Paktia ټاکنيزې مبارزې

ګردېز (پژواک، ٦ زمرى ٩٨): د پکتيا ولايت اوسېدونکي د ولسمشرۍ له نوماندانو او د هغوی له ملاتړو غواړي چې د ټاکنيزو منډو ترړو پر مهال ملي ګټې، ارزښتونه او اخلاقي اصول په نظر کې ونيسي.

ګردېز (پژواک، ٢٢ تله ٩٧): په پکتيا کې د ولسي جرګې نوماندان د ټاکنيزو کمپاينونو له نا انډولۍ شکايت کوي او وايي چې د ولسي جرګې برحال غړي له دولتي امکاناتو او واکونو ګټه اخلي.

ګردېز (پژواک، ٢٠ تله ٩٧): په ګردېز کې د ولسي جرګې د کانديد ډاکتر يار باز حميدي پر دفتر وسله وال بريد شوى دى.
يار باز حميدي پژواک خبري اژانس ته وويل چې بريد شاوخوا يوه بجه په بلندمنزلو ښارګوټي کې د ده پر دفتر شوى دى.
ده زياته کړه، په دې پېښه کې د دفتر دوه ساتونکى ټپيان شوي چې د يوه ټپونه ډېر دي.
د پکتيا امنيه قوماندان مل پاسوال رازمحمد مندوزى وايي، د بريد په تړاو يې څېړنې پيل کړې او له بشپړېدو وروسته به يې له رسنيو سره شريکې کړې.
د دغه بريد مسووليت چا پر غاړه نه دى اخيستى.

ګردېز (پژواک ٣ غبرګولى ٩٣): د ولسمشريزو ټاکنو کانديد ډاکټر عبدالله عبدالله وايي، هېچا ته به اجازه ور نه کړي، چې قومي تعصبونو ته لمن ووهي.
عبدالله دا څرګندونې د غبرګولي په ٣مه پکتيا ولايت کې د يوې غونډې پر مهال وکړې.
دغه غونډه د ګردېز ښار په مرکزي لوبغالي کې جوړه شوې وه، چې د نوموړي کانديد پر مرستيالانو او هغه ته نږدې مشرانو سربېره په کې سلګونه ځايي اوسېدونکو برخه اخيستې وه.
په غونډه کې ويناوالو د همپالنې پر مسايلو خبرې وکړې او له خلکو څخه يې وغوښتل، چې په دويم پړاو ټاکنو کې پراخه ونډه واخلي او د اصلاحاتو او همپالنې ټېم ته رايه ورکړي.

ګردېز-اروزګان (پژواک ١٢ ورى ٩٣): د ولسمشرۍ نوماند ګل اغا شېرزي دولت تورن کړ، چې د يوه مشخص کانديد په ګټه د دولتي امکانانو د کارونې مخنيوى نه کوي.
شېرزي، چې نن (د وري ١٢مه) يې پکتيا ولايت ته سفر کړى و، د يوې غونډې پر مهال خپلو پلويانو ته په خبرو کې تر ډېر د يو شمېر نورو کاندېدانو پر کړو نيوکې وکړې.
نوموړي په خپلو خبرو کې وويل: ((ولسمشر د زلمي رسول په ګټه کار کوي او د هغو دولتي چارواکو پر کړونو چوپه خوله دی، چې په ښکاره دغه نوماند ته دولتي امکانات کاروي.))

ګردېز (پژواک،٥ورى٩٣): د ولسمشرۍ نوماند اشرف غني احمدزي له افغانانو غوښتنه وکړه، چې په ټاکنو کې د ګډون تر څنګ په خپلو سيمو کې د ټاکنيزو درغليو مخنيوى وکړي.
اشرف غني احمدزي دا څرګندونې د وري په ٥مه پکتيا ولايت ته د خپل سفر او دلته د هغه په ملاتړ يوې غونډې ته د وينا پر مهال وکړې.
په هغې غونډه کې، چې د ګردېز ښار په يوه لوبغالي کې جوړه شوې وه، له دې ولايت سربېره دخوست او لوګر ولايتونو زرګونو کسانو برخه اخيستې وه.

ګردېز ( پژواک، ٢ ورى ٩٣ ) : دپکتيا په مرکز ګردېز ښار کې د ولسمشرۍ د کانديد ډاکټر زلمي رسول په ملاتړ لويه غونډه کې د زرګونو کسانو ترڅنګ دولتي کسانو هم برخه اخيستې وه.
ددې ولايت اوسېدونکي ادعاکوي ،چې ددې ولايت دبېلابېلو ادارو له خوا دې ته اړ شوي وو ،چې دې غونډې ته کسان ورولي او هم په خپله ورشي .
ددې ولايت ديوشمېر ښوونځيو زده کوونکو له رسنيو سره په خبرو کې وويل ، چې د معارف پروګرامونو د پيل کېدو په نوم وربلل شوي وو، خو سهار د مديرانو له خوا ورته ويل شوي ، چې دوی د زلمي رسول غونډې ته د والي په غوښتنه بايد حتمي ورشي .