Konar د ولايتي شوراګانو ټاکنې

اسعداباد (پژواک، ١٢ تله ٩٤): د کونړ والي وايي، څوک چې فساد کوي له هغوى سره به قانوني چلند وکړي.
وحيدالله کليمزى دغه څرګندونې د دغه ولايت د ولسوالانو ، ولايتي شورا غړو، سولې شورا،د ولايت د مرکز او ولسواليو له پرمختيايي او ټولنيزو شوراګانو سره په ګډه جوړې شوې مشورتي غونډه کې کې وکړې.
هغه زياته کړه، هر هغه څوک چې له دولت او ولس سره خيانت کوي او ګډوډيو ته لار هواروي، قانوني چلند به ورسره شي.
د نوموړي په وينا، امنيتي او کشفي ارګانونو ته يې دندې سپارلې چې څو هغه کسان چې په فساد، دولت او ولس ته په خيانت تورن وپېژندل شي، د قانون منګولو ته يې وسپاري.

کندوز(پژواک، ١٢ وږى ٩٤): په کندوز کې سلګونو کسانو ديوې غونډې په ترڅ کې امنيتي وضعيت د اندېښنې وړ وباله او له حکومت يې غوښتنه وکړه چې جنرال دوستم دې په دغه ولايت کې د جګړې د مشرۍ لپاره ور واستول شي.
د ولسمشر لومړى مرستيال جنرال عبدالرشيد دوستم تېره مياشت فارياب ولايت ته لاړ او د جګړې د مشرۍ په اخيستلو سره يې د قيصار او المار ګڼ شمېر سيمې د وسله والو مخالفينو له واک نه وويستلې.
هغه چې اوس کابل ته راستون شوى، له طالبانو يې غوښتنه کړې چې خپلې وسلې پر ځمکه کېږدي او له جګړې لاس واخلي، که نه له دې پرته به وځپل شي.

اسعداباد (پژواک، د وږي لومړۍ نېټه ٩٤): د کونړ په څوکۍ ولسوالۍ کې د دوو کورنيو تر منځ پنځه ويشت کلنې دښمنۍ ته د پاى ټکى کېښودل شو.
د کونړ د ولايتي شورا مشر دين محمد ســـاپي پژواک خبري اژانس ته وويل چې دغه دواړه کورنۍ د څوکۍ ولسوالۍ د ديوګل درې د پادينزو سيمې اوسېدونکي دي.
هغه زياته کړه: ((دغه دواړه کورنۍ په خپلو کې سره تره زامن دي خو ٢٥ کاله وړاندې د دې دوو کورنيو تر منځ د يوې ټوټې ځمکې پر سر دښمني پيدا شوه.))
هغه وايي چې په دې موده کې له دواړو لورو ٦ تنه وژل شوي او لس نور ټپيان شوي دي.

کلات- اسعداباد (پژواک، ١٨ زمرى ٩٤): په زابل او کونړ ولايتونو کې سلګونو خلکو د لاريوونو په ترڅ کې وروستۍ امنيتي پېښې وغندلې او د پاکستان پر ضد يې شعارونه ورکول.
د زابل ولايت سلګونو اوسېدونکو د زمري په ١٨مه د افغان امنيتي ځواکونو په ملاتړ غونډه وکړه او د دغو ځواکونو کارونه يې وستايل، تر غونډې وروسته ګډونوالو د پاکستان پر وړاندي لاريون وکړ او د دغه هېواد استخبارات يې پر وروستيو بريدونو تورن وبلل.
په دې غونډه او لاريون کې د دغه ولايت د والي او خلکو تر څنګ د ولايتي شورا غړو، قومي مشرانو او د مدني ټولنې غړو برخه اخيستې وه.

اسعداباد، ميدان وردګ (پژواک ١١ زمرى ٩٤): د کونړ او ميدان وردګو ولايتونو يو شمېر علماوو د طالبانو له نوي مشره وغوښتل، چې د سولې روانو خبرو ته غاړه کېږدي.
د کونړ د ولايتي شورا غړي محمد ساپي، د علماوو شورا مشر مولوي عبدالرحمن، د سولې شورا مشر محمد اسماعيل، قومي مشر محمد روزي په يوه ګډه خبري ناسته کې وويل، چې سوله د اسلام حکم دى او دواړه لوري هم مسلمانان دي او هر هغه څوک چې يو اسلامي حکم نه په ځاى کوي، هغه د اسلامي له دايرې وځي.

اسعد اباد (پژواک، ٣ زمرى ٩٤): د کونړ د ولايتي شورا پخوانى رييس ميا حسن عادل د ناپېژاندو وسله والو له خوا وژل شوى دى.
د کونړ امنيه قوماندان مل پاسوال عبدالحبيب سيدخېل د زمري په ٣مه، پژواک خبري اژانس سره په خبرو کې تاييد کړه، چې د ولايتي شورا پخوانى مشر ميا حسن عادل وژل شوى دى.
خو هغه زياته کړه، تراوسه پورې د هغه جسد د امنيتي ځواکونو او يا د هغه کورنۍ ته په لاس نه دى ورغلى، خو هڅه کوي د ننګرهار د خېوې ولسوالۍ په مربوطاتو کې يې پيدا کړي.
ميا حسن عادل په تېره دوره کې د کونړ د ولايتي شورا رييس و او د دې ولايت د ماڼوګي ولسوالۍ د برکندي د کلي اوسېدونکى و.

اسعد اباد ( پژواک، ١٢ غبرګولى ٩٤ ) : د کونړ ولايت سلګونو اوسېدونکو د يوه لاريون په ترڅ کې د برما پر مسلمانانو کېدونکي ظلمونه وغندل.
برما چې د سوېلي اسيا هېواد دى، له تېرو څو کلونو راهيسې بودايانو پر مسلمانانو ظلمونه پيل کړي دي.
د کونړ د ولايتي شورا او ځوانانو شورا له خوا د غبرګولي په ١٢مه، تر غرمې وروسته د ياد هېواد د ظلمونو پر ضد لاريون وشو.
په دې لاريون کې چې شاوخوا ٤٠٠ تنو برخه اخيستې وه، د برما د حکومت پر ضد يې شعاورنه ورکول .

اسعداباد (پژواک، ٤ غبرګولى ٩٤): د کونړ د ولايتي شورا رييس وايي، په تېرو شپږو مياشتو کې د ډېرو لاسته راوړنو ترڅنګ له خلکو او ولايتي ادارې سره يې ښې اړيکې جوړې کړې دي.
د ولايتي شورا رييس دين محمد پيلوټ ساپي له پژواک خبري اژانس سره په ځانګړې مرکه کې وويل چې په تېرو شپږو مياشتو کې يې ډېره پاملرنه د خلکو د ستونزو اورېدو او ورته د هواري د لارو چارو موندلو ته کړې ده.
هغه زياته کړه: ((موږ هڅه کوو چې د ولس او دولت تر منځ شته واټن راکم کړو چې په تېرو څو کلونو کې د خلکو د زياتو ستونزو له امله دا واټن زيات شوى و.))

اسعداباد (پژواک، ٤ ورى ٩٤): د کونړ د دانګام ولسوالۍ اوسېدونکي وايي، چې که حکومت په سيمه کې د ښوونځي لپاره ودانۍ جوړه نه کړي، نو ورته ځانګړې کړې ځمکه به بېرته ترې وګرځوي.
د دانګام ولسوالۍ د بيداد سيمې د نجونو ښوونځې قرارداد په پلازمېنه کابل کې شوى چې د څلورو کلونو راهيسې يې رغنيزې چارې په ټپه ولاړې دي.
د بيداد اوسېدونکی اعتبارخان چې ياد ښوونځي لپاره يې خپله يو جريب ځمکه ورکړې، پژواک خبري اژانس ته وويل چې له څلورو کلونو راهيسې د دغه ښوونځي د ودانۍ جوړولو چارې درېدلې دي.

اسعداباد (پژواک، ٢٦ لېندۍ ٩٣): د کونړ په مرکز اسعداباد کې د ولايتي شورا د دفتر مخې ته د هاوان مرمۍ لګېدو له امله پنځه تنه ټپيان شوي دي.
د کونړ د ولايتي شورا مرستيال جمال الدين د لېندۍ په ٢٦مه پژواک خبري اژانس ته وويل چې دغه بريد نن غرمه شاوخوا دوولس نيمې بجې شوى و.
هغه زياته کړه چې وسله والو مخالفينو د وټه پور ولسوالۍ له لوري د ولايت پر مرکز د هاوان مرمۍ توغولې وه.
دى وايي چې يوه مرمۍ د ولايتي شورا ودانۍ مخې ته ولګېده چې له امله يې پنځه تنه ټپيان شوي دي.
د جمال الدين په وينا، په ټپيانو کې څلور مراجعين او يو تن د ولايتي شورا د يوه وکيل زوى دى.