Kabul

 کابل (پژواک،٣١غويى٩٢) : د مشرانو جرګې يو شمېر غړيو د ښځو پر وړاندې د تاوتريخوالي د منع قانون په اړه  په افغانستان کې د ملګرو ملتونو د ځانګړي استازي  څرګندونې د افغانستان په چارو کې لاسوهنه وبلله.
 ولسمشرکرزي د ښځو پر وړاندې د تاوتريخوالي د منع قانون طرحه په ١٣٨٨ کال کې د تقنيني فرمان له لارې توشېح کړه او ولسي جرګې ته يې د تصويب لپاره ولېږله .
 خو  د تېرې شنبې په ورځ ولسي جرګې د قانون ياده طرحه رد او پرېکړه يې  وکړه ، چې دغه مسوده بايد د ګډ  کمېسيون له خوا تر بحث لاندې ونيول شي او د پرېکړې لپاره بيا عمومي غونډې ته وړاندې شي .

کابل (پژواک ٢٥ غويى ٩٢): د ځوانانو ځينو بنسټونو ګواښ وکړ، که چېرې د ماليې وزير د ولسي جرګې په غړو لګول شوي تورونه ثابت نه کړي، نو نوموړى بايد په علني ډول محاکمه شي.
دغه بنسټونه نن په کابل کې سره راټول شوي وو او له حکومته يې وغوښتل، چې پر وکيلانو د لګول شوو تورونو د پلټلو او څېړنې په موخه يو کمېسيون جوړ کړي.
د ماليې وزير حضرت عمر زاخېلوال، دوه ورځې وړاندې د ولسي جرګې په عمومي غونډه کې په قاچاق کې د لاس لرلو په تور د شپږو وکيلانو نومونه افشا کړل، چې د ده په وينا، له نوموړي څخه يې ناقانونه غوښتنې کړې دي.

کابل (پژواک ٢٥ غويى ٩٢): د ولسي جرګې شپږو غړو د ماليې د وزير له خوا پر دوى لګېدلي تورونه بېځايه وبلل او غوښتنه يې وکړه چې د دوى او ماليې وزير تر منځ د قضيې تر روښانتيا دې، ماليې وزير ممنوع الخروج شي.
د ماليې وزير حضرت عمر زاخېلوال وړمه ورځ د ولسي جرګې په استيضاحيه غونډه کې د جرګې د ځينو هغو غړو نومونه په ډاګه کړل، چې مخکې يې په قاچاق کې پر لاس لرلو او له ده څخه په ناقانونه غوښتنو تورن کړي وو.