Uruzgan ټاکنیز خبرونه

ترينکوټ (پژواک، ۴ وږی ۹۸): يو شمېر اروزګانۍ مېرمنې وايي، که ورته زمينه برابره شي او ټاکنیزو مرکزونو ته يې لاسرسی اسانه وي، نو په راتلونکو ولسمشرۍ ټاکنو کې به په پراخ ډول برخه واخلي.
دوی چې د ټاکنو خپلواک کمېسیون له خوا د (ښځو ونډه په ټاکنو کې) تر عنوان لاندې جوړې شوې غونډه کې ګډون کړی و، له مسوولينو يې وغوښتل چې د ښځو لپاره ټاکنیز مرکزونه زيات کړي.
د اروزګان په مرکز ترینکوټ او څلورو نورو ولسوالیو کې به په ۳۲ مرکزونو کې د رایې اچونې ۲۰۰ محلونه چې ۳۰ یې د ښځو دي، فعال وي.
فروتن د مرکز ترینکوټ اوسېدونکې ده او پر تذکره یې سټېکر هم لګېدلی دی.

ترينکوټ (پژواک، د وږي لومړۍ نېټه ٩٤): چارواکي وايي چې د اروزګان د عامې روغتيا پر رييس ډاکټر خان اغا مياخېل لګېدلي تورونه نه دي ثابت شوي او هغه بېرته خپله دنده پيل کړې ده.
د روان لمريز کال د زمري په ١٨مه د اروزګان مرکزي ملکي روغتون وروسته له هغه د څو ساعتونو لپاره وتړل شو چې د دغه ولايت ملي امنيت رياست له خوا د عامې روغتيا رييس د فساد او له وسله والو مخالفينو سره د لاس لرلو په تور ونيول شو.
هغه مهال د والي وياند دولت محمد ناياب پژواک ته ويلي وو چې د عامې روغتيا پر رييس ادعا د محکمو د رييس مولوي محمد جان له لوري شوې وه.

ترينکوټ ، کلات، اسعد اباد ( پژواک، ١٣ زمرى ٩٤ ) : سلګونو تنو په کونړ او اروزګان ولايتونو کې په افغانستان کې د پاکستان لاسوهنې او د طالبانو د نوي مشر وروستۍ څرګندونې وغندلې.
څه موده مخکې د وسله والو طالبانو او افغان دولت استازو د لومړي ځل لپاره مخامخ او رسمي خبرې وکړې، خو د وسله والو طالبانو نوي مشر ملا اخترمحمد منصور ته په منسوب يوه غږېز کلېپ کې د سولې له پروسې سره مخالفت ښودل شوى او ويلي يې دي : "د سولې خبرو ته غوږ نه نيسو، موږ به خپلې مبارزې ته ادامه ورکوو."

ترينکوټ (پژواک، ١١ چنګاښ ٩٤): د اروزګان د ولايتي شورا منشي وايي چې د چارواکو له خوا د خلکو ستونزو ته نه پاملرنې له حکومت سره د ولس واټن ډېر کړى دى.
عبدالکريم خادمزي پژواک خبري اژانس سره په يوه مرکه کې وويل چې په ځينو سيمو کې د ځايي چارواکو له خوا شخصي زندانونه هم جوړ شوي او خلک په کې شکنجه کېږي.
نوموړي زياته کړه چې په ځينو ولسواليو کې ځايي چارواکي د څو پيسو لپاره بې ګناه خلک نيسي، د طالب او يا هم په بل نوم يې عدلي او قضايي ارګانونو ته معرفي کوي.
د هغه په وينا، وروسته بيا ځايي چارواکي دغه کسان د پيسو په بدل کې خوشي کوي.

ترينکوټ (پژواک، ٩ چنګاښ ٩٤): د اروزګان ولايت د چورې ولسوالۍ د پوهنې مدير د وسله والو له خوا پر ډزو وژل شوى دى.
د اروزګان د والي وياند دوست محمد ناياب د چنګاښ په ٩مه پژواک خبري اژانس ته وويل چې دا پېښه تېره شپه شاوخوا لس بجې رامنځته شوې ده.
هغه زياته کړه چې د چورې ولسوالۍ د پوهنې مدير مومن په جومات کې د تراويحو پر لمانځه ولاړ و چې د نامعلومو وسله والو له خوا په جومات کې دننه وژل شوى دى.
دى وايي چې وسله وال تښتېدلي او پوليس يې په اړه پلټنې پيل کړې دي.

