Nangarhar

جلال اباد (پژواک، ۲۵ زمری ۹۴): په ولسي جرګه کې د ننګرهار استازی او د ختيځو ولايتونو د جهادي شورا مشر وايي چې ولسونه بايد د داعش پر ضد پاڅونونه پيل کړي او حکومت دې پر وړاندې جدي مبارزه غوره کړي.
حضرت علي د زمري په ۲۵مه په جلال اباد کې د زرګونه ځايي مېشتو سره په غونډه کې وويل چې داعش په شينوارو کې تراوسه تر ۶۰۰ ډېر ملکي خلک وژلي او ۲۷۰ يې يرغمل کړي.
هغه وويل: ((ښايي دا يرغمل کسان هم په داسې بې رحمۍ سره ووژني چې موده مخکې يې يو شمېر په بمونو والوځول.))
حضرت علي پر حکومت او بشرپالو ادارو نيوکې وکړې چې ګنې د داعش د وروستيو تحرکاتو او کړنو پر وړاندې چوپه خوله دي.

جلال اباد (پژواک، ۲۱ زمری ۹۴): د ننګرهار والي وايي چې ځوانانو ته کاري زمينې ځکه نه دې مساعدې چې په دفترونو کې د مقررۍ چانس نه ورکول کېږي.
والي سليم خان کندوزي په دغه ولايت کې د ځوانانو نړيوالې ورځې د نمانځنې پر مهال وويل چې يو شمېر داخلي کړيو واګې قبضه کړې او پر خپلو دوستانو او خپلوانو سربېره ځوانانو ته د کار کولو چانس نه ورکوي.
يادې نمانځغونډه کې چې د جلال اباد په شاهي ماڼۍ کې ترسره شوه، په کې سلګونه ځوانانو، ولايتي چارواکو او مدني فعالانو برخه اخيستې وه.

جلال اباد (پژواک، ۱۲ زمری ۹۴): د ټاکنو د اصلاحاتو کمېسيون چارواکي وايي چې د ټاکنيز بهير په تخنيکي او حقوقي اړخونو کې د اصلاحاتو لپاره په ولايتي او سيمه ييز کچه سلا مشورو ښې پايلې لرلې دي.
د دغه کمېسيون غړي شاه محمود مياخېل له تخنيکي پلاوي سره د زمري په ۱۲مه ننګرهار ولايت ته په سفر کې وويل چې په ولايتي کچه له سلا مشورو وروسته د ټاکنيز بهير لپاره پر منظمه تګلاره کار پېلېږي.
هغه دا څرګندونې د جلال اباد په شاهي قصر او ولايت مقام  کې د قومي مشرانو، علماوو، د ولايتي شورا او د سولې کمېټې له استازو سره په غونډه کې وکړې او په دې تړاو ېې د هغوی غوښتنې هم واورېدې.

جلال اباد (پژواک، ١٠ زمرى ٩٤ ) : د ننګرهار والي ولايتي شورا ته ډاډ ورکړ چې د ولسونو ستونزو حل او ادارې سمون لپاره به يې هر ډول ملاتړ او ننګه وکړي.
د ننګرهار د والي وياند احمد ضياء عبدالزي د زمري په ١٠ مه، پژواک خبري اژانس ته وويل چې والي سليم خان کندوزي نن په جلال اباد ښار کې د ولايتي شورا له دفتر څخه ليدنه وکړه.
هغه زياته کړه، چې ددې ليدنې پر مهال کندوزي ولايتي شورا ته د خپل بشپړ ملاتړ ډاډ ورکولو ترڅنګ هيله وکړه، چې په خپل دفتر کې په دوامداره حضور سره د ولسونو ستونزې هره ورځ ولايتي ادارې سره شريکې کړي .