Konar

 
کابل (پژواک ٢٤  چنګاښ ٩٢): د کونړ ولايت يو تن مخور او د ولسمشر سلاکار شجاع الملک جلاله د کونړ د نوي والي په توګه وټاکل شو.
تېره اونۍ د کونړ والي سيد فضل الله وحيدي د هرات د نوي والي په توګه ټاکل شوى و، خو د کونړ لپاره د نوي والي اعلان نه و شوى.
د چارو ادارې له خوا د چنګاښ په ٢٤مه پژواک خبري اژانس ته په يوه رالېږل شوې خبرپاڼه کې راغلي، چې شجاع الملک جلاله د کونړ د نوي والي په توګه ټاکل شوى دى.
سرچينې زياته کړې، چې د سيمه ييزو ارګانونو د خپلواکې ادارې په وړانديز او د ولسمشر د حکم له مخې جلاله د مافوق رتبې په بست کې د کونړ د والي په توګه ټاکل شوى دى.

 
اسعد اباد (پژاک ٢٣ چنګاښ ٩٢): د کونړ د ولايت مقام اجرائيه مدير د تراوېح له لمانځه وروسته د وسله والو له خواپر ډزو وژل شوى دى.
د کونړ مرستيال والي قاضي محمدنبي احمدي د چنګاښ په ٢٣مه پژواک خبري اژانس ته وويل، چې  تېره شپه د ولايت مقام د مرستيال اجرائيه مدير راضي خان د وټه پور ولسوالۍ د کورباغ په سيمه کې له تراوېح وروسته خپل کور ته روان و، چې تر بريد لاندې راغى.
نوموړى وايي، د يو داسې چا وژنه چې د خداى کور ته د عبادت لپاره تللى وي، غيرې اخلاقي او غيرې اسلامي او د غندلو وړ کار دى.

اسعداباد (پژواک ١٠ چنګاښ ٩٢): د کونړ شيګل او سرکاڼو ولسوالۍ يو ځل بيا د پاکستاني ځواکونو له خوا په تېرو ٢٤ ساعتونو کې ٩٠ توغندي ويشتل شوې دي.
د کونړ والي سيد فضل الله وحيدي د چنګاښ په ١٠مه پژواک اژانس ته وويل، چې ٦٠ توغندي د شېګل په شولتن دره او ٣٠ نور د سرکاڼو په شونکړۍ سيمه کې لګېدلي دي.
د نوموړي په وينا، دغه توغندي د سر زيان نه لري، خو خلکو ته يې مالي زيان اړولى او ډېرى فصلونه يې خراب کړي دي.
وحيدي پر کونړ ويشتل شوي توغندي د افغانستان پر خاوره تېرى وباله او له نړيوالې ټولنې يې غوښتنه وکړه، چې د پاکستان د تېري مخه ونيسي.