ترينکوټ (پژواک، ٢١ غبرګولى ٩٤): د سيمه ييزو ارګانونو د خپلواکې ادارې مشر غلام جيلاني وايي چې تر راتلونکو لسو ورځو به د پاتې ټولو ولايتونو لپاره واليان وټاکل شي.
پوپل دغه څرګندونې اروزګان ته د سفر پر مهال د دغه ولايت له ځايي چارواکو او قومي مشرانو سره د يوې غونډې پر مهال کړې دي.
يادې غونډې ته د اروزګان د بېلابېلو قومونو مشرانو خبرې وکړې او د سرپرستانو له خوا د دولتي کارونو پر پر مخ وړلو باندې يې سختې نيوکې وکړې.
هغوى زياته کړه چې له تېرو ١٦ مياشتو راهيسې په دغه ولايت کې کارونه د سرپرستانو له خوا پر مخ وړل کېږي چې له امله يې خلک له سختو ستونزو لاس او ګرېوان دي.

ترينکوټ (پژواک، ١٣ غبرګولى ٩٤): د اروزګان ولايت چارواکي او يو شمېر اوسېدونکي وايي چې د نا امنيو له امله يو شمېر روغتيايي مرکزونه تړل شوي چې له امله يې خلک له ستونزو سره لاس او ګرېوان شوي دي.
له بلې خوا د دغه ولايت د عامې روغتيا رياست مسوولين وايي چې ځيني مرکزونه دوى د خپلو کارکوونکو د خونديتوب په موخه تړلي دي.
په دې وروستيو کې د اروزګان ولايت په يو شمېر ولسواليو کې امنيت خراب شوي او وسله وال مخالفين پر يو شمېر سيمو قبضه هم کړې ده، ځايي چارواکي هم مني چې ځينې سيمې يې وسله والو مخالفينو ته پرېښې دي.

ترينکوټ (پژواک، ٩ غبرګولى ٩٤): د خاص اروزګان ولسوال وايي چې وسله وال مخالفين د ولسوالۍ ٥٠٠ مترۍ ته را رسېدلي او که ژر مرسته ور ونه رسېږي، نو ولسوالۍ به سقوط وکړي.
د اروزګان ولايت د خاص اروزګان ولسوال عبدالکريم کريمي د غبرګولي په ٩مه پژواک خبري اژانس ته وويل چې دوى په ولسوالۍ کې خپلې دفاعي پوستې نورې هم شا ته کړي دي.
هغه زياته کړه چې د وسله والو مخالفينو بريدونه زيات شوي او اوس هغوى د ولسوالۍ ٥٠٠ مترۍ ته ور رسېدلي دي.
ولسوال وايي، د ولايت مقام او نورو چارواکو ته يې خبر ورکړى او د بېړنۍ مرستې غوښتنه يې کړې ده، خو تر اوسه په عمل کې څه نه دي شوي.

ترينکوټ ( پژواک، ٣ غبرګولى ٩٤ ): د اروزګان د ولايتي شورا غړو تر اوه مياشتې ځنډ وروسته د اداري پلاوي لپاره ټاکنې ترسره کړې، خو ځينو وکيلانو په دې ټاکنو کې برخه وانخيسته .
دغه ټاکنې د غبرګولي په ٣مه، د اروزګان ولايت په مقام کې ترسره شوې، د نهو وکيلانو له جملې څخه شپږو تنو برخه لرله او پاتې دريېو تنو په کې برخه نه وه اخيستې.
د اروزګان سرپرست والي امان الله تيموري د يادو ټاکنو پر مهال د ولايتي شورا له راغلو وکيلانو مننه وکړه چی نن د ټاکنو لپاره سره راټول شول او دوه ثلثه يې پوره کړل.

ګردېز (پژواک، ٢ غبرګولى ٩٤): په پکتيا کې د ټاکنو خپلواک کمېسيون چارواکي وايي چې په دغه ولايت کې يې له مدني ټولنو، قومي مشرانو، ژورنالېستانو او نورو بنستونو سره د ټاکنيزو ستونزو د هواري په موخه مشورتي غونډې پيل کړې دي.
دوی وايي، له دې غونډو هدف دا دی، هغه ستونزې چې په تېرو ټاکنو کې موجودې وې، کومې دي؟ د حل لارې لپاره يې څه کول په کار دي او څنګه وکولای شو په راتلونکو نورو ټاکنو کې د ښه شفافيت، امنيت او په نورو برخو کې اغېزمن کار وکړو؟