Nangarhar

جلال اباد(پژواک،۱۵وږی۹۴): په ننګرهار ولايت کې يو شمېر لاريون کوونکو له حکومت  څخه غوښتنه وکړه، چې له شرط پرته دې په برېښنايي  تذکرو کې د "افغان" او "اسلام" کلمې وليکي.
 د نفوسو د احوالو د ثبت قانون طرحه، تېر کال په ليندۍ مياشت کې د ملي شورا له لوري تصويب شوه او له هغه وروسته بيا د ولسمشر له لوري توشېح شوه، خو د ملي شورا، مدني بنسټونو او ګوندونو يو شمېر غړو په برېښنايي تذکرو کې د "افغان" کلمې د ليکلو، چې د ياد قانون پر بنسټ وېشل کېږي، غوښتنه کړې ده.

جلال اباد (پژواک،۱۰وږی۹۴):د ۲۰۱ سېلاب قول اردو قوماندان وايي وسله والو طالبانو په خپلې پوځي ستراتيژۍ کې د بدلون په راوستو مهمې چارې سخت دريځو وسله والو ته سپارلې دي.
تورنجنرال محمد زمان وزيري د پاکستان څارګره اداره د طالبانو په مستقيمه همکارۍ تورنه کړه او ويې ويل، چې د دولت وسله وال مخالفين اوس د پخوا برخلاف ډله ييز بريدونه کوي او د خپلو کوچنيو وسله والو ګروپونو تشکيلات يې ډېر کړي دي.
د ۲۰۱ سېلاب قول اردو قوماندان دا څرګندونې د وږي په ۱۰مه، په ياده قول اردو کې د ننګرهار د ولايتي شورا د رهبرۍ له لوري د افغان سرتېرو او نوموړي د ستاينې په غونډه کې وکړې.

جلال اباد (پژواک، ۷ وږی ۹۴): په ننګرهار ولايت کې د "ښځو د مشرۍ د پراختيا پروګرام چارې پيل کړې چې لوستو مېرمنو ته به د رهبرۍ کولو په برخه کې زده کړې  ورکوي.
دغه پروګرام چې د امريکا د مرستندويې ادارې يا "يو اېس ای ډي" له لوري تمولېږي، په کابل، ننګرهار، هرات بلخ او کندهار ولايتونو کې به په دريو مياشتو کې ۲۵ زره مېرمنو ته زده کړې ورکړي.
د مېرمنو د رهبرۍ د پراختيا دفتر مسوولې نبيلا قادري د وږي په اوومې پژواک خبري اژانس ته وويل چې په ننګرهار کې به په ياد پروګرام کې ۱۵سوه لوستې مېرمنې او د دولسمو ټولګيو فارغانې تر زده کړو لاندې ونيسي.

جلال اباد (پژواک، ٣ وږی ۹۴): د ننګرهار د ولايتي شورا استازي وايي چې د دغه ولايت په اداري تشکيلاتو کې د تغييراتو راوستو هرکلی کوي، خو نوي ګومارل کېدونکي کسان بايد مسلکي او وړ خلک وي.
وېل کېږي ولسمشر ماڼۍ غواړي چې د ننګرهار تر لسو ډېر رييسان او يو شمېر سيمه ييز چارواکي له دندو ګوښه او پر ځای يې نوی کسان وګوماري.
تېره ورځ ټاکل شوې وه چې ولسمشر غني په همدې موخه جلال اباد ته راشي، خو په ظاهر کې وويل شول چې د هوا د خرابوالي له امله د ولسمشر سفر وځنډېد.