Paktia

 
ګردېز (پژواک ١٣ ورى ٩٣): د پکتيا ولايت ځينې اوسېدونکي او د ولايتي شورا يو شمېر کانديدان وايي، چې د ټاکنيزو منډو ترړو په ترڅ کې د خلکو د پوهاوي په برخه کې ملي او په ځانګړې توګه سيمه ييزو رسنيو مثبت رول درلود.
دوی وايي، چې په تېرو څو مياشتو کې تر ډېره رسنيو په ټاکنيزو منډو ترړو کې دقيق، بې پرې او پر خپل وخت خبرونه، راپورونه او د عامه پوهاوي په اړه پروګرامونه خپاره کړي دي.
د ګردېز ښار يو اوسېدونکی نورولي وايي، چې په تېرو څو مياشتو کې دوی له تلوېزيوني، چاپي او صوتي رسنيو له لارې د ټاکنو په برخه کې ګټور پروګرامونه ليدلي او اورېدلي دي.

 
ګردېز-اروزګان (پژواک ١٢ ورى ٩٣): د ولسمشرۍ نوماند ګل اغا شېرزي دولت تورن کړ، چې د يوه مشخص کانديد په ګټه د دولتي امکانانو د کارونې مخنيوى نه کوي.
شېرزي، چې نن (د وري ١٢مه) يې پکتيا ولايت ته سفر کړى و، د يوې غونډې پر مهال خپلو پلويانو ته په خبرو کې تر ډېر د يو شمېر نورو کاندېدانو پر کړو نيوکې وکړې.
نوموړي په خپلو خبرو کې وويل: ((ولسمشر د زلمي رسول په ګټه کار کوي او د هغو دولتي چارواکو پر کړونو چوپه خوله دی، چې په ښکاره دغه نوماند ته دولتي امکانات کاروي.))

 
ګردېز (پژواک ١١ ورى ٩٣): د پکتيا ولايت چارواکي وايي، چې په ګردېز کې د سړک غاړې د ماين چاودنې څلور تنه وژلي دي.
چارواکي وايي، وژل شوي د ولايتي شورا د کانديد فضل الحق جيلان د کمپاين کارکوونکي او يو يې ورور دی.
د دغه ولايت امنيه قوماندان مل پاسوال زلمي اورياخېل د وري په ١١مه پژواک ته وويل، چې ياده پېښه نن ورځ شاوخوا لس بجې د ګردېز اړوند د شيخانو په سيمه کې رامنځته شوه.
نوموړی هم وايي، په يادو څلورو کسانو کې يو د ولايتي شورا د کانديد فضل الحق جيلان ورور دی، چې له يادې سيمې پر يوه موټرسايکل ښار ته روان وو.

 
ګردېز (پژواک ١٠ ورى ٩٣): په پکتيا ولايت کې بېلابېلو ادارو د يوه سيمينار په ترڅ کې د راتلونکو ټاکنو د ترسره کېدو په اړه خپل وروستی چمتووالی وښود.
په دغه يو ورځني سيمينار کې چې د وري په ١٠مه د پکتيا په امنيه قوماندانۍ کې جوړ شوی و، د ولسواليو امنيه قوماندانانو، د ملي اردو او ملي امنيت استازو، د ټاکنوکمېسيون، فيفا او يو شمېر نورو ادارو نماينده ګانو په کې برخه اخيستې وه.
په دغه سيمينار کې د دغو ادارو استازو د ټاکنو د ښو ترسره کېدو په اړه تر ډېره خپل چمتووالی وښود او وېې ويل ،چې هېڅ داسې کومه جدي ستونزه نشته ، چې ټاکنې وننګوي .