Paktia د ولايتي شوراګانو ټاکنې

ګردېز (پژواک،٢٥تله٩٤): د پکتيا ځينو قومي مشرانو او د ولايتي شورا غړو د ولسمشر محمد اشرف غني او د حکومت د اجرائيه مشر عبدالله عبدالله د استعفا غوښتنه وکړه.
د پکتيا د بېلابېلو قومونو مشرانو او د ولايتي شورا غړو، نن د دې ولايت په مرکز ګردېز ښار کې غونډه جوړه کړې وه.
په دې غونډه کې د پکتيا د ولايتي شورا منشي محمد الرحمن قادري وويل، د اوسني حکومت مشرانو، هغه ژمنې چې د ټاکنو پرمهال يې خلکو سره کړې وې، يوه يې هم نه ده پرځاى کړې.
ده زياته کړه، د هېواد د ښېګڼې لپاره ولسمشر محمد اشرف غني او اجرائيه مشر عبدالله عبدالله بايد له خپلو دندو استعفا ورکړي.

ګردېز (پژواک، ١٩ وږى ٩٤): د پکتيا ولايت امنيتي چارواکي وايي چې په ډنډ پټان ولسوالۍ کې يې د وسله والو طالبانو پر ضد پراخ عمليات پيل کړي دي.
څلور ورځې وړاندې د يادې سرحدي ولسوالۍ پر سرحدي پوستو بريدونه وکړل، څو پوستې يې ونيوې او جګړه اوس هم روانه ده .
په سوېل ختيځ زون کې د دوهم نمبر سرحدي زون قوماندان مل پاسوال عبدالبصير خپلواک د وږي په ١٩مه پژواک خبري اژانس ته وويل چې په سيمه کې ملي اردو،کومانډو او سرحدي پوليس په ګډه عمليات بيل کړي تر څو نيول شوې پوستې بېرته له وسله والو ونيسي.

ګردېز (پژواک، ١٩ وږى ٩٤): د پکتيا ولايت لسګونه سوداګرو، ولايتي شورا او مدني ټولنو د کابل- ګردېز لويه لاره له مرکزي ادارو د يو شمېر غوښتنو له امله تړلې ده.
د پکتيا سوداګر وايي، تر هغو به دغه لاره د بار وړونکو موټرو پر مخ تړلې پاتې وي چې غوښتنې يې نه وي منل شوې.
دوى وايي چې د مرکزي دولت يو شمېر ادارې له پکتيا سره تعصب کوي او په بېلابېلو برخو کې ورسره همکاري نه کوي.

ګردېز (پژواک، ١٧ وږى ٩٤): د پکتيا په ډنډې پټان ولسوالۍ کې د وسله والو طالبانو او سرحدي پوليسو تر منځ نښته کې شپږ سرحدي پوليس وژل شوي او يو شمېر نور ټپيان دي.
د ډنډې پټان ولسوالۍ په مقبل دره کې له تېرو دوو ورځو راهيسې د سرحدي پوليسو او وسله والو طالبانو ترمنځ نښته روانه ده.
په پکتيا کې د ٢٠٢ سرحدي زون قوماندان مل پاسوال عبدالبصير خپلواک د وږي په ١٧مه پژواک خبري اژانس ته وويل چې په دې نښته کې تر اوسه شپږ سرحدي پوليس وژل شوي او يو شمېر نور ټپيان دي.
ده وويل چې په دې نښته کې وسله والو طالبانو ته هم مرګ ژوبله اوښتې خو د کره شمېرې په اړه يې معلومات نه لري.

ګردېز (پژواک، ١١ وږى ٩٤): د پکتيا ولايت سلګونو اوسېدونکو د يوخ لاريون په ترڅ کې په برېښنايي تذکره کې د افغان کلمې د ليکلو غوښتنه وکړه.
ټاکل شوې وه چې د برېښنايي تذکرو وېشل پيل شي خو د ځينو سياسي مسايلو او په ځانګړې توګه په تذکره کې د افغان کلمې د ليکلو او يا هم نه ليکلو له امله د يادو تذکرو وېشل ځنډول شوي دي.
د پکتيا د مرکز ګردېز ښار سلګونو اوسېدونکو، د ولايتي شورا غړو، قومي مشرانو او د مدني ټولنې غړو د وږي په ١١مه د يو لاريون په ترڅ کې ټينګار وکړ چې په برېښنايي تذکره کې بايد د افغان کلمه وليکل شي.

