Kabul

کابل (پژواک ٨ غبرګولى ٩٢): د عدليې وزير وايي، د دولت يو شمېر لوړپوړي کارکوونکي له کورنيو او يا هم بهرنيو سرچينو څخه له ٣٠ تر ٥٠ زرو امريکايي ډالرو مياشتنۍ تنخواوې لري.
د عدليې وزير حبيب الله غالب يادې څرګندونې نن د ولسي جرګې په عمومي غونډه کې د ولسمشر او د دولت د لوړ رتبه مامورينو د لګښتونو او امتيازاتو د قوانينو په اړه د معلوماتو ورکولو پر مهال وکړې.
خو ده په دې اړه نور معلومات ورنه کړل .
دا په داسې حال کې ده ، چې د دولت ځينې هغه ټيټ پوړي کارکوونکي ،چې د "رتب او معاشونو" په سيستم کې نه دي شامل شوي، شاوخوا درې زره افغانۍ (٦٠ ډالره) مياشتنى معاش لري.

مزارشريف ( پژواک ٨ غبرګولى ٩٢ ) : د بلخ والي عطامحمد نور وويل، چې د ۲۰۱۴ کال ټولټاکنې به د ۲۰۰۹ کال د ټولټاکنو په پرتله له جدي ستونزو سره مخ نه وي.
د بلخ والي د غبرګولي په ۸ مه، له غرمې وروسته په مزار شريف ښار کې د المان له سفير ريوديګرکيونګ سره، د راتلونکو ټاکنو په روڼتيا، د المان د مرستو په دوام او له ۲۰۱۴ کال وروسته په افغانستان کې د الماني سرتېرو په پاتې کېدو او د دغه هېواد د هر اړخيزې همکارۍ په اړه خبرې وکړې.

مزارشريف ( پژواک ٨ غبرګولى ٩٢ ) : په افغانستان کې د المان سفير د دغه هېواد د راتلونکو ټاکنو لپاره په مشروع تګلاره او چوکاټ ټينګار وکړ.
په افغانستان کې د المان سفير ريوديګرکيونګ د غبرګولي په ۸مه، له غرمې وروسته په مزارشريف کې د بلخ له والي عطامحمد نور سره، د راتلونکو ټاکنو په روڼتيا، د المان د مرستو په دوام او له ۲۰۱۴ کال وروسته په افغانستان کې د الماني سرتېرو په پاتې کېدو او د دغه هېواد د هراړخيزې همکارۍ په اړه خبرې وکړې.
ريوديګرکيونګ، له دغې کتنې وروسته د بلخ له والي سره په ګډه خبري ناسته کې رسنيو ته وويل، چې له ۲۰۱۴ کال وروسته به هم المان د افغانستان نږدې ملاتړی وي.