Nangarhar

جلال اباد (پژواک، ۲۷ غبرګولی ۹۴): د ننګرهار ولايت مدني فعالانو د لاريون په ترڅ کې غوښتنه وکړه چې د دغه ولايت د برېښنا  ستونزې  ته دې دايمي حل لاره ولټول شي.
له تېرو څلور ورځو راهيسې پر ننګرهار برېښنا پرې شوې چې د چارواکو په وينا، د کابل د سروبي ولسوالۍ د اوزبين په سيمه کې يې مزي شکېدلي دي.
د برېښنا رياست وايي، د يادې سيمې يو شمېر اوسېدونکو د برېښنا د غوښتلو په غبرګون کې له يادې سيمې د برېښنا پر غځېدلو مزو ډزې کړې او دوه لينونه يې قطع کړي دي.

جلال اباد (پژواک، ٢٣ غبرګولى ٩٤): په ولسي جرګه او ولايتي شورا کې د ننګرهار وکيلانو له والي وغوښتل چې د امنيت ټينګښت او فساد مخنيوي لپاره ځانګړي تدابير ونيسي.
دوى دغه غوښتنه د ننګرهار ولايت په ګوشتې ولسوالۍ کې د يوې پراخې غونډې پر مهال کړې دي.
د ننګرهار د والي وياند احمد ضياء عبدالزي د غبرګولي په ٢٣مه پژواک خبري اژنس ته وويل چې په دې غونده کې د والي سليم خان کندوزي تر څنګ د ولايتي شورا غړو، په ولسي جرګه کې د ننګرهار استازي فريدون مومند، مرستيال والي محمدحنيف ګرديوال، د کونړ پخوانى والي شجاع الملک جلاله، د ننګرهار امنيه قوماندان ، نورو چارواکو او قومي مشرانو برخه اخيستې وه.

جلال اباد ( پژواک، ١٤ غبرګولى ٩٤ ): د ننګرهار د ولايتي شورا پخوانى کانديد فيصل په مرموز ډول وژل شوى دى.
د ننګرهار ولايت مقام له خوا د غبرګولي په ١٤مه، پژواک خبري اژانس ته په يوه رالېږل شوې خبرپاڼه کې د امنيه قوماندانۍ او سره رود ولسوالۍ د معلوماتو له مخې ويلي دي چې  فيصل کاکړ دوه ورځې مخکې لادرکه شوى و.
سرچينې زياته کړې چې تر وژل کېدو وروسته د نوموړي جسد نن سهار وخته د سره رود ولسوالۍ د غوچکو په سيمه کې موندل شوی.
په خبرپاڼه کې راغلي، د ولايت مقام ؛امنيتي ادارو ته لارښوونه کړې څو قضيه په دقيق ډول وڅېړي او د لامل په اړه يې بشپړ جزييات ولايت مقام ته ورکړي.