Ghazni

 
غزني (پژواک،٣۰ورى۹۳) : د غزني د ټاکنېزو شکاياتو کمېسيون مسوولين وايي، چې د ځينو شکايتونو پر بنسټ يې په دغه ولايت کې د ٩١ مرکزونو د رايې  صندوقونه قرنطين کړل.
ددغه کمېسيون کمېشنر احمدشاه وحدت د وري په ٣٠مه پژواک خبري اژانس ته وويل، دوى ته نږدې ۵۴ شکايتونه شوي، چې له دې ډلې ۱۷ يې د ولسمشرۍ او ۲۰ يې د غزني د ولايتې شورا له کانديدانو او۱۷ نور يې دټاکنو کمېسيون له کارکوونکو څخه شوي دي.

 
غزني ښار (پژواک ۲۸ وری ۹۳): د غزني د يو شمېر ولسواليو اوسېدونکي وايي چې په ټاکنو کې د برخه اخيستو له امله يې وسله وال طالبان ځوروي.
د دغه ولايت د ده يک ولسوالۍ د الوخېلو سيمې يوه اوسېدونکي محمدالله د وري په ٢٨مه پژواک خبري اژانس ته وويل چې په ټاکنو کې د رايې کارولو له امله د طالبانو له خوا ډبول شوى دى.
هغه زياته کړه: ((تر ټاکنو وروسته وسله وال طالبان زموږ کلي ته راغلل، زما په ګډون ډېرى خلک يې په دې وځورول او وډبول چې ولې مو په ټاکنو کې رايه کارولې ده.))
د محمدالله په وينا، په رڼا ورځ وسله وال طالبان کلي ته راځي او څه چې يې زړه وغواړي پر خلکو يې ترسره کوې.

 
غزني (پژواک ۱۸ورى۹۳):د غزني د ټاکنو او ټاکنيزو شکايتو کمېسيونونو چارواکي وايي، هغه شکايتونه بايد مستند شي چې په دغه ولايت کې د درغليو په اړه شوي دي.
د ټاکنو د شکايتونو کمېسيون کمېشنر عبدالقدير تګين د وري په ١٨مه پژواک خبري اژانس ته وويل، چې تر اوسه يې په غزني کې ۱۰۰ شکايتونه ثبت کړي دي.
تګين وايي، د ولسمشرۍ د ځينو نوماندانو له ټاکنيزو مرکزونو يې داسې شکايتونه ترلاسه کړي، چې ګني د غزني په يو شمېر ولسواليو کې ولسوالانو او امنيه قوماندانانو يو مشخص کانديد ته کار کړى او صندوقونه يې ورته ډک کړي دي.