي مشرانو او مدني ټولنو د استازو په ګډون ١٠٠ تنو ګډون کړى دى.
د مدني ټولنې يوه فعال او د لاريون سمبالوونکي نوراحمد ريښتياوال د چنګاښ په ١٧مه پژواک اژانس ته وويل، چې والي په فساد کې ښکېل دى او پراختيايي چارو ته هېڅ پاملرنه نه کوي.
د ده په خبره، والي د قومي مشرانو او د مدنو ټولنو د استازو احترام نه ساتي او د هغوى تر منځ د اختلاف رامنځته کولو هڅې کوي.