Uruzgan

 
اروزګان (پژواک ٢٩ زمرى ٩٢): چارواکي وايي، د اروزګان د امنيه قوماندانۍ د پاسپورټ امر نن سهار اته بجې د ماين په چاودنه کې ووژل شو.
د لومړۍ امنيتي حوزې امر دويم څارن ګل اغا د زمري په ٢٩مه پژواک اژانس ته وويل، چې ياده چاودنه د ترينکوټ ښار په څلورمه ناحيه کې د پاسپورټ د امر نصرالله خان د کور مخې ته رامنځ ته شوه.
نوموړي زياته کړه، چې د پاسپورټ امر لومړى ژوندى و، خو وروسته يې د سختو ټپونو له امله د ولايتي بيارغونې په پوځي روغتون کې ساه ورکړه.
د امنيه قوماندانۍ وياند فريد عايل وايي، چې ماين د پاسپورټ د امر د کور مخې ته خښ شوى و.

 
کابل ، ترينکوټ ( پژواک ٢٨ زمرى ٩٢ ) : د کورنيو چارو وزارت په اروزګان ولايت کې د حکيم شجاعي په نامه د يوه غير مسوول وسلوال تن د نيولو امر کړى دى.
د کورنيو چارو وزارت لخوا د زمري په ٢٨مه، پژواک خبري اژانس ته په يوه رالېږل شوې خبرپاڼه کې راغلي دي چې د کورنيو چارو وزارت ملي پوليسو ته دنده سپارلې، چې حکيم شجاعي ونيسي.
سرچينې زياته کړې چې حکيم شجاعي هېڅ  امنيتي ارګان پورې مربوط نه دى او له ملي پوليسو يې غوښتي چې هغه د قانون منګولو ته وسپاري.

 
ترينکوټ (پژواک،٢٣زمرى٩): د اروزګان اوسېدونکي ادعا کوي، چې په دغه ولايت کې د عملياتو پرمهال د سيمه ييزو پوليسو له خوا څلور عام وګړي وژل شوي دي.
د عبدالهادي په نوم د خاص اروزګان يوه اوسېدونکي د زمري په ٢٣مه، پژواک خبري اژانس ته وويل چې د دې ولسوالۍ په کوچک سيمه کې، نن مازيګر ناوخته سيمه ييزو پوليسو عمليات ترسره کړي دي.
هغه زياته کړه، په دغو عملياتو کې د يوې مېرمنې په ګډون  څلور ملکي وګړي وژل شوي او شپږ تنه نور ورک دي.
نوموړى وايي: "د دغو عملياتو مشري د سيمه ييزو پوليسو د قوماندان حکيم شجاعي په غاړه وه."

 
ترينکوټ ( پژواک، ١٣ زمرى ٩٢) : چارواکي وايي، چې د اروزګان په مرکز ترينکوټ کې يې يو   ځانمرګى بريدکوونکى موخې ته تر رسېدو وړاندې په ډزو وواژه.
د ارزګان د والي وياند عبدالله همت د زمري په ١٣مه پژواک اژانس ته وويل ،ځانمرګي د پوليسو جامې اغوستې وې او غوښتل يې د کابلبانک مخ ته ځان ورسوي.
همت زياتوي، نن سلګونه پوليسو له کابلبانک څخه خپل معاشونه اخيستل او ځانمرګي د پوليسو له جامې په ګټه اخيستنې سره غوښتل، چې د پوليسو منځ ته ننوځي،خو د پوليسو له لوري تر پېژندلو وروسته ووژل شو.
هغه زياتوي،په پېښه کې هيچا ته زيان نه دى رسېدلى.