Ghazni

 
غزني (پژواک ١٦ چنګاښ ٩٢): د غزني د ده يک او زنخان ولسوالان د سړک غاړې په ماين چاودنه کې ټپيان شوي دي.
د غزني د ملکي روغتون رييس ډاکټر بازمحمد همت د چنګاښ په ١٦مه پژواک اژانس ته وويل، چې دغه پېښه شاوخوا څلور بجې د ده يک ولسوالۍ اړوند په خشک سيمه کې رامنځته شوې ده.
هغه زياته کړه، چې په دې پېښه کې د ده يک ولسوال حاجي فضل احمد او د زنخان ولسوال شېرخان يوسفزى ټپيان او په غزني کې يې د پي ار ټي روغتون ته ولېږدول.
د ده په خبره، چې په ملکي روغتون کې د هغوى د درملنې امکانات نه و.
همت زياتوي، چې په چاودنه کې د هغوى يو ساتونکى وژل شوى او دوه نور ټپيان دي.

 
غزني (پژواک ١٦ چنګاښ ٩٢): چارواکي وايي، چې د وسله والو طالبانو له لوري د غزني د اندړو ولسوالۍ په يوه جومات کې اېښودل شوو چاودېدونکو توکو چاودنه کړې، چې له امله يې جومات  نړېدلى او څلور تنه ټپيان شوي دي.
د اندړو ولسوال قاسم ديسي وال د چنګاښ په ١٦مه پژواک اژانس ته وويل، چې دغه پېښه تېره شپه د لغړو په کلي کې رامنځ ته شوې ده.
نوموړى وايي، چې د دې پېښې په غبرګون د کلي سلګونه خلک، ځوانان او سپين ږيري د طالبانو خلاف لاريون ته راوتلي دي.

 
غزني (پژواک ۱۵ چنګاښ ۹۲): د غزني والي موسى خان اکبرزاده له طالبانو غوښتنه وکړه، که په ريښتيا سوله غواړي نو د قطر پر ځاى دې د خبرو لپاره د اسلامي فرهنګ او تمدن په پلازمېنه غزني ښار کې دفتر پرانيزي.
نوموړي دغه خبرې نن (د چنګاښ ١٥مه) په غزني ښار کې د قومونو د پيوستون شورا په غونډه کې وکړې.
په دې غونډه کې د ميدان وردګو، پکتيا، پکتيکا، خوست او زابل ولايتونو لسګونه قومي مشرانو او د سياسي ګوندونو استازو ګډون کړى و.
اکبرزاده وايي، که طالبان د بهرنيانو شتون بهانه کوي، نو دوى په قطر کې د چا په دفتر کې اوسي، د چا ډوډۍ خوري او د چا په موټر کې ګرځي.

 
غزني ښار(پژواک ۱۴ چنګاښ ۹۲) : د غزني چارواکي وايي چې وسله والوطالبانو د جاغورو او مالستان ولسوالۍ نږدې شل تنه عام وګړي له موټرو کښته کړي اوله ځانونوسره يې وړي دي.
د غزني جاغورو ولسوال ظفر شريف د چنګاښ په ١٤مه، پژواک خبري اژانس ته وويل چې درې ورځې مخکې وسله والوطالبانو د جاغورو او ګيلان ولسوالۍ ترمنځ  په لويه لاره شل تنه عام وګړي له موټروکښته کړي اوله ځانه سره يې وړي دي.
هغه زياته کړه چې له دې ډلې څخه يې څلور تنه خوشې کړي دي او د ١٦ تنو برخليک تر اوسه نه دى معلوم.