ګردېز (پژواک، ١٤ زمرى ٩٤): د پکتيا ولايت د پوهنې رياست شپږ کارکوونکي د اداري فساد په تور نيول شوي خو دوه نور يې په تېښته بريالي شوي دي.
د پکتيا د پوهنې رياست يوې سرچيني د نوم نه اخيستو په شرط پژاوک خبري اژانس ته وويل چې د دغه رياست د پلان مدير، د محافظت او مصونيت مدير، د نظارت امر، دوه انجينران او د وزي ځدراڼ ولسوالۍ د پوهنې مدير د اداري فساد پر تور نيول شوي دي.
هغه وويل: ((په دې فساد کې د پوهنې رياست دوه نور چارواکي هم شامل دي خو نامعلوم لور ته تښتېدلي دي او اړيکه ورسره نه نيول کېږي.))

ګردېز (پژواک ١٧ چنګاښ ٩٤): د پکتيا د ولايتي شورا غړي وايي، د دې ولايت په څمکنيو ولسوالۍ کې په روانه جګړه کې پاکستاني ځواکونه ګډون لري.
د يادې ولسوالۍ په لوړي سيمه کې له شاوخوا شلو ورځو راهيسې د وسله والو طالبانو او افغان امنيتي ځواکونو ترمنځ جګړه روانه ده، چې دواړه خواوې يو بل ته د مرګ ژوبلې اړولو ادعاوې کوي.
د پکتيا د ولايتې شورا منشي محمد الرحمن قادري، نن په يوه مطبوعاتي کنفرانس کې وويل، چې د څمکنيو ولسوالۍ په جګړه کې له وسله والو سره پاکستاني پوځيان او امريکايي ځواکونه د هوا له لارې د وسلو او خوراکي توکو مرسته کوي.

ګردېز (پژواک، ١٦ چنګاښ ٩٤): د پکتيا د ولايتي شورا غړي او اوسېدونکي وايي چې له تېرې يوې مياشتې راهيسې د دغه ولايت په څمکنيو ولسوالۍ کې جګړه روانه ده او د سقوط له ګواښ سره مخ ده.
د پکتيا د ولايتي شورا غړي تاج محمد منګل د چنګاښ ١٦مه پژواک خبري اژانس ته وويل چې له تېرې يوې مياشتې راهيسې د پکتيا او ځينو نورو ولايتونو سلګونه طالبان څمکنيو ته راغلي تر څو دا ولسوالۍ سقوط کړي.
هغه وايي چې دمګړۍ د دې ولسوالۍ په لوړي سيمه کې د افغان امنيتي ځواکونو او وسله والو طالبانو تر منځ نښته روانه ده.

ګردېز (پژواک، ١٣ چنګاښ): د پکتيا په مرکز ګردېز کې د ولايتي شورا او مدني ټولنو غړو او ماشومانو له خوا د وسلو ضد کمپاين ترسره شو.
دغه کمپاين د ودان افغانستان ګوند په نوښت پيل شوى و.
د دغه کمپاين پر مهال ماشومانو پلاستيکي ټوپک مات کړل او له کتابتون څخه يې کتابونه او قـلمونه ترلاسه کړل.
د ودان افغانستان ګوند غړی سيدالرحمن نيازي د چنګاښ په ١٣مه پژواک خبري اژانس ته وويل چې له دغه کمپاين څخه يې موخه خلکو ته د وسلو د ناوړه پايلو په اړه پوهاوی ورکول دي.

ګردېز (پژواک، ١٨ غبرګولى ٩٤): د پکتيا ولايت اوسېدونکي وايي چې د مسلکي ډاکترانو له نشتوالى، د درملو له کمښت او روغتيايي مرکزونو د لرې والي له ستونزو سره مخ دي.
د پکتيا د مرکز ګردېز په ګډون څوارلس ولسوالۍ لري چې د لسو ولسواليو موقعيت يې په غرونو کې دی نو له همدې امله ډېرى اوسېدونکي يې د روغتيا په برخه کې له بېلابېلو ستونزو سره مخ دي.
د پکتيا د عامې روغتيا رياست د معلوماتو له مخې، په دغه ولايت کې د ټولو لويو او وړو روغتيايي مرکزونو شمېر نږدې پنځوسو ته رسېږي چې ځيني د درملنې لپاره اړين امکانات لري خو يو شمېر نور يې بيا ستونزې لري.