Konar ټاکنیز خبرونه

اسعداباد (پژواک، ١٢ تله ٩٤): د کونړ والي وايي، څوک چې فساد کوي له هغوى سره به قانوني چلند وکړي.
وحيدالله کليمزى دغه څرګندونې د دغه ولايت د ولسوالانو ، ولايتي شورا غړو، سولې شورا،د ولايت د مرکز او ولسواليو له پرمختيايي او ټولنيزو شوراګانو سره په ګډه جوړې شوې مشورتي غونډه کې کې وکړې.
هغه زياته کړه، هر هغه څوک چې له دولت او ولس سره خيانت کوي او ګډوډيو ته لار هواروي، قانوني چلند به ورسره شي.
د نوموړي په وينا، امنيتي او کشفي ارګانونو ته يې دندې سپارلې چې څو هغه کسان چې په فساد، دولت او ولس ته په خيانت تورن وپېژندل شي، د قانون منګولو ته يې وسپاري.

اسعداباد (پژواک، د وږي لومړۍ نېټه ٩٤): د کونړ په څوکۍ ولسوالۍ کې د دوو کورنيو تر منځ پنځه ويشت کلنې دښمنۍ ته د پاى ټکى کېښودل شو.
د کونړ د ولايتي شورا مشر دين محمد ســـاپي پژواک خبري اژانس ته وويل چې دغه دواړه کورنۍ د څوکۍ ولسوالۍ د ديوګل درې د پادينزو سيمې اوسېدونکي دي.
هغه زياته کړه: ((دغه دواړه کورنۍ په خپلو کې سره تره زامن دي خو  ٢٥ کاله وړاندې د دې دوو کورنيو تر منځ د  يوې ټوټې ځمکې پر سر دښمني پيدا شوه.))
هغه وايي چې په دې موده کې له دواړو لورو ٦ تنه وژل شوي او لس نور ټپيان شوي دي.

اسعداباد(پژواک،١٧زمرى٩٤): د کونړ والي وايي چې پاکستاني پوځيانو يو ځل بيا د دې ولايت پر درېيو ولسواليو د توغنديو بريدونه کړي دي.
له تېرو پنځو کلونو راهيسې دپاکستان له خاورې د افغانستان پر ځينو سرحدي سيمو په وقفه يي توګه  توغندويي بريدونه کيږي ،چې له امله يې سلګونو تنو ته مرګ ژوبله اوښتې او خلک يې د سيمې پرېښودو ته اړ کړي دي.
د کونړ والي وحيدالله کليمزي د زمري په ١٧ مه په اسعد اباد ښار کې يوې خبرې ناستې ته وويل چې پاکستاني پوځيانو يو ځل بيا د کونړ پر دانګام، ناړۍ او سرکاڼو سرحدي ولسواليو  د توغنديو بريدونه کړي دي.

اسعداباد (پژواک، ١١ زمرى ٩٤): د کونړ ولايت د ځينو سيمو له سېلاب ځپلو کورنيو سره د خوراکي او غير خوراکي توکو مرستې وشوې.
د کونړ د چارواکو د معلوماتو له مخې، د وروستيو ورښتونو له امله د دغه ولايت په ناړۍ، چپه دره، سرکاڼو، خاص کونړ، نرنګ، غازي اباد، اسمار، شــــیګل او وټه پور ولسوالیو کې سېلابونه راغلي دي.
د خوړو نړيوال سازمان او ځينو نورو خيريه بنسټونو له لوري د زمري په ١١مه د کونړ له ١٤٢ سېلاب ځپلو کورنيو سره د خوراکي او غير خوراکي توکو مرستې وشوې.