Helmand د ولايتي شوراګانو ټاکنې

لښکرګاه (پژواک، ۹ مرغومی ۹۴): د هلمند د ولايتي شورا ريیس او قومي مشران وايي که د دغه ولايت د امنيت د ټينګښت په برخه کې بې غوري وشي نو ډېرې بدې پايلې به ولري.
د هلمند د ولايتي شورا مشر کریم خان اتل د مرغومي په ٩مه پژواک خبري اژانس ته وويل چې په دغه ولايت کې ورځ تر بلې جګړه زور اخلي، خو امنيتي چارواکي يې پر وړاندې بې پروايي کوي.
هغه وايي چې د دغه ولايت د امنيت د ټينګښت لپاره يواځې د کاغذ پر مخ ليکنې شوې په عملي بڼه هېڅ هم نه دي شوي.
هغه وايي چې په تېرو ورځو کې له سلو کسانو پرته نور تازه دمي سرتېري د دغه ولايت هېڅ سيمې ته نه دي استول شوي.

لښکرګاه(پژواک،٣لړم۹۴): د هلمند امنيتي چارواکي وايي چې په مرکزي سيمو کې جګړه د مهار کېدو په حال کې ده ، خو د ولايتي شورا مشر وايي چې دې جګړې ته بايد جدي پاملرنه وشي.
څو ورځې وړاندې وسله والو طالبانو د هلمند مرکز لښکرګاه پر باباجي سيمې او د نادعلي او ګرشک ولسواليو پر ځينو سيمو بريدونه وکړل چې له امله يې يو شمېر امنيتي پوستو د طالبانو په لاس سقوط وکړ.
په دې وروستيو کې بهرنيو ځواکونو هم د افغان ځواکونو په ملاتړ پر لښکرګاه ښار او ځينو نورو سيمو کې هوايي بريدونه پيل کړي دي.

لښکرګاه (پژواک، ۲۱ تله ۹۴): د هلمند دولتي چارواکي وايي، په نظام کې دننه يو شمېر مافيايي کړۍ شتون لري چې د حکومت د کمزورتيا هڅې کوي.
د هلمند د ولايتي شورا مشر محمدکريم اتل د تلې په ٢١مه د يوې خبرې غونډې په ترڅ کې وويل چې په نظام کې يو شمېر مافيايې کړيو د ځان د ګټو خونديتوب لپاره د حکومت د کمزورتيا هڅې پيل کړې دي.
د هغه په وينا، يادو کړيو په دې وروستيو کې اوازې خپرې کړې چې وسله وال طالبان پر لښکرګاه بريد کوي او هلمند ولايت ته سقوط ورکوي.

لښکرګاه (پژواک، ۱۸ تلى ۹۴): د هلمند والي وايي چې په ګرمسېر ولسوالۍ کې يو شمېر کسانو دولتي ځمکې غصب کړې چې له امله يې امنيتي او نورې ستونزې پيدا شوې دي.
د هلمند والي ميرزاخان رحيمي په ګرمسېر ولسوالۍ کې د يوې لويې غونډې په ترڅ کې وويل چې په دې وروستيو کې د ګرمسېر ولسوالۍ يو شمېر اوسېدونکو پر خپل سر دولتي ځمکې نيولې دي.
هغه زياته کړه: ((تر کومه به دا د ځمکو ستونزې روانې وي، راځئ چې د دولتي ځمکو ستونزې ته د حل قانوني لاره پیدا کړو؛ ځکه همدې ځمکو ګڼې امنیتي او نورې ستونزې راپورته کړې دي.))

لښکرګاه- ښرنه (پژواک، ٨ تله ۹۴): په هلمند ولايت کې د داعش او طالب وسله والو تر منځ نښته شوې چې دواړو لورو ته په کې مرګ ژوبله اوښتې بلخوا په پکتيکا ولايت کې څلور پوليس وژل شوي دي.
د هلمند امنیه قوماندان مل پاسوال نبي جان ملاخېل د وږى په ٨مه د يوې خبري غونډې پر مهال وويل چې پرون د کجکي ولسوالۍ په ده بابا، لوړه نيچه، اډه او ځينو نورو سيمو کې د طالبانو او داعش تر منځ جګړې شوې ده.
هغه وايي چې په دې نښو کې تر اوسه شپږ د داعش ډلې غړي وژل شوي، څلور نور ټپيان دي او يو شمېر نور ژوندي نيول شوي دي.
ده زياته کړه چې په دې جګړه کې دوه طالبان وژل شوي او يو شمېر نور ټپيان دي.

