Helmand

لښکرګاه (پژواک ۲۳ سلواغه ۹۳): په ملي شورا کې د هلمند استازي وايي، دغه ولايت د مرکزي حکومت له لوري له پامه غورځول شوى، چې له امله يې امنيت خراب شوى او د چارواکو په بدلون سره په کې امنيت نه شي راتلى.
يادې څرګندونې، نن د دې ولايت د ملي امنيت د نوي رييس بريدجنرال محمد امين قاضي زاده د پېژندنې په غونډه کې وشوې، چې شاوخوا ٣٠٠ تنو په کې ګډون کړى وو.
تر دې وړاندې، دغه دنده جنرال حمدالله نازک پر مخ بيوله.
په ولسي جرګه کې د هلمند د خلکو استازي عبدالحى اخندزاده وويل، مرکزي دولت هلمند له پامه غورځولى ؛ له همدې امله امنيتي حالات خراب شوي او اوس يې کابوکول ستونزمن کار دى.

لښکرګاه (پژواک، ٢٠ سلواغه ٩٣): سرچينې وايي چې په هلمند ولايت کې له وسله والو طالبانو بېل شوى قوماندان ملا عبدالرووف خادم په يوه بې پيلوټه بريد کې وژل شوى دى.
د هلمند مرستيال والي محمد جان رسوليار د سلواغې په ٢٠مه پژواک خبري اژانس ته وويل چې دا پېښه نن غرمه د کجکي ولسوالۍ په اذان سيمه کې رامنځته شوې ده.
هغه زياته کړه چې د بهرنيو ځواکونو يوې بې پيلوټه الوتکې پر يوه سراچه موټر بريد کړى چې په کې درې کسان وژل شوي او څو نور ټپيان دي.

لښکرګاه(پژواک١٠سلواغه٩٣): د هلمند ولايت مدني ټولنې وايي چې که له ولايتي شوراګانې څخه د سيمه ييزو ادارو  پر کړنو د څار واک واخيستل شي، نو په ولايتونو کې به د فساد کچه لوړه شي.
په هلمند کې د مدني ټولنو استازو وروسته تر هغه يادې څرګندونې وکړې،چې د ولسي جرګې د وړمې ورځې د پرېکړې له مخې، ولايتي شوراګانې تر دې وروسته د سيمه ييزو ادارو پر کړنو د څار حق نه لري.
د هلمند ولايت د مدني ټولنې مشر سردار محمد همدرد نن په لښکرګاه کې يوې خبرې غونډې ته وويل،چې له ولايتي شوراګانو څخه بايد د څارنې حق وانخيستل شي .

لښکرګاه (پژواک، ۷ سلواغه ۹۳): په هلمند کې سلګونه کسانو د يوه لاريون پر مهال د اداري فساد پر وړاندې د جدي مبازرې او امنيت راوستو غوښتنه وکړه.
دغه لاريون چې د يو شمېر قومي او پخواني جهادي مشرانو  له خوا رهبري کېده  په کې  له حکومته غوښتنه وشوه چې په نوي تشکيلاتو کې مسلکي او پر کار پوه کسان پر دندو وګوماري.
د مجاهدينو د واکمنۍ پر مهال د هلمند والي امير حفيظ الله خان حقيار د سلواغې په ٧مه د دغه لاريون په څنډه کې پژواک ته وويل چې حکومت بايد داسې کسان پر دندو وګوماري چې له فساد سره د مبازرې جوګه وي.