Konar

اسعد اباد (پژواک، ٦ غبرګولى ٩٤): د کونړ نوى والي وايي، چې د دې ولايت د پرمختګ لپاره به په ټول ځواک او رښتينولۍ سره له شته فرصتونو او ظرفيتونو څخه استفاده وکړي.
نوموړي دغه څرګندونې په هغو مراسمو کې وکړې، چې هغه د کونړ خلکو او مامورينو ته ور وپېژندل شو.
د کونړ نوي والي وحيدالله کليمزي له خلکو وغوښتل، چې له ده سره په ټولو چارو کې همکاري وکړي، ځکه چې د ولس له همکارۍ پرته کارونه نه شي پرمخ وړل کېداى.

اسعداباد (پژواک، ٤ غبرګولى ٩٤): د کونړ د ولايتي شورا رييس وايي، په تېرو شپږو مياشتو کې د ډېرو لاسته راوړنو ترڅنګ له خلکو او ولايتي ادارې سره يې ښې اړيکې جوړې کړې دي.
د ولايتي شورا رييس دين محمد پيلوټ ساپي له پژواک خبري اژانس سره په ځانګړې مرکه کې وويل چې په تېرو شپږو مياشتو کې يې ډېره پاملرنه د خلکو د ستونزو اورېدو او ورته د هواري د لارو چارو موندلو ته کړې ده.
هغه زياته کړه: ((موږ هڅه کوو چې د ولس او دولت تر منځ شته واټن راکم کړو چې په تېرو څو کلونو کې د خلکو د زياتو ستونزو له امله دا واټن زيات شوى و.))

اسعد اباد ( پژواک، ١٨ سلواغه ٩٣ ) : د کونړ چارواکي وايي چې وسله والو مخالفينو په ناړۍ ولسوالۍ کې يو ښوونځى او يو کلينيک په  ماينونو الوځولي دي.
د کونړ امنيه قوماندان مل پاسوال عبدالحبيب سيدخېل د سلواغې په ١٨مه، پژواک خبري اژانس ته وويل چې دا پېښې تېره شپه په يوه بجه د ناړۍ ولسوالۍ اړوند د ساو او شېرګل په سيمو کې رامنځته شوې دي.
هغه زياته کړه، چې وسله والو مخالفينو  د ساو په سيمه کې د نجونو يو ښوونځى په  ماينونوالوځولى چې له امله يې ودانۍ ٨٠ سلنه له منځه تللې ده.
امنيه قوماندان وايي چې په دې پېښه کې د قران کريم ځينې نسخې او نور کتابونه هم له منځه تللي دي.