Konar

 
سعد اباد(پژواک،١٣زمرى٩٢): دکونړ چارواکي وايي، چې په دغه ولايت کې دسولې دعالي شورا يو غړى د ناپېژاندو وسله والو له خوا ووژل شو .
دکونړ والي شجاع الملک جلاله د زمري په ١٣مه پژواک خبري اژانس ته وويل، چې قومي مشر او د کونړ ولايت دسولې دعالي شورا غړى تاجبرخان نن په درېيو بجو د نورګل ولسوالۍ اړونده د سلامپور په سيمه کې د ناپيژاندو وسله والو له خوا په ډزو وژل شوى دى.
دکونړ والي  زياته کړه، دوه ناپېژانده وسله وال ، چې پر موټر سايکل سپاره وو، تاجبرخان يې په    داسې حال کې  پر ډزو وواژه، چې له جومات څخه کورته روان وو.

 
اسعد اباد، ميدانښار ( پژواک ٩ زمرى ٩٢ ) : د پرون ورځې تر باران وروسته راغلو سيلابونو په ميدان وردګو او کونړ ولايتونو کې خلکو ته درانه مالي زيانونه اړولي دي.
د کونړ د بېړنۍکمېټې مشر غلام علي ثبات وايي، چې  تېر ماښام د نرنګ ولسوالۍ  د کوټکي په سيمه کې د سخت اورښت له  امله  سيلابونه راغلي دي.
هغه د زمري په ٩مه، پژواک خبري اژانس ته وويل، چې د سيلابونو له امله شپېته کورونه ويجاړ شوي  او کرنيزې ځمکې يې هم زيانمنې کړې دي.
نوموړي زياته کړه، چې د دوی د ادارې له خوا په سيمه کې  سروې  روانه  ده، تر څو  کره مالومات  ترلاسه کړي .

 
اسعداباد(پژواک، ٨ زمرى٩٢): دکونړ چارواکي وايي، چې په دغه ولايت کې د بهرنيو ځواکونو په  هوايي بريد کې شپږ وسله والو طالبان وژل شوي دي.
دکونړ امنيه قوماندان عبدالحبيب سيدخېلي پژواک خبري اژانس ته وويل، چې تېره شپه دکونړ ولايت د مرورې ولسوالۍ اړوند د بچې په سيمه کې بهرنيو ځواکونو پر وسله والو طالبانو هوايي بريد وکړ.
دده په وينا، په دغه بريد کې د قاري شاهدالله په نوم د طالبانو يو سرګروپ له خپلو پنځو ملګرو سره وژل شوى دى.
خو د وسله والو طالبانو يو وياند ذبيح الله مجاهد وايي، چې  له يادې پېښې نه دى خبر.