Helmand ټاکنيزې مبارزې

لومړى تعقيب-لښکرګاه(پژواک،٢٥تله٩٧): د ولسي جرګې غړى او نوماند عبدالجبار قهرمان په يوه چاودنه کې و وژل شو او اووه تنه نور ټپيان شول.
د هلمند د والي وياند عمرځواک د تلې په ٢٥مه پژواک خبري اژانس ته وويل چې نن له غرمې مخکې د ولسي جرګې د غړي او نوماند عبدالجبار قهرمان د ټاکنيز کمپاين په دفتر کې چاودنه وشوه.
ځواک وايي چې په دې پېښه کې خپله قهرمان وژل شوى او اووه تنه نور ټپيان شوي دي.
هغه وايي:((چاودېدونکي توکي د قهرمان د ناستې په کوچ کې ځاى پرځاى شوي وو چې چاودنه يې پرې وکړه.))

دويم تعقيب- لښکرګاه ښار (پژواک، ١٧ تله ٩٧): د هلمند په مرکز لښکرګاه کې د ولسي جرګې د يوه نوماند پر دفتر د ځانمرګي بريد له امله د نوماند په ګډون اته تنه وژل شوي او ١٢ نور ټپيان دي.
نن له غرمې وروسته شاوخوا دوه نيمې بجې د لښکرګاه ښار د لومړۍ حوزې په مربوطاتو کې د ولسي جرګې د نوماند صالح محمد اڅکزي دفتر ته څېرمه چاودنه وشوه.
د هلمند امنيه قوماندان تورن جنرال عبدالرزاق يعقوبي پژواک ته وويل چې په دې پېښه کې اووه کسان وژل شوي او ١٢ نور ټپيان دي.
بل لورته د هلمند والي محمد ياسين خان وايي چې په دې پېښه کې د صالح محمد اڅکزي په ګډون اته تنه وژل شوي او ١١ نور ټپيان دي.

لښکرګاه-جلال اباد-اسعداباد (پژواک ١۱ ورى ۹۳): د ټاکنو د نېټې له رانږدې کېدو سره سم په ولايتونو کې د ولسمشرۍ د کانديدانو کمپايني غونډو زور اخيستى دى.په يو شمېر ولايتونو کې د وري په ١١مه د ولسمشرۍ د کانديدانو، ډاکټر اشرف غني احمدزي، استاد سياف، ګلا اغا شېرزي ، ډاکټر عبدالله عبدالله او زلمي رسول په ملاتړ غونډې وشوې.
د هلمند په لښکرګاه کې د سلګونو کسانو په ګډون غونډه جوړه شوې وه ، د عليزيو، بلوچو او نورزيو قومونو په کې د ولسمشرۍ له کانديد ډاکتر اشرف غني احمدزي څخه ملاټر اعلان کړ.

کابل- لښکرګاه (پژواک ٧ ورى ٩٣): په کابل او هلمند او کونړ ولايتونو کې د زلمي رسول او اشرف غني احمدزي او عبدالله عبدالله په ملاتړ غونډې وشوې .
د کابل د وزيراباد شورا، د تايمني او قلعه فتح الله سيمې يو شمېر اوسېدونکو نن (د وري ٧مه) د يوې غونډې په ترڅ کې د زلمي رسول په ملاتړ غونډه وکړه.
دغه غونډه چې شاوخوا ٤٠٠ کسانو برخه په کې اخيستې وه، ګډنوالو يې له خلکو غوښتنه وکړه، چې په راتلونکو ټاکنو کې زلمي رسول ته رايه ورکړي.
د وزير اباد شورا رييس انجينر بسم الله په خپلو خبرو کې وويل: ((له زياتو ارزونو وروسته پوه شوو، چې زلمى رسول د افغانستان د راتلونکې لپاره وړ کس دى.))

لښکرګاه-کونړ (پژواک ٦ ورى ۹۳): په هلمند او کونړ ولايتونو کې د اشرف غني، زلمي رسول، عبدرب الرسول سياف او ګل اغا شېرزي پر ملاتړ غونډې وشوې.
د هلمند په ګرشک ولسوالۍ کې سلګونه کسانو غونډه وکړه او په ترڅ کې يې د اشرف غني احمدزي ملاتړ اعلان کړ.
د ولسمشرۍ د ځينو کانديدانو پر ملاتړ غونډې وشوې
په دې غونډه کې، چې سلګونه تنو په کې برخه لرله، حاجي بسم الله روحاني د اشرف غني د ولايتي دفتر سرپرست وويل، چې د دغه ولايت اوسېدونکي تر ډېره د اشرف غني ملاتړ کوي.

لښكرګاه (پژواک ۲٥ كب ۹۲): د ولسمشرۍ کانديد زلمي رسول په هلمند كې د دوو غونډو په ترڅ کې ژمنه وکړه، چې د امنيت راوستو تر څنګ به د کجکي بند د برېښنا ظرفيت لوړ کړي.
د نوموړي په ملاتړ د کب په ٢٥مه لومړۍ غونډه د لښکرګاه ښار په کرزي لوبغالي او دويمه يې په عيدګاه جومات کې جوړې شوې، چې زرګونه پلويانو يې په کې ګډون درلود.
له زلمي رسول سره په دې غونډو کې د ده د دواړه مرستيالانو تر څنګ د هغه ملاتړي، قيوم كرزي او محمود كرزي هم ملګرتيا کوله.