Ghazni

 
غزني (پژواک ۲۲ زمری ۹۲): چارواکی وايي، وسلوالو هغه اته تنه مسافر وژلي، چې د غزني په مقر ولسوالۍ کې يې له اختر څخه يوه ورځ  مخکې له موټره ښکته کړي وو.
د غزني مرستيال والي  محمدعلي احمدي د زمري په ٢٢مه  پژواک اژانس  ته وويل، چې طالبانو ياد کسان د مقر ولسوالۍ اړوند د کابل–کندهار پر لويه لار له ٣٠٣ موټره  ښکته کړي وو او تېره شپه يې د يادې ولسوالۍ د باوالحق په سيمه کې وژلي دي.
د احمدي په وينا، وژل شوي کسان تر اوسه نه دې پېژندل شوي، چې څوک او د کومې سيمې دي.
نوموړي وويل، چې د هغوى مړي د پوليسو له لوري د مقر سيمه ييز روغتون ته لېږدول شوي دي.

 
غزني ښار (پژواک ٢٠  زمرى ۹۲): د غزني د ولايتي شورا غړي او ځيني خلک وايي، په پراختيايي پروژو کې فساد د دې لامل شوى، چې کار يې بې کيفيته او دوام يې لنډمهالى وي.
هغوى ادعا کوي، چې د دغو پروژو قرارداد له داسې کسانوسره کېږي، چې له دولت او يا داسې قومي مشرانوسره تړلي، چې په دولت کې ډېر زور او واک لري.
د ولايتي شورا غړي نادرخان ګيرو وال پژواک خبري اژانس ته وويل، د شرکتونو له لوري چارواکو ته بډې ورکول کېږي او ټولې پروژې هغه شرکتونه قرارداد کوي، چې چارواکو ته يې پيسې ورکړې وي.

 
غزني ښار (پژواک ٢٠ زمری ۹۲): د غزني په محبس کې يو شمېر هغه پوليس، چې پر بېلابېلو تورونو نيول شوي وايي، چې اوس په زندان کې له هغو وسله والو طالبانو سره په يوه خونه کې ساتل کېږي، چې ډېری يې د دوی له لوري په عملياتو کې نيول شوي دي.
دوى زياتوي، په يوه خونه کې د دوی او وسله والو طالبانو ساتل ورته وېره پيدا کړې او څو ځلې له طالب بنديانو سره لاس او ګرېوان شوي هم دي.

 
غزني ښار (پژواک ١٦ زمرى ٩٢): په مشرانو جرګه کې د فراه ولايت استازې روح ګل د وسله والو په يوه بريد کې له خپل خاوند سره ټپي، لور او يو ساتونکى يې وژل شوي دي.
دا پېښه نن (د زمري ١٦مه) د سهار نهه بجې د کابل – هرات پر لويه لاره په غزني ولايت کې رامنځته شوې ده.
د غزني مرستيال والي محمدعلي احمدي پژواک خبري اژانس ته وويل، چې ناپېژانده وسله والو د ګيلان او مقر ولسواليو تر منځ پر لويه لاره د روح ګل پر شخصي موټر ډزې کړې دي.
هغه زياته کړه، چې په دغه  بريد کې روح ګل او خاوند يې سخت ټپيان، خو لور او يو ساتونکى يې په دغه بريد کې وژل شوي دي.