Ghazni

غزني (پژواک، ٢٣ کب ٩٣): د غزني چارواکي وايي چې طالبانو د قره باغ ولسوالۍ پخوانى ولسوال او قومي مشر محمد حسن فيضي پر ډزو وژلى دى.
د  غزني ولايت وياند شفيق الله ننګ پژواک ته وويل چې فيضي نن د قره باغ ولسوالۍ په بازار کې هغه مهال ووژل شو چې کله له خپل موټره ښکته شو.
ننګ زياتوي چې د نوموړي په وژنه کې له بې غږه تومانچې کار اخيستل شوى دى.
د عبدالله په نوم د قره باغ يوه اوسېدونکي پژواک ته وويل چې دوو موټرسايکل سپرو پر محمد حسن فيضي ډزې وکړې او وروسته له سيمې وتښتېدل.
د عبدالله په خبره، کله چې پوليس سيمې ته ورسېدل، فيضي ساه ورکړې وه.

غزني ښار (پژواک ۳ کب ۹۳): په غزني کې د سوېډن کمېټې په مالي مرسته، ٦٠ ښځينه او نارينه معلوليت لرونکي کسان له نهه مياشتني مسلکي کورس څخه فارغ شول او د اړونده مسلک د پرمخ وړلو لپاره يې اړين وسايل هم ترلاسه کړل.
په غزني کې د دې کمېټې د معلولينو د برخې مسوول معلم فتح خان وايي، دا معلوليت لرونکي نارينه او ښځينه د غزني ښار د خواجه عمرو او اندړو ولسوالۍ اوسېدونکي دي، چې نهه مياشتې وړاندې په کورس کې شامل شوي وو.
هغه زياتوي، دغو شپېتو کسانو ته په حلبي سازۍ، خياطۍ، ترکاڼۍ، فلزکارۍ او د فرنېچر جوړولو په برخه کې زده کړه ورکړل شوې ده.