Helmand ټاکنیز خبرونه

کابل (پژواک، ۲۷ وری ۹۸): د ټاکنو خپلواک کمېسیون د هلمند ولایت د ولسي جرګې د ټاکنو وروستۍ پایلې اعلان کړې خو د کوچیانو حوزې په ګډون یې د  شپږو نورو ولایتونو د ولسي جرګې د ټاکنو وروستۍ پایلې لا هم نه دي اعلان کړې.
د ټاکنو خپلواک کمېسیون د اعلان پر اساس، ظفر صادقي، حاجي غلام‌‌ ولي افغان، میرویس خادم، الحاج محمد کریم اتل، عبدالرشید عزیزي، شېرمحمد اخندزاده، نسیمه نیازۍ او شګوفه نورزۍ له هلمند ولایته ولسي جرګې ته بریالي شوي دي.
له غزني ولایت پرته په ټول هېواد کې د ولسي جرګې ټاکنې د تلې په ۲۸مه او ۲۹مه ترسره شوې.

لښکرګاه (پژواک، ۹ مرغومی ۹۴): د هلمند د ولايتي شورا ريیس او قومي مشران وايي که د دغه ولايت د امنيت د ټينګښت په برخه کې بې غوري وشي نو ډېرې بدې پايلې به ولري.
د هلمند د ولايتي شورا مشر کریم خان اتل د مرغومي په ٩مه پژواک خبري اژانس ته وويل چې په دغه ولايت کې ورځ تر بلې جګړه زور اخلي، خو امنيتي چارواکي يې پر وړاندې بې پروايي کوي.
هغه وايي چې د دغه ولايت د امنيت د ټينګښت لپاره يواځې د کاغذ پر مخ ليکنې شوې په عملي بڼه هېڅ هم نه دي شوي.
هغه وايي چې په تېرو ورځو کې له سلو کسانو پرته نور تازه دمي سرتېري د دغه ولايت هېڅ سيمې ته نه دي استول شوي.

لښکرګاه(پژواک،٣لړم۹۴): د هلمند امنيتي چارواکي وايي چې په مرکزي سيمو کې جګړه د مهار کېدو په حال کې ده ، خو د ولايتي شورا مشر وايي چې دې جګړې ته بايد جدي پاملرنه وشي.
څو ورځې وړاندې وسله والو طالبانو د هلمند مرکز لښکرګاه پر باباجي سيمې او د نادعلي او ګرشک ولسواليو پر ځينو سيمو بريدونه وکړل چې له امله يې يو شمېر امنيتي پوستو د طالبانو په لاس سقوط وکړ.
په دې وروستيو کې بهرنيو ځواکونو هم د افغان ځواکونو په ملاتړ پر لښکرګاه ښار او ځينو نورو سيمو کې هوايي بريدونه پيل کړي دي.

لښکرګاه (پژواک، ۱۸ تلى ۹۴): د هلمند والي وايي چې په ګرمسېر ولسوالۍ کې يو شمېر کسانو دولتي ځمکې غصب کړې چې له امله يې امنيتي او نورې ستونزې پيدا شوې دي.
د هلمند والي ميرزاخان رحيمي په ګرمسېر ولسوالۍ کې د يوې لويې غونډې په ترڅ کې وويل چې په دې وروستيو کې د ګرمسېر ولسوالۍ يو شمېر اوسېدونکو پر خپل سر دولتي ځمکې نيولې دي.
هغه زياته کړه: ((تر کومه به دا د ځمکو ستونزې روانې وي، راځئ چې د دولتي ځمکو ستونزې ته د حل قانوني لاره پیدا کړو؛ ځکه همدې ځمکو ګڼې امنیتي او نورې ستونزې راپورته کړې دي.))