لښکرګاه (پژواک، ۲۸ وږی ۹۴): د هلمند چارواکي وايي چې د دغه ولايت په موسى کلا ولسوالۍ کې يې د پوځي عملياتو په ترڅ کې طالبان له مرکزي سيمو شا تګ ته اړ کړي دي.
دا په داسې حال کې ده چې شاوخوا دوه اوونۍ وړاندې وسله والو طالبانو د هلمند د موسى کلا ولسوالۍ د نيولو ادعا کړې وه.
خو د هلمند والي ميرزا خان رحيمي د وږي په ٢٨مه پژواک خبري اژانس ته وويل چې په تېرو دوو ورځو کې امنيتي ځواکونو په موسې کلا ولسوالۍ کې چاڼيز عمليات کړي دي.
هغه وايي چې د دغو عملياتو پر مهال طالبان د موسى کلا ولسوالۍ له مرکزي سيمو پر شا شوي دي.

لښکرګاه (پژواک، ۱۰ وږی ۹۴): د هلمند ولايت د بېلابېلو ولسواليو قومي مشران او دیني عالمان وايي چې اداري فساد او د سيمه ييزو چارواکو بې عدالتي په دغه ولايت کې د ناامنۍ لامل شوى دى.
د هلمند والي ميرزا خان رحيمي نن په لښکرګاه ښار کې له قومي مشرانو او ديني عالمانو سره د امنيتي حالاتو د کابو کولو په موخه ګډه غونډه درلوده.
د موسی کلا ولسوالۍ اوسېدونکي او دیني عالم مولوي مختاراحمد حقاني وويل چې د حالاتو د سمون په موخه بايد والي په دولتي ادارو کې بدلون راولي.

لښکرګاه (پژواک، ۷ وږی ۹۴): د هلمند ولايتي شورا او مدني بنسټونه وايي چې حکومت په دغه ولايت کې د امنيت د ټينګښت لپاره مشخصه کړنلاره نه لري؛ ځکه يې هره ورځ د نا امنيو کچه لوړېږي.
د هلمند د امنيت د ټينګښت په موخه تېره شپه د (هلمند څنګه ژرغولى شو) تر نامه لاندې خوځښت پيل شو.
د دغه خوځښت او د هلمند د ولايتي شورا مشر محمدکريم اتل وويل چې په دې وروستيو کې په ټول هلمند خو په ځانګړې توګه په شمالي ولسواليو کې امنيتي حالات تر پخوا ډېر ترينکلي شوي دي.
د هغه په اند، حکومت په هلمند کې د امنيت د ټينګښت لپاره روښانه کړنلاره نه لري نو ځکه ورځ تر بلې امنيت په خرابېدو دى.

لښکرګاه (پژواک، ٤ وږى ٩٤): د هلمند د ولايتي شورا رييس د موسى کلا پر سقوط د اندېښنې څرګندولو تر څنګ چارواکي پر بې پروايۍ تورن کړ او زياته يې کړه چې د تېرې شپې په جګړه کې ٢٥ سرتېري وژل شوي او ٤٠ نور ټپيان شوي دي.
د هلمند د ولايتي شورا رييس حاجي کريم اتل د وږي په ٤مه له پژواک خبري اژانس سره د خبرو پر مهال د موسى کلا پر سقوط اندېښنه وښوده او ويې ويل چې امنيتي ځواکونه له ولسوالۍ وتلي خو ملکي پرسونل له ټپيانو سره داسې يوې سيمې ته تللي چې امنيت يې خوندي نه دى.
د هغه په وينا، په دې سيمه کې اوس هم د دوى ژوند له ګواښ سره مخ دى.

لښکرګاه (پژواک، ٢ وږى ٩٤): د هلمند د موسى کلا ولسوال وايي چې دغه ولسوالي د وسله والو طالبانو له خوا کلابنده شوې او که بېړنۍ مرسته ور ونه رسېږي ډېر ژر به سقوط وکړي.
د موسى کلا ولسوال محمدشريف د وږي په ٢مه پژواک خبري اژانس ته وويل چې په دې ولسوالۍ کې امنيتي حالات ډېر ترينګلي شوي او تېره شپه هم دوه پوستې طالبانو نيولې دي.
ده وويل چې شاوخوا زرو طالبانو د ولسوالۍ په سل مترۍ کې کمين نيولى او ښايي شپې ته د ولسوالۍ پر ودانۍ بريد وکړي.
هغه زياته کړه: ((د طالبانو سرې قطعې، معراج قطعې او ذاکر قطعې د ولسوالۍ ودانۍ محاصره کړې ده او زموږ په سل مترۍ کې پراته دي.))