Helmand

 
لښکرګاه(پژواک ۲٧غبرګولى۹۳)په هلمند کې د ډاکټر عبدالله دکمپاین مسوول معلم ميرولي هغه تورونه رد کړل،چې ګنې په ټاکنو کې يې درغلۍ کړې دي.
نوموړي په همدې تړاو جوړه شوې غونډه کې وويل، چې د دې ولايت د ټاکنو کمېسیون په ناحقه سره تورن کړى، چې په  ګرشک ولسوالۍ کې يې د  ډاکټر عبدالله په ګټه صندوقونه ډک کړي دي.
د هلمند د ټاکنو خپلواک کمېسيون رييس د ټاکنو په ورځ ويلي و، معلم ميرولي او زوى يې،  چې د ګرشک امنيه قوماندان دى؛ له خپلې دندې په استفادې په ټاکنو کې درغلۍ کړې دي.

ښکرګاه(پژواک ٢٤غبرګولى٩٣):د هلمندد ټاکنو کمېسيون وايي، چې د ګرشک ولسوالۍ امنيه قوماندان دويم څارن حکمت الله حقمل د يوه مشخص کانديد په ګټه درغلي پيل کړې ده.
د دې کمېسيون رييس قدرت الله نقشبندي پژواک خبري اژانس ته وويل،دغه قوماندان  د پوليسو په موټرو کې خلک راانتقالوي،رايې پاڼې په زور اخلي او د ګوتې له رنګ کولو پرته يې د يوه مشخص کانديد په ګټه کاروي.
هغه د ولسمشرۍ دغه مشخص کانديد ډاکټر عبدالله عبدالله ياد کړ، چې دا کسان يې په ګټه درغلي کوي.
ده وويل،چې يو شمېر مېرمنو هم په دې ولسوالۍ کې د درغليو چارې پيل کړي  ؛ خو په دې تړاو يې ډېر څه ونه ويل.

لښکرګاه (پژواک ٢٤ غبرګولى ٩٣): د هلمند چارواکي وايي چې د تېرو ټاکنو په پرتله په دويم پړاو ټاکنو کې د هلمنديانو ونډه ډېره ده.
په دغه ولايت کې د رايې ورکولو ټول مرکزونه پرانيستې دي.
د هلمند والي جنرال محمدنعيم د غبرګولي په ٢٤مه پژواک خبري اژانس ته وويل، چې په دغه ولايت کې نن سهار اوه بجې د رايې ورکولو لړۍ پيل شوې ده.
والي وويل، چې د رايې ورکولو د ټولو مرکزونو امنيت خوندي دى او په ټاکنو کې د خلکو ونډه بې سارې ده.
په تېرو ټاکنو کې د هلمند يو سل او لس زره اوسېدونکو ګډون کړى